دو بهیان ژ بارهگایێ بارزانى ل دۆر سهرهدانێن سهرۆك بارزانى بۆ دهۆك و ئامێدیێ
گاڤ
بارهگایێ بارزانى دو بهیان ل دۆر سهرهدان و كۆمبوونێن سهرۆك بارزانى ل دهۆكێ و دهڤهرا ئامێدیێ بهلاڤكرن.
سهرۆك بارزانى ل ئێڤاریا ئهڤرۆ شهمبیێ ل باژێڕێ دهۆكێ ل گهل رێكخستنێن پارتى ل دهڤهرا بادینان ل باژێڕێ دهۆكێ كۆمبوو و بارهگایێ بارزانى بهیانهك ل دۆر كۆمبوونێ بهلاڤكر.
د بهیانا بارهگایێ بارزانى دا هاتیه “د كۆمبوونهكێ دا، ب مهبهستا لێكگوهۆڕینا بۆچوونان ل دۆر كێشهیێن وهلاتیان، ئاگههداربوونێ ژ رهوشا رێكخستنێن حزبى و دویڤچوونا ئهنجامێن كۆنگرهیێ 14 یێ پارتى، سهرۆك بارزانى پهیڤهك پێشكێشى بهرههڤبوویان كر”.
د بهیانێ دا هاتیه ژى “سهرۆك بارزانى د پهیڤهكێ دا بهحسێ رهوشا حزبێ، بڕیارێن كۆنگرهیێ 14 یێ پارتى، ههروهسا رهوشا سیاسى ل ههرێما كوردستانێ و رویبرویبوونا گهفان و ئاستهنگان د قووناغا نوكه و بهێت دا كر، سهرۆك بارزانى زێدهبارى ئاماژهدانێ ب وێ چهندێ كو د بابهتێ ههلبژارتنان دا پارتى ههر ژ پشتى سهرهلدانێ ژ بۆ ئهنجامدانا ههلبژارتنان و ڤهگوهاستنا شهرعیهتا شۆڕهشگێرى بۆ شهرعیهتا دهستوورى دهستپێشخهر بوویه، دوپاتى ژى ل سهر وێ چهندێ كر كو پێدڤیه بهرهڤ ههلبژارتنان ڤه بچین و پارتى باوهریا گهلى بپارێزیت، بهحسێ وێ چهندێ ژى كر كو ههر كهس و لایهنهكێ بهرژهوهندیێن كوردستانێ بۆ د گرنگ بن، چ جاران ئاستهنگان بۆ پرۆسێسا ههلبژارتنان دروست ناكهت، سهرۆك بارزانى دوپات ژى كر كو پێدڤیه لایهنێن سیاسى سهرهراى جوداهیا بۆچوونێن وان، ل سهر هێلا نهتهوهیى و نیشتیمانى و پاراستنا قهوارهیێ ههرێمێ د كۆك و ههڤڕا بن”.
ههر ل گۆرهى بهیانێ “سهرۆك بارزانى د درێژیا پهیڤێن خۆ دا بهحسێ پهیوهندیێن دناڤبهرا ههرێما كوردستانێ و ئیراقا فیدرال دا كر و كورتیهك ژ دیرۆكا پهیوهندیان د بیست سالێن بۆرى دا بهحسكر و دوپاتكر كو دا كو ئیراق یا سهقامگیر بیت، پێدڤیه ههمى لایهن پێگیریێ ب دهستوور، پرهنسیپێن شهراكهتێ، ههڤسهنگیێ و تهوافوقێ ل بهرچاڤ وهربگرن”.
ههر د كۆمبوونێ دا، ل گۆرهى بارهگایێ بارزانى، سهرۆك بارزانى داخواز كر كو كار بۆ كویركرنا ههستێ نیشتیمانپهروهریێ دناڤ گهنجان دا، هوشیاركرنا وهلاتیان ژ گهفان و پشتهڤانیا حكومهتێ ههرێمێ بهێته كرن.
دیار ژى كریه “پشتى پهیڤا سهرۆك بارزانى، دهرگههێ دانوستاندن، پرسیار، رهخنه و تێبینیان بۆ ئامادهبوویێن كۆمبوونێ هاته ڤهكرن و سهرۆك بارزانى بهرسڤێن پێدڤى بۆ ئامادهبوویان دان”.
