وێنێ وی بابێ هەستیێن کورێ خۆ د کیسەکێ دا وەردگریت ل سەر ئاستێ جیهانێ رەنگڤەدایە

گاڤ نیوز:

پشتی 6 سالان بابەک هەستیێن کورێ خۆ د کیسەکێ پلاستیکی دا ل ئامەدێ وەردگریت و ڤێ مامەلەیا دەستهەلاتدارێن تورکیا ل گەل بابەکی کارڤەدان ل دویڤ خۆ ئینان.

هاکان ئەرسلان، کورێ عەلی ریزا ئەرسلان ل سالا 2016 د شەرێ پەکەکێ و تورکیا دا ل ئامەدێ ژیانا خۆ ژ دەست دایە، ل شوباتا سالا 2021 هەستیێن هاکانی ب رێکا ژمارەکا کرێکاران هاتینە دیتن، عەلی ریزا ئەرسلان هەر زوی تێستا DNA کر بۆ پشتراتکرنێ و ل هەیڤا چریا دوێ یا هەمان سال تێست پۆزەتیڤ دەرکەفت و دیاربوو کو ئەو هەستی یێن هاکانێ کورێ عەلی ریزای نە، لێ ئەو نەچار کرن 10 هەیڤێن دی خۆ بگرن هەتا کو هەستیێن وی رادەستی مالباتا وی کرین.

پشتی بریارا رادەستکرنا هەستیێن هاکانی هاتیە دان، بابێ وی عەلی ریزا بۆ وەرگرتنێ چوو ئامەدێ، لێ هەستیێن وی د کیسەکێ پلاستیکی دا و بێی رێزگرتن هاتنە رادەستکرن و ئەو وێنەیێ بۆ وی بابی هاتیە گرتن کو کیسەکێ پلاستیکی یێ هەستیێن کورێ وی د دەستێ دا ل سەر ئاستێ ناڤخۆ و جیهانی ژی دەنگڤەدا و رەخنەیێن توند ل دەستهەلاتدارێن تورکیا هاتنە گرتن.

پارێزەرێ مالباتا هاکانی راگەهاند؛ پشتی رادەستکرنا هەستیێن وی ب ڤی رەنگی، مالباتا وی تایبەت دایکا وی گەلەک ئێشاینە.

ژمارەکا میدیایێن جیهانی ئەو بابەتە ل گەل وێنەیێ عەلی ریزا ئەرسەلانی بەلاڤ کریە رەخنە ل دەستهەلاتدارێن تورکیا گرتینە ل سەر وێ مامەلەیێ و چالاکڤانێن ناڤخۆ ژی یێن تورکیا رەخنە گرتینە و نڤیسیە، هەر کەسەک پشتی مرنا خۆ ژ هەژی رێزگرتنێ یە.

جانلۆکا کۆستانتینی، نیگارکێشێ ئیتالی وێنەیێ بابێ هاکانی ل گەل هەستیێن وی ل سەر دیوارەکێ نەخشاندیە و ل سەر وێنەی نڤیسیە 7 سال، کۆستانتینی ئەو وێنەیە ل سەر تویتەرێ خۆ بەلاڤ کریە و ل سەر نڤیسیە، عەلی ریزا و کورێ خۆ ل جادەیێن ستەنبۆل.

س.س