داخواز ڤەكرنا رادیۆیەكێ بۆ كوردێن ئێزدی دكت
دیدار:ئیڤان حەجی
خێری علی خدر یێ ناسیارە ب خێری بێبانی ل سالا 1956 هاتیە سەردنیایێ و دەرچویێ پەیمانگەها گشتوكالیە و نۆكە یێ خانەنشین كریە،چنكو ل سالێن نۆتاندا ب مخابنیڤە ژ ئەگەرەكێ ل نەخۆشخانا ئازادی ل باژێرێ دهۆكێ ب ئەگەرێ تێكچۆنەكا تەكنیكی دناڤ (مصعدێ) دا هەردوو چاڤێن خۆ ژ دەست دان،بێبانی ئێكە ژ دیارترین كەسێ ئێزدی یێ پەیوەندیكارێ رادیۆییان،رۆژانە پەیوەندیێ ب رادیۆیێن كوردستانی و عیراقی دكت ب مەرەما گەهاندنا ئاریشێن خەلكێ.
ل دۆر حەژێكرنا وی بۆ رادیۆیێ، خێری بێبانی گۆت:ئەزی بچوك بووم من حەژ رادیۆیێ دكر ول دەمێ ئەز قوتابی من رادیۆ دگەل خۆ دبرە قوتابخانێ،چنكو وەك هەڤالەكی بۆ من لێ هاتبوو وهەتا نۆكە ژی وەك هەڤالە بۆ من ،هەروەسا ژمارا وان رادیۆیێن پشكداریێ تێدا دكەم بترن ژ 15نە وبەهرا پتر پشكداریێ د رادیویێن كوردستانێ دا دكەم ب تایبەت رادیۆیا دهۆك،چنكو ئەو هێڤێنێ گەهاندنا ئاریشێن خەلكێ یە و گەلەك ئاریشێن من گەهاندنە جهێ بەرپرسە و هاتینە چارەسەركرنە،لەوما ئەزی بەردەوامم لسەر پەیوەندیكرنێ و گەلەك خەلكێ پەیوەندی ب من كریە كو ئەز گازندێن وان بگەهینم و من گەهاندینە.
سەبارەت هاریكاریێ ژی،بێبانی گۆت:هەتا نۆكە چ كەسی هاریكارییا من نەكریە وەك مادی یان دراڤ بۆ كارتا،چنكو من نەڤیایە و هەردەم ئەزی هاریكاربووم بۆ وان هەڤالێن خۆ یێن پەیوەندیێ ب رادیۆیا دكن،دیسان من هندەك داخوازی ژ چەندین رادیۆیا كریە بەلێ نەهاتنە بجهئینانە من دڤێت ب رێیا دەنگێ لالش بگەهینم ئەز داخوازێ ژ حكومەتا هەرێما كوردستانێ دكەم رادیۆیەكێ بۆ كوردێن ئێزدی ڤەكت،چنكو ئەم ئێزدی كوردێن رەسەنن و مە زمان و كلتورێ خۆ پاراستیە و داخوازیا دی ژ بنگەهێ لالش دخوازم سندۆقەكا خێرێ یا هاریكاریێ ڤەكەن بۆ ڤان خێزانێن ژ دەستێ داعش رزگاربووین و چەندین بەلنگازێن ئێزدیان ،هەروەسا خزمەت گۆزاری بتر بێنەكرن بۆ ڤی خەلكی،ژبەركو خزمەت گۆزاری نینن،لەوما ئەڤ خەلكە بەرەڤ كۆچكرنێ ڤە دچت.
دپەیڤا خۆ یا دووماهیێ دا بێبانی دیاركر،ژهەموو خەلكێ كوردستانێ و لایەنێن سیاسی دخوازم كوردستان بێتە پاراستن و نە بتە جهێ سەرزێدەكرنا سیاسی،چنكو كوردستان د كاودانێن گەلەك خرابدایە و هە رچار ئالێن مە دوژمنن و دڤێن رەوشا كوردستانێ تێك بدەن ،لەوما دڤی كاودانی دا ئەم پێتڤی سەرۆكەكی وەكی بارزانینە و بتنێ ئەو دەرد و داخوازیێن ڤی مللەتی دزانت و ب تایبەتی یێن كوردێن ئێزدی.
تُتاح هذه الصورة أيضا في: کوردی
