نێزیكی 2500 ترۆمبێلێن گه‌نمی د سرایێ دا ماینه
تۆرا لالش يا راگه‌هاندنێ
رێڤه‌به‌رێ كۆمپانیا ده‌خل و دانی ل پارێزگه‌ها دهۆكێ، هه‌تا نوكه هه‌ر چوار سایلۆیێن پارێزگه‌ها دهۆكێ نێزیكی 200 هزار ته‌نێن گه‌نمی وه‌رگرتینه، به‌لێ ئاریشه ئه‌وه نها نێزیكی 2500 ترۆمبێلێن پری گه‌نم د سرایێ دانه.
نازم محه‌مه‌د عه‌لی، بۆ (باسنیوز) دیاركر، پرۆسا وه‌رگرتنا گه‌نمی ژ ئالیێ سایلۆیان ڤه یا به‌رده‌وامه و هه‌تا نها سایلویا فه‌یدیێ 63 هزار و 400 ته‌نێن گه‌نمی وه‌رگرتینه، سایلویا شێخان 67 هزار و 200 ته‌ن وه‌رگرتینه، سایلویا زاخۆ 27 هزار و 700 ته‌ن وه‌رگرتینه و سایلویا رۆڤیا 37 هزار و 200 ته‌نێن گه‌نمی وه‌رگرتینه.
ل دور ئاسته‌نگێن كه‌فتینه به‌رده‌م جۆتیاران رێڤه‌به‌رێ كۆمپانیا ده‌خل و دانی دیار كر كو پشتی به‌غدا بریار دای كو 30% بهێته كێمكرن، گه‌له‌ك جۆتیار یێن ماینه ل به‌ر ده‌رگه‌هێن سایلویان و ره‌سیدێ وان نه‌مایه و سایلو نه‌شێن گه‌نمی وه‌ربگرن هه‌تا ناڤ و ره‌سید ل به‌غدا هه‌بیت و گۆتیشی: پشتی مه گه‌نمێ ده‌ڤه‌را ئه‌لقوش یا سه‌ر ب پارێزگه‌ها مووسل ڤه وه‌رگرتی، هه‌تا راده‌یه‌كی ئه‌ڤ ئاریشه به‌ر ب چاره‌سه‌ریێ ڤه دچیت.
ئاشكرا ژی كر كو ژ به‌ر ڤێ بریارێ نها پرۆسا وه‌رگرتنا گه‌نمی ژ ئالیێ سایلۆیان ڤه هه‌تا راده‌یه‌كی هاتیه راگرتن و ترۆمبێل ماینه د سرایێ دا و گۆت: نها ل سایلۆیا فه‌یدیێ نێزیكی هزار ترۆمبێلان د سرایێ دانه، ل سایلۆیا رۆڤیا نێزیكی 600 ترۆمبێلان و ل سایلۆیا شێخان نێزیكی 700 ترۆمبێلان، ب تنێ ره‌وشا سایلۆیا زاخۆ ژ یێن دی باشتره و كێم ترۆمبێل نها ل سرایێ هه‌نه.
ل دووڤ شیانێن وه‌رگرتنا گه‌نمی ژ لایێ هه‌ر سایلویه‌كێ ڤه دیار كر كو سایلۆیا فه‌یدیێ دشێت 30 هزار ته‌نان وه‌ربگرن، یا شێخان 60 هزار ته‌نه و یا زاخۆ 15 هزار ته‌نه ئه‌ڤه بێ گۆره‌پان، ب تنێ د ناڤا سایلۆیان دا، به‌لێ دناڤ گۆره‌پان و به‌نگه‌نێن سایلۆیان دا، سایلویا زاخۆ دشێت 20 هزار ته‌نێن دی یێن گه‌نمی وه‌ربگریت، سایلویا فه‌یدیێ دشێت 40 هزار ته‌نان ل ناڤ گۆره‌پان و به‌نگه‌نێن خۆ ب حه‌وینیت، سایلویا شێخان 40 هزار ته‌ن و سایلویا رۆڤیا ژی دشێت 55 هزار ته‌نان وه‌ربگریت.
تُتاح هذه الصورة أيضا في: کوردی
