هێشتا تراژیدیا جینۆسایدا ئێزدیان یا بەردەوامە
تۆرا لالش:
هەشت سال بسەر جینۆسایدا ئێزدیان ل سەر دەستێ رێكخراوا داعش یا تیرۆری دەرباز دبن و هێشتا تراژیدی یا بەردەوامە،هەڤدەم دگەل ڤێ بیرەوەریێ ئاوارەیێن شنگالێ داخواز دكن گرتیێن ماین بێنە رزگاركرن و زیانڤێكەفتی بێنە قەرەبووكرن و دەست ب ئاڤەدانكرنا دەڤەرێن وان بێتە كرن.
ناجی حجی،ئاوارەیەكێ شنگالێ یە ل كەمپا چەمشكۆ بۆ دەنگێ لالش دیاركر،ل رۆژا 3 /8 /2014 رێكخراوا داعش یا تیرۆری هێرشی سەر دەڤەرا شنگالێ كر ب شێوەیەكی درندانە و دوور ژ كریارێن مرۆڤایەتیێ مەزنترین تاوان ل دژی ئێزدیان ئەنجام دان،ب هەزاران كچ و ژن و زارۆك گرتن و ل بازاران كرین و فرۆتن ب وان هاتە كرن و ب سەدان كەس بوونە قوربانی و ب دەستێن وان هۆڤا هاتنە كوشتن و ب هەزارێن خەلكێ شنگالێ ئاوارە و كۆچبەر بوون،بێگۆمان ئەوا ب سەرێ مللەتێ ئێزدی دا هاتی ژ ئەگەرێ ناسناما وان یا كوردایەتیێ بوو و پێگیریا وان یا مكوم بوو ب بیر و باوەریێن باب و كالێن وان و پاراستنا ئۆل و ئەركانان،ئەڤە هەشت ساڵ دەربازبوون لێ ب مخابنی ڤە هەتا ئیرۆ رۆژ ب سەدان گرتیێن ئێزدی وندامان و نەهاتنە رزگاركرن،داخوازێ ژ حكومەتا عێراقێ و لایەنێن پەیوەندیدار یێن نێڤ دەولەتی دكەین ئەڤ روودانا كۆمكوژیا ئێزدیا ب جینۆساید بێتە ناسكرن و قەرەبوویا زیان ڤێكەفتیان بێتەكرن.
هەروەسا سەعید ئەلیاس،ئەو ژی ئاوارەیەكێ شنگالێ یەل كەمپا بێرسڤێ بۆ دەنگێ لالش دبێژت:هەشت سال بسەر جینۆسایدا ئێزدیان دا بۆرین و هەتا نۆكە پاشەڕۆژا خەلكێ شنگالێ نەیا دیارە، هەشت سال دەربازبوون هەتا ئیرۆ ب هەزارێن كەسان ژ خەلكێ مە ئاوارەنە ل كەمپێن پارێزگەها دهۆكێ و د رەوشەكا خراب و پەریشان و ب زەحمەت دا دژین،ل ڤان سالێن بۆری دا ب دەهان روودانێن شەوتاندنێ ل ناڤ كەمپێن ئاواران دا چێبووینە و چەندین جاران داخواز كرینە چارەسەریەك بێتە دیتن لێ زنجیرێن شەوتاندنێ د بەردەوامن،ژلایەكێ دی ڤە هەتا نهۆ شنگال باژێرەكێ وێرانە و بوویە جیێ ململانا سیاسی و حكومەت یا بێ دەنگە ل سەر ئاڤاكرنا شنگالێ،هەروەسا هندەك كەس ژی ئەڤێ كارەساتێ بۆ مەرەمێن خۆ یێن سیاسی و بەرژەوەندیێن خۆ یێن تایبەت ب كاردئینن،ئەڤ چەندە بوویە ئەگەرێ وێ چەندێ كو گەلەك گەنج و خێزانێن ئێزدی بۆ دەرڤەی وەلاتی كۆچبەر ببن، ئەم داخوازێ ژ وەلاتێن جیهانێ و جیێن پەیوەندیدار دكەین كو ئەڤا ب سەرێ ئێزدیان دا هاتی بێتە ناسكرن وەك جینۆساید ئانكو دان پێدان ب كۆمكوژیا ئێزدیان بێتەكرن.
ژلایەكێ دی ڤە بال سەمیرە سەعید،ئاوارەیەكا شنگالێ یە بۆ دەنگێ لالش گۆت:پێتڤیە بزاڤ بێنە كرن گرتیێن د دەستێ تیرۆرستێن داعشێ دا بێنە رزگاركرن و هەردوو حكومەتێن هەرێمێ و بەغدا بگەهنە رێككەفتنەكێ بۆ ئاڤەدانكرنا شنگالێ و ئیدارا وی باژاری د دەستێ خەلكێ وی ب خۆ دا بت،داخوازێ ژ كۆمەلگەها نێڤ دەولەتی و سەرجەم رێكخراوێن سڤیل و مافێ مرۆڤی و حكومەتا عێراقێ و حكومەتا كوردستانێ دكەین ب رژدی هەولێن خۆ بۆ رزگاركرنا ئێخسیرین ماین یێن د دەستێن تیرۆرستێن بێ وژدان دا بكن و مافێ قوربانیێن ئەڤێ كۆمكوژیا رۆژا ڕەش وندا نەكن و ئەوا ب سەرێ ئێزدیێن شنگالێ دا هاتی ب گشتی وەك جینۆساید بدەنە زانین و ناسانكرن و خەلكێ دەڤەرێ بێنە قەرەبووكرن و جی و وارێن مە بێنە ئاڤەدانكرن.
ژبال خۆڤە هادی دەخیل،ئاوارەیەكێ دی یێ خەلكێ شنگالێ یە بۆ دەنگێ لالش دیاركر،ستەم و زۆرداری و گرتن و كوشتن و رەڤاندن و ئاوارەبوون و ژیانا سەخت و دژوارا بن خیڤەتان و بەردەوامیا زنجیرێن شەوتینا خیڤەتان و بەردەوامیا كۆچبەربوونێ و پشتگۆه هاڤێتنا شنگالێ و دەڤەرێن ئێزدیا ژلایێ حكومەتا عێراقێ ڤە و نەبوونا ئێمناهی و ئاسایش و ئارامیێ ل شنگالێ و نەبوونا خزمەتگۆزاریان و زێدەبوونا ئێش و ئازارێن ل ناڤ كەمپان دا،ئەڤ چەندە هەتا نۆكە یا بەردەوامە،پشتی بۆرینا هەشت سالان ب سەر جینۆسایدا ئێزدیان ل سەر دەستێ ڕێكخراوا داعش یا تیرۆری چ تشت نەهاتیە گهۆرین،مللەتێ ئێزدێ تووشی كۆمكوژیەكا مەزن بوویە و جیهانێ هەموویێ ب چاڤێن خۆ دیتیە كو كۆمكوژیێن ب كۆم ل شنگالێ هاتینە ئەنجامدان،ئەڤ چەندە بەرپەرەكێ رەشە د مێژوویا مرۆڤایەتیێ دا ل سەر ئاستێ جیهانێ و هێشتا تراژیدی یا بەردەوامە،چنكو هێشتا چ تشت نەهاتینە گهۆرین،خەلكێ مە چاڤەرێ یە ئەڤ فەرمانە ببتە جینۆساید و مافێ ئێزدیان ب دەنێ داكو ئێزدی ژ كۆمكوژیان بێنە پاراستن.
تُتاح هذه الصورة أيضا في: کوردی
