ھۆزێن ئەرەبێن سونە نەینەوا ل گەل پارچەکرنا عێراقێ نە
ئەڤرۆ نیوز:
پەیڤدارێ ھۆزێن ەرەب ل پارێزگەھا نەینەوا ب رێکا رۆژناما ئەڤرۆ پشتەڤانی ل گۆتنێن شیرتکارێ جڤاتا ئاسایشا ھەرێما کوردستانێ کرن کو چارێن دی نین و دڤێت عێراق بێتە پارچەکرن.
شێخ موزاحم ئەحمەد ئەلحوێت سەرۆکێ ھۆزا جحێش و پەیڤدارێ ھۆزێن ئەرەبە ل پارێزگەھا نەینەوا، بۆ رۆژناما ئەڤرۆ گۆت: وەک ھۆزێن ئەرەب ل پارێزگەھا نەینەوا ئەم پشتەڤانیێ ل گۆتنێن بەرێز (مەسرور بارزانی ) شیرتکارێ جڤاتا ئاسایشا ھەرێما کوردستانێ دکەین، دەمێ راگەھاندی کو دڤێت عێراق بۆ سێ دەولەتان بێتە پارچەکرن، ئەو ژی چێبوونا دەولەتەکا شیعی، سنی، کوردی، دبینم ئەڤە باشترین چارەیە بێتەکرن.
پەیڤدارێ ھۆزێن ئەرەب ل پارێزگەھا نەینەوا ئەو چەندە ژی نەڤەشارت و گۆت: زڤڕینا دەڤەرێ بۆ پێشتر بەری داعش و راوستاندنا خوینێ ل ھەرسێ گوشێن شیعی و سونی پێتڤی ب پارچەکرنا عێراقێ یە بۆ سێ دەولەتان، چنکو عێراقا بەرێ نازڤرت و ھەتا بزڤڕت ژی ژیان ل ڤێ عێراقێ یا بەردەوام خوین لێ دئێتە رێتن بەردەوام کوشتن ھەیە بەردەوام دزی و تالانکرن ھەیە و سەرێ چەندین سالانە ئەڤی خەلکی خوەشیی ب خوە نەدیتی یە و نەشیاینە وەک برا ل گەل ئێک بژین، ئەڤجا ئەم ھزر بکەین پشتی داعش دێ عێراق چێ بت، نەخێر ئێدی ژیان ل گەل ئێک و پێکڤەژیان ل ڤان دەڤەرا نەمایە، نۆکە حەشدا شیعی حەشدا شەعبی یا تاوانێن مەزن دکت ل ھەمبەر سونێن ئەرەب و ب تایبەتی ل باژێرێ فەللوجە و جھێن ئەرەبێن سونە و چو دلوڤانیێ ب کەسێ نابەن، ل بەرامبەر کورد یێ ئەرەبێ سونە و شیعە دحه‌وینن و دلوڤانیێ پێ دبەن و بەردەوام ھاریکاریێ بۆ دکن، ل ھەرێما کوردستانێ د ئارام و تەنا دژین و ئەڤە ژی نامەکا دی یە بۆ ئەرەبان کو کورد خودان ھەلویستەکێ جامێرن.
سەرۆکێ ھەمان ھۆزا ئەرەب گۆت: پەیڤێن شیرتکارێ جڤاتا ئاسایشا ھەرێما کوردستانێ دروستن و بتنێ ئەڤ رێکە ھەیە کو ع|عێراق ببتە سێ پارچە و ئەم ھۆزێن ئەرەبی ل پارێزگەھا نەینەوا ل گەل پارچەکرنا عێراقێ ینە، و بتە سێ دەولەت و چنکو خەلکێ عێراقێ نۆکە ھەموو بووینە دوژمنێن ئێک دو و ئێدی ژیانا ل گەل ئێک نابەنە سەری، دیسا ھەر ژ چێبوونا عێراقێ ھەتا نۆکە خوینا دئێتە درێتن و چو خۆشی پێکھاتێن عێراقێ ب خۆ ڤە نەدیتی یە، ئەڤ پارچەکرنە دێ بتە رێگر ل ھەمبەری گەلەک کارا، بۆ نموونە مایتێکرنا ئیرانێ د کاروبارێن عێراقێ دا ئێدی نامینت، و ھەر پێکھاتەک دێ بخۆ ل جھێ خۆ ژیت و ئەو ب خۆ دێ دەستھەلاتێ ل خۆ کت.
ھەروەسا گۆت: دبەرھەڤین وەک ھۆزێن ئەرەب ل پارێزگەھا نەینەوا کۆنفرانسەکی بگێرین و تێدا ب شێوەکێ فەرمی پشتەڤانیێ ل دابەشکرنا عێراقێ بکەین، دیسا دێ ب فەرمی ژی ئەڤێ چەندێ بۆ رایا گشتی دووپات کەین کو مە دڤێت عێراق بێتە پارچەکرن و ئێدی نابت ئەڤە ل گەل ئێک بژین و نابیت بەردەوام خوین و کوشتن ھەبت و خەلک ب خۆ ب رەڤت و بچتە دەرڤە.
سەرۆکێ ھۆزا جحێشی یا دیارکر، کو جارا ئێکێ یە ھۆزێن ئەرەب ل نەینەوا بڤی رەنگی پپشتەڤانیێ ل پارچەکرنا عێراقێ دکن، وب ڤی رەنگی خورت بوونا خۆ ل سەر چێبوونا سێ دەولەتێن شیعی و سونی و کوردی دووپات دکن، گەھشتینە وێ باوەريێ کو بتنێ ئەڤ رێهيه ھەیە و بكارن خوینا خەلکێ بێ گونەە راوستینن.
ل دووماھیێ پەیڤدارێ ھۆزێن ئەرەبێن نەینەوا سوپاسیێن خۆ ئاراستەی بەرێز مەسرور بارزانی شیرتکارێ جڤاتا ئاسایشا ھەرێما کوردستانێ کرن، راگەھاندیە کو پێتڤی یە عێراق بێتە پارچەکرن و ئەڤە دبەرژوەندا ھەموو خەلکی دایە.
تُتاح هذه الصورة أيضا في: کوردی