سهرۆك بارزانى ههر ئهڤرۆ شهمبیێ ل قهزایا ئامێدیێ ل گهل تهخ و چینێن وى باژێڕى، پێشمهرگه، ههلگرێن مهدالیا بارزانى، كهسایهتیێن جڤاكى، پێكهاتهیان و بهرپرسێن حزبى و حكومى و جهماوهرى ل سنوورێ لقێ 18 یێ پارتى دیمۆكراتى كوردستان كۆمببوو و بارهگایێ بارزانى بهیانهك ل دۆر كۆمبوونێ بهلاڤكریه.
بارهگایێ بارزانى د بهیانهكێ دا بهلاڤكریه “د كۆمبوونێ دا، سهرۆك بارزانى پهیڤهك پێشكێشى بهرههڤبوویێن كۆمبوونێ كر و تێدا بهحسێ خهبات و قۆربانیدان و تێكۆشینا وێ دهڤهرێ د قووناغێن شۆڕهشێ دا كر و سوپاسیا قۆربانیدان و ماندویبوونا خهلكێ وێ دهڤهرێ كر و دیاركر كو ئهو بۆ گوهداریكرنێ ل بۆچوون، داخوازى و كێشهیێن خهلكێ خۆشتڤیێ وێ دهڤهرێ هاتیه”.
بهیانێ زێده ژى كریه “سهرۆك بارزانى ئهو چهنده ژى راگههاند كو لایهنێن پهیوهندیدار و حكومهتا ههرێمێ بزاڤ كرینه و دكهن دا كو ئاڤهدانى و خزمهتكرنهكا پتر بگههیته وێ دهڤهرێ و دیار ژى كر كو هندهك گرفت ژ بهر رهوشا ئهمنى ل وێ دهڤهرێ ههنه چونكى ژ بهر ئهگهرێن ئهمنى د شیان نهبوویه خزمهتكرن بگههیته هندهك دهڤهر و گوندێن وێ دهڤهرێ و ئهڤ چهنده بوویه ئهگهرێ كێمبوونا دهرفهتێن كارى و لاوازیا كهرتێ تایبهت ل وێ دهڤهرێ كو پێدڤیه حكومهت و حزب خزمهتكارێن مللهتى بن”.
سهرۆك بارزانى د درێژیا گۆتارا خۆ دا ل دۆر رهوشا ناڤخۆیى یا ههرێمێ راگههاند؛ ههبوونا بیروبۆچوونێن جودا دناڤ لایهنێن سیاسى یێن كوردستانى دا بابهتهكێ سرۆشتیه لێ پێدڤیه ههمى لایهن ل سهر پاراستن و بهێزكرنا قهوارهیێ ههرێما كوردستانێ و بهرژوهندیێن وێ و یێن وهلاتیێن ههرێمێ د كۆك بن، ل گۆرهى بهیانێ.
د بهیانێ دا هاتیه ژى “ل دۆر رهوشا ئیراقێ و پهیوهندیێن دناڤبهرا ههرێمێ و بهغدا دا، سهرۆك بارزانى كورتیهكا دیرۆكى ل دۆر پهیوهندیێن دناڤبهرا ههرێمێ و بهغدا دا ل پشتى ههڕفتنا رژێمێ بهحسكر و دوپاتكر كو بزاڤ بۆ چارهكرنا كێشهیان د بهردهوامن و دانوستاندن بۆ ڤێ چهندێ د بهردهوامن و ب ئومێدین بۆ چارهكرنا ناكۆكیان، ههروهسا ئاماژه ب وێ چهندێ كر كو پێدڤیه رێز ل رێككهفتنان و دهستوورى بهێته گرتن و لایهنێن ئیراقى بنهمایێن شهراكهت، تهوافوق و ههڤسهنگیێ ل بهرچاڤ وهربگرن”.
د پشكهكا دى یا كۆمبوونێ دا، ل گۆرهى بهیانێ، سهرۆك بارزانى داخواز ژ بهرههڤبوویێن كۆمبوونێ كر كو تێبینى، پێشنیار و داخوازیێن خۆ دیار بكهن و ل دویماهیا كۆمبوونێ سهرۆك بارزانى بهرسڤا پرسیار و داخوازیێن ئامادهبوویان دا.
تُتاح هذه الصورة أيضا في: کوردی
