بنگەهێ لالش بەرهەمەكێ نوو یێ هۆنەری دێ بەلاڤ كت
سه‌ما:
ب سپۆسنەریا دەستەیا بلندا بنگەهێ لالش یێ رەوشەنبیری و جڤاكی ل دهۆكێ،كار لسەر چێكرنا بەرهەمەكێ نوو یێ هۆنەری لدۆر جەژنا چارشەمبا سەرێ سالا ئێزدیان دئێتە كرن،بەریا جەژنێ ئەڤ كلیپ ئێتە بەلاڤكرن.
جەعفەر سمۆ،دەرهێنەرێ كلیپ و سروودا (ئۆلا من) بۆ كه‌نالێ(سه‌ما)دياركر:”پشتی كو ئێك ژ سترانبێژین ناڤدارێن كورد ل دەرڤەی وەلاتی ئەلند دۆسكی قەستا هەرێما كوردستانێ كری بۆ هندێ خزمەتا ئێزدیان بكت ب رێیا كلیپەكێ یان ژی وەكو سروودەكا ئایینی لسەر جەژنا چارشەمبا سەرێ سالا ئێزدیان،داخواز ژ مە كر وەكو بنگەهێ لالش سپۆنسەریا ڤێ سروودا ئایینی یان ژی ڤێ كلیپێ ب ستۆیێ خۆ ڤە بگرین،پشتی مە بەرێ خۆ دایە ناڤەرۆكا وێ یا پر هێژا بوو كو دەربرین ژ رێورەسمێن سەرسالێ ب شێوەكی جوان كریە دڤی تێكستی یان دڤێ هەلبەستا خۆ دا،كو بەحسێ هندێ دكت كا چاوا ئێزدی ئاینەكێ گەلەكی كەڤن و دێرینە كو بنەكوكا مللەتێ كورد ئێزدینە و بەحسێ میتۆلۆژیا ئێزدیا كریە درێیا ڤی تێكستێ ب رێك و پێك”.
هەروەسا دیاركر:”مە دیت كو گەلەكا گرنگە ئەم سپۆنسەریا ڤێ كلیپێ یان سروودا ئایینی بكەین،پشتی مە تێكست رادەستی جەنابێ شێخ شامۆ سەرۆكێ دەستەیا بلندا بنگەهێ لالش كری ئێكسەر رازەمەندی لسەر دا، بۆ هندێ ئەم وەكو راگەهاندنا بنگەهێ لالش ب ئەركێ دەرهێنانا وێ و بەرهەمێ وێ رابن و ئەز و دەرهێنەر مازن ئێسیانی ب كارێ دەرهێنانێ رابووینە”.
زێده‌تر گۆت:”نڤیسینا تێكستێ ڤێ كلیپێ ژئالیێ رەشۆ عەیشانا ڤە بوویە گەنجەكێ ئێزدی یە ل دەرڤەی وەلاتی،ئەم دبینن دێ ئێك ژ باشترین بەرهەمێن هۆنەری بت لدۆر جەژنا سەرێ سالێ”.
تُتاح هذه الصورة أيضا في: کوردی
