ئەو سۆزا نەبوویە راست
سەلمان نهێلی
شەڤێدی
من بریاردا نڤێژا مریان
لسەر رۆندكان بكەم و ئێدی
چاڤان نەگرینم
من سۆز دا بوو
ئێدی خامەی لسەر گۆریا خەمان
نەكوزرینم
تابیتا خۆزیكێن خۆ
دگۆرستانەكێ دا ڤەشێرم و
خۆ بەس ب ڤەهاندنا
داڤێن پرچا هەیڤێ ڤە بوەستینم
ئێدی بەس ستێران ل ئەسمانی و
پەیڤان لسەر لاپەران بێخمە سەمایێ و
و ب ئازرینم
لێ بابەلیسكێن عەشقا تە
دڤێ شەپرزەدا
سۆز هێلانە بێ ناسنامە
خامە دشەبستانان دا
كەفتە د پەیڤستانان و
مینا زارۆكەكێ نەفامە
هەیڤا برسی لسەر دێمێ تە دچەریت
تا روون ببیت
چواردەه هەیڤێن چواردەه شەڤی ببنە ئێك شەڤ
هێشتا لبەر دێمێ تە یا سەرسامە
شەڤ یا خۆ ل چاڤێن تە دهەلینیت
تا كو رەش ببیت
ڤینوس و هەمی شاه ژن
لبەر لێڤێن تە شەكرا لێڤێن وان بێ تامە
ڤێجا چاوان حەژ تە نەكەم
دەمێ هەیڤ و ستێر خۆ ژبۆ
جوانیا تە دچەمینن
چاوا حەژ تە نەكەم
پەری و حوری شەرمێ ژ جوانیا تە دكن
یێت كەفتینە گیانێ خۆ و
روی و كەزێن خۆ دڤەچركینن
گۆلان چوك یێت بوو تە دانای
خۆ د تۆز و غوبارێ دگەڤزینن
لەوا هەتا مرنێ دێ حەژ تەكەم
لمن ببۆرە نەشێم تە
ل هزرو ئەندێشا خۆ بینمە دەرێ و
پەیڤان بتە نەڤەهینم ….
تُتاح هذه الصورة أيضا في: کوردی
