قیزا ئێزدی
سەلمان نهێلی
ئەز قیزەكا ئێزدی مە
ئەز سپەهی مە
وەك وێ بەفرا رادموسیت رۆكێن چیا
وەك وێ وەسفا ئیلاهی دایە حوریا
مەهوەشم ئەز دناڤ كێلەشۆكا پەریا
تكایە نەمكەن سەبایە…
ب چوو قەول و ب چوو ئایا
پیرۆزیێن من بن پێ نەكن
ب چوو دەستوور و رێسایا
دەستان ل كەزیكێن من نەدەن
ئەڤ كەزیێن من ژبۆ خورتەكی ئێزدی د ڤەهاندینە
ئەڤ چاڤێن من ژبۆ عەشقا لاوەك ئێزدی دقەرمینە
ئەز و ئەو ژ ئێك خاكین
بۆ ئێك پاكین
ستێر و هەیڤین
شعر و پەیڤین
ل بوونە و جەژن و سەر سالا
ئەڤ گولیا من یا گەنمی
ژبۆ هەلبەستێن لاوكێ من دبوونە ئیلهام و ئالا
تكایە نەمكەن سەبایە….
ئەڤ چوو تایە كەفتینێ هوون؟
سەربرین و دەست برین و مل برین
ئەڤ چوو گەمارە هوون دناڤدا خەندقین؟
ژ نوو دبێژنە من بێ دین!
هەر ئەو دینمە
دێ ئەو مینم
ئەز پەیرەوا لالش و شەرفەدینم…
ئەرێ ،ئەرێ
چوو زریانا نەگهۆری ئۆل و ئالا من
چوو تۆفانا
چوو ڤولكانا
چوو فەرمانا
ل پشتا من نەكر شالا من
ئیرۆكە ژی وەكو دوهی
((زەریفا ئوسێ )) و ((گولا بارۆ)) و
تەڤ پێشمەرگەهێن كوردستانا
لسەر مێزا بەرگیریێ
ئەو دكن باس و قالا من….
ئەرێ ئەرێ
چەند من بهاڤێژن ئاگری
نێ ئەز ژ نڤشێ رۆژێ مە ب ئاگری نائێمە سۆتن
ل باژارێن رەققە و مووسل
وەك كەنیزان بەهای دداننە لسەر من
لێ نزانن در و مەرجان چوو جار نائێنە فرۆتن…
ئیرۆكە ژی نە ب برسێ،نە ب ترسێ
ئەو هیڤی یێن نوو رستی یێن دناڤ گرێیێن كەزیێن من دا
وندا نابن و جوانیا خۆرتێ ئێزدی د چاڤێن من دا نائێت دۆتن….
ئەرێ،ئەرێ
ما هوون چوو قرێژن
ما هوون چوو گەمار و گێژن
خەلكی ب ساخی بن ئاخ دكن و ژنوو دبێژن:(الخلافە علی المنهج النبوە)
نەخێر،نەخێر
نە وە چوو ئۆل و ئال هەنە و
هوون پیسە ڤەرێژن
تُتاح هذه الصورة أيضا في: کوردی
