گەنجەك بەلگان ل سەر تراژیدییا ئێزدیان كۆم دكت
K24_هەولێر:
ماوەیەكە گەنجەكێ ئێزدی رابوویە ب تۆماركرن و كۆمكرنا پێزانینان ل سەر قوربانیێن ئێزدی ل سەر دەستێ چەكدارێن داعش،وی گەنجی راگەهاند،هەتا نۆكە كاریە پێزانینان ل سەر زێدەتر ژ 2400 قوربانیێن دەستێ داعشێ تۆمار بكت.
ئەڤ گەنجە ئێزدییە،رابوویە ب دكیۆمێنتكرنا تاوانێن چەكدارێن داعشێ ل دژی كوردێن ئێزدی،ب ئۆمێدا وێ چەندێ ئەگەر دادگەها نێڤ دەولەتی كەیسا ئێزدیان ڤەكر، بەلگە ل بەردەست بن و تاوانبار بگەهنە سزایێ خۆ.
بەهزاد فەرحان موراد،ئەو زەلامێ ئێزدییە كو خەلكێ شنگالێ یە و نۆكە ل باژێرێ دهۆكێ یە،مژوولی كۆمكرنا دكیۆمێنت و بەلگەیانە ل سەر نەهامەتیێن چەند سالێن بۆری یێن ئێزدیان كو ل سەر دەستێ چەكدارێن داعش تووش بووینێ یە.
ل سالا 2014 و ل وەختێ داگیركرنا شنگال و دەڤەرێن دەوروبەر ژلایێ رێكخراوا داعشێ ڤە، ب هەزاران ئێزدی هاتنە كوشتن و هەزارێن دی ژلایێ وی گرۆپێ تیرۆرستی ڤە هاتن گرتن و پتریا ژن و كچان ژلایێ چەكدارێن رێكخراوێ ڤە هاتن كۆیلە كرن،ژبلی هندێ ب هەزارێن دی ژی ،ماڵ و حالێ خۆ ب جێهشت و قەستا هەردوو پارێزگەهێن هەولێر و دهۆكێ كرن.
ئەو زەلامە تەمەن 28 سالە،دڤێت مێژوویا خەلكێ خۆ بنڤیست، ئەڤەش بۆ هندێ نڤشێ داهاتی،وان تاوانان ژبیر نەكن كو داعش رووبروویێ ئێزدیان كرینە.
بەهزاد دبێژت هەتا نۆكە كاریە سەرەدانا گەلەك كەمپێن ئاوارێن ئێزدی بكت و ئاخفتن و پێزانین ژ زێدەتری 2400 قوربانیێن دەستێ داعش تۆمار كرینە.
بەهزاد ئاشكەرا دكت ژی ئەو وەكو كەسەكێ سەربەخۆ وی كاری دكت و چەند هەڤالەك هاریكاریا وی دكن،سەرجەم خەرجیا هەوا خۆ ژی ئەو ب خۆ دابین دكت و هیچ لایەن و حكوومەتێك هاریكاریا وی نەكریە.
ل گۆری نووترین ئامارا رێكخراوا نەتەوەیێن ئێكگرتی،ل دەمێ هاتنا داعش بۆ ناڤ شنگال، نێزیكی پێنج هەزار ئێزدی هاتن كوشتن كو پتریا وان زەلام بوون و نێزیكی چار هەزارێن دی ژی كو پتریا وان ژن و زارۆك بوون،هاتن گرتن كو هەتا نۆكە چارەنڤیسێ پتریا وان دیار نینە.
تُتاح هذه الصورة أيضا في: کوردی
