فلمەكێ دیكۆمێنتاری یێ پێشمەرگەی دێ هەڤركیێ ل سەر خەلاتێ دراگۆن كەت
باسنيوز:
دەرهێنەرێ فلمێ دیكۆمێنتاری (مین هەلگر) دیاركر، فلمێ وان دێ د گەرا 41 یا فیستەڤالا یوتوبوری ل وەلاتێ سوید دا پشكداری كەت و دێ هەڤركیێ ل سەر وەرگرتنا خەلاتێ دراگۆن كەت.
شینوار كەمال، دەرهێنەرێ فلمێ (مین هەلگر) بۆ (باسنیۆز) راگەهاند، ل 26/1/2018، دێ ل وەلاتێ سوید فیستەڤالا یوتوبوری یا فلمان هێتە ئەنجامدان و تێدا ئەم دێ فلمێ خوە نماییش كەین و دێ پێشبركیێ ل سەر وەرگرتنا خەلاتێ دراگۆن كەن و گۆت: ئەم د شانازین ب پشكداریا فلمێ مە د ڤێ فیستەڤالێ دا.
ل سالا 2017 فلمێ (مین هەلگر) ژ دەرهێنانا (هۆگر هرۆری و شینوار كەمال)ە، خەلاتێ تایبەت یا فیستەڤالا ئەمستردام یا فلمێن دیكۆومێنتاری وەرگرت كو مەزنترین فیستەڤالا فلمێن دیكۆمێنتاری یە ل جیهانێ، ئەڤ فلم ل دۆر قارەمانتیا كۆلۆنێلێ كورد فاخر بەرواری، ئەو زەلامێ ب پیەكی و كەتەرەكی ب هزاران مرۆڤ قورتال كرین.
شینوار كەمال ئاشكرا كر، عەقیدێ پێشمەرگە (فاخر بەرواری) یێ كێم ئەندام كو ب تنێ ب پیەكی بوو و ل سەر دەستێ رێكخراوا تیرۆری یا داعش ل سالا 2016 هاتبوو شەهیدكرن، قارەمانێ ڤێ فلمێ یە و ئەڤ فلمە بەحسێ قارەمانی و ئازایەتیا عەقید فاخری دكەت، وەك پێشمەرگەیەك گیانێ خوە دئێخیتە د مەترسیێ دا و مین و تەقەمەنیان ل بەراهیێن شەری رادكەت، ب مەرەما هندێ هەڤالێن خوە ژ مرنێ رزگار بكەت و دیسا عەقید فاخر چەندین جاران ژ مرنێ رزگار دبیت و پێیەكێ خوە ژی ژ دەست ددەت.
شینواری دیاركر ژی: د ڤی فلمی دا عەقید فاخر چیرۆكا 14 سالێن قارەمانیا خوە وەك مین هەلگرەك ڤەدگێریت، هەروەسا ئەڤ فلمە د چارچۆڤێ فیستەڤالا نێڤدەولەتی یا فلمێن دیكۆمێنتاری ل ئەمستردام ل پایتەختێ هۆلەندا هاتیە نیشاندان و ژ سەرجەمێ 280 فلمان ب تنێ 15 فلم د وێ فیستەڤالێدا هاتبوونە هەلبژارتن و د وێ فیستەڤالێدا فلمێ مە خەلاتێ دادوەری وەرگرتیە.
تُتاح هذه الصورة أيضا في: کوردی
