حكوومه‌تا هه‌رێمێ به‌رسڤا گه‌فێن ئیرانێ دا
وار
حكومه‌تا هه‌رێما كوردستانێ، د به‌یاننامه‌یه‌كێ دا به‌رسڤا گه‌فێن جێگێرێ فه‌رماندێ سوپایێ پاسدارێن ئیرانێ، سه‌ردار سلامی دان و راگه‌هاند، هه‌رێم گه‌فێن سه‌لامی قه‌بوول ناكه‌ت و دخوازیت لسه‌ر بنه‌مایێ جیرانییه‌كا باش په‌یوه‌ندی دگه‌ل ئیرانێ هه‌بن.
سه‌ردار حسێن سه‌لامی د گۆتارا دوهی یا رۆژا ئه‌ینییا ته‌هرانێ دا گه‌فێن وێرانكرنا هه‌رێما كوردستانێ كربوون، حكومه‌تا هه‌رێمێ ژی ب دژواری وان گه‌فێن نه دجهێ خوه دا یێن سه‌لامی ره‌ت دكه‌ت و ب نه‌گونجای دبینیت.
حكومه‌تا هه‌رێمێ دا زانین ژی، ئه‌و گه‌ف ب چو ئاوایه‌كی خزمه‌تا په‌یوه‌ندیێن هه‌رێمێ و ئیرانێ ناكه‌ن، د ده‌مه‌كی دا دانوستاندنێن باش دناڤبه‌را هه‌رێم و ئیرانێ دا هه‌بوون، نابیت ب چو ئاوایه‌كی ئه‌و زمان ل همبه‌ر هه‌رێمێ بهێته بكارئینان.
حكومه‌تا هه‌رێمێ د به‌یاننامه‌یا خوه دا راگه‌هاند ژی، ئه‌و ب گرنگی ڤه ل په‌یوه‌ندێن هه‌رێمێ و ئیرانێ دنێڕن و بزاڤێ دكه‌ن بۆ پتر پێشدابرنا وان په‌یوه‌ندییان، و گه‌فێن دژی هه‌رێمێ خزمه‌تا وێ ئاراسته‌یێ ناكه‌ن.
حكومه‌تا هه‌رێمێ دیاركر ژی، هه‌رێمێ چو جاران نه‌ڤیایه ئاخا هه‌رێمێ، بییته ژێده‌ره‌ك بۆ هێرشكرنا سه‌ر ئاخا ئیرانێ و چو وه‌لاته‌كێ دی یێ ده‌ڤه‌رێ.
تُتاح هذه الصورة أيضا في: کوردی
