تۆرا لالش
سەرۆک وەزیرێ هه‌رێما کوردستانێ مەسرور بارزانی، تەئکید دکەت کو ب وان هەردوو رێککەفتنامەیێن دگەل دوو کۆمپانیێن ئەمریکی ئیمزا کرین، قوناغەکا نوو یا پەیوەندیێن دناڤبەرا کوردستانێ و ئەمریکا دا دێ دەست پێ كه‌ن.
ل رێكه‌فتی 20-05-2025، مەسرور بارزانی، سەرۆکێ حکومەتا هەرێما کوردستانێ د پۆستەکی دا ل تۆڕا جڤاکی یا ئێکس راگەهاند: قوناغەکا نوو یا پەیوەندیێن دناڤبەرا کوردستانێ و ئەمریکا دێ دەست پێ دکەت ئه‌وژی پشتی ئیمزاکرنا هه‌ر دوو رێککەفتنامەیێن گرنگ دگەل (ئێچ کەی ئێن ئێنێرجی) و (وێستێرن زاگرۆس).
سەرۆک وەزیرێ هەرێما کوردستانێ باس ژی کریە کو بهایێ وان هەردوو رێککەفتنامەیان دەهان ملیار دۆلارن، و دێ کارەبێ بۆ ملیۆنان وه‌لاتیان دابین کەت و هه‌روه‌سان دێ ده‌رفه‌تێن کارکرنێ پەیدا کەت و ئابوریا کوردستانێ ب هێزتر کەت.
ئێڤاریا دوهی یا رۆژا دووشەمبێ، 19-05-2025، ب سەرپەرشتیا سەرۆکوەزیر مەسرور بارزانی، د رێورەسمەکێ دا دوو رێککەفتنامەیێن وزێ، د ناڤبەرا وەزارەتا سامانێن سروشتی یا حکومەتا هەرێما کوردستانێ و هەردوو کۆمپانیێن نەفتێ یێن ئەمریکی (ئێچ کەی ئێن ئێنێرجی) و (وێستێرن زاگرۆس) هاتنە ئیمزاکرن.
دەربارەی ڤێ یەکێ، ستیڤ لوتس، جێگرێ سەرۆکێ ژوورا بازرگانیا ئەمریکا ل گەل پیرۆزبایێن خۆ، گۆت: مەسرور بارزانی پەیوەندیێن هەرێما کوردستانێ و ئەمریکا ب هێزتر و بەرفرەهتر کرینە، مە پەیوەندیەکا گەلەک باش و ب هێز دگەل مەسرور بارزانی، سەرۆک وەزیرێ هەرێما کوردستانێ هەیە، و هەروەسا سەرکردایەتیا سەرۆک وەزیری پەیوەندیێن بازرگانی باشتر کرینە.
ستیڤ لوتس باس ژی کر کو “سەرۆک وەزیرێ هەرێما کوردستانێ، رۆلەکێ باش و حه‌كیمانه د سەرکردایەتیكرنێ دا گێڕایە، هەروەسا بەرێ ژی ب شاندەکێ ب هێز سەردانا واشنتنێ کربوون، ئه‌ڤێ چه‌ندێ پەیوەندیێن هەرێما کوردستانێ و ئەمریکا ب هێزتر کرینە.
تُتاح هذه الصورة أيضا في: کوردی
