گرۆپەكێ سترانێن فلكلۆرێ ئێزدیان ل ئەلمانیا هاتە دامەزراندن
تۆرا لالش:
ل دەسپێكا بەلاڤبوونا ڤایرۆسێ كۆرۆنایێ ل جیهانێ،چار گەنجێن هۆنەرمەندێن ئێزدی ل وەلاتێ ئەلمانیا گرۆپەكێ هۆنەری بناڤێ فلكلۆر و سترانێن ئێزدیان دامەزراند،ئارمانجا وان خزمەتكرنا هۆنەرێ ئێزدیان و كوردستانێ یە.
ئەندامێ گرۆپێ فلكلۆر و سترانێن ئێزدیان(ئیڤان عادل) بۆ رۆژناما دەنگێ لالش دیاركر، پشتی بۆرینا ب سەدان سالا موزیك و سترانگۆتن بوونە هۆنەرەكی سەربەخۆ و ب تاك یان كۆمەل وەك گرۆپ هاتە پێشكێشكرن،ئاینێ ئێزدیا ژ وان ئاینایە كو ژ كەڤندا گرنگی ب موزیكێ دایە و ل دەستپێكا ڤایرۆسێ كۆرۆنایێ دا ئەم هەڤال و دۆست و هۆنەرمەند ژ ئێك غەریب بوون و داوەت و شەهیان نەبوون حەژێكەرێن هۆنەر و دەنگێ مە وەختەكی درێژ چاڤەرێ كارەكێ هۆنەری بوون،ئەڤ هزر هاتە سەرێ من كو ئەم كارەكێ هۆنەری وەكو گرۆپ پێكڤە پێشكێشی خەلكێ خۆ بكەین دەلیڤە چێبوو مە ئێك و ودوو دیت،دیسان مە كارەكێ هۆنەری پێشكێشی خەلكێ خۆ كر و پاشی گەلەك كەیفا خەلكێ بۆ را هات و ژ مە داخوازكرن كو ئەم هندەك كارێن دی یێن هۆنەری پێكڤە ئەنجام بدەین.
هۆنەرمەند(عەبدولعەزیز باعەدری)ئێك ژ ئەندامێن گرۆپێ هۆنەری یە بۆ رۆژناما دەنگێ لالش دبێژت:هەلبژارتنا هۆنەرمەندا بۆ ڤی گرۆپی ژ ئالیەكی بۆ بنیاتەكێ هۆنەری دزڤرت و دەنگێ مە نێزیكی ئێكن و گەلەك جاری ستران مە پێكڤە گۆتینە،مە داخواز ژ هندەك هۆنەرمەندا كریە كو بێنە دناڤ گرۆپی دا لێ هەتا نهۆ دەلیڤە بۆ وان چێنەبوویە و دەرگەهێ ڤی گرۆپی ڤەكریە بۆ هەر هۆنەرمەند و هۆنەرمەندەكا ئێزدی.
ژبال خۆڤە هۆنەرمەند(عەدنان)ئەو ژی ئێك ژ ئەندامێن گرۆپێ هۆنەری یە بۆ رۆژناما دەنگێ لالش دیاركر، بۆ هەلبژارتنا جۆرێ سترانێ و رتمێ مامۆستا ئیڤان عادل سترانا ئێكێ بۆ مە هەلبژارت وەك رەنگێ ماشۆپ كو هژمارەكا سترانێن فلكلۆری یە و هەر ئێك ژ مە بەندەك دگۆت،لێ بۆ سترانا دووێ مە وەك گرۆپ بریاردا كو سترانا هۆنەرمەندەكێ چیایێ شنگالێ هەلبژێرین و چێدبت ل پاشەرۆژێ مە هندەك كارێن دی هەبن و هندەك هۆنەرمەندێن ئێزدی ل گەل مە دا پشكداربن.
هەروەسا هۆنەرمەند(هونەر كەندالی)ئەندامەكێ گرۆپی یە بۆ رۆژناما دەنگێ لالش گۆت:ل ڤی گرۆپی مامۆستا ئیڤان عادل بتر ژ مە ئامێرێن موزیكێ یێن زندی دزانت و دژەنت،ئەڤە ژی خۆشیەكێ و بەهایەكێ هۆنەری د دەتە كارێ مە كو دبتە كارەكێ هۆنەری یێ پاقژ و دەنگێ رەسەن و سروشتی خویا دبت كو بنیاتێ موزیكێ ئامیرێن زندینە، مە گەلەك دڤیا كو كچكەك ل گەل مە سترانێ بێژت لێ هەتا نهۆ كچەك ل ئەلمانیا مە نە دیتی یە كو ستایلێ مە بێژت ئەڤە ئێك و یا دووێ ژی نە بتنێ ل ناڤ جڤاكا ئێزدی،بەلكو ل بتریا جڤاكێن دەوروبەری مە سترانبێژێن كچ د كێمن و هندەك هەینە ژی لێ ل ئەلمانیا ناژین.
تُتاح هذه الصورة أيضا في: کوردی
