شێخ شامۆ: دەست نیشانكرنا رۆژا جینۆسایدا ئێزدیان ژلایێ پەرلەمانێ كوردستانێ ڤە رۆژەكا دیرۆكی بوو
تۆرا لالش یا راگەهاندنێ/دهۆك
سەرۆكێ دەستەیا بلندا بنگەهێ لالش یێ رەوشەنبیری و كۆمەلایەتی ل دهۆكێ راگەهاند،ئێزدیا ئۆمێدەكا مەزن ب حكومەتا هەرێما كوردستانێ هەیە و ئەم دوێ باوەریێ دانە دێ رۆلەكێ باش دەنە ئێزدیان دكابینەیا نوو یا حكومەتا هەرێمێ دا،ئاماژەكر ژی دەست نیشانكرنا رۆژا جینۆسایدا ئێزدیان ژلایێ پەرلەمانێ كوردستانێ ڤە رۆژەكا دیرۆكی بوو.
دوهی رۆژا پێنج شەمبوویێ(26ی ئەیلولا2019ێ كۆمبوونا ئاسایی یا دەستەیا بلندا بنگەهێ لالش ب سەرۆكاتیا بەرێز”شێخ شامۆ”سەرۆكێ بنگەهێ لالش و ئامادەبوونا ئەندامێن دەستەیا بلند و بەرپرسێن تایێن بنگەهێ لالش هاتە ئەنجام دان و بەحسێ چەندین تەوەران هاتە كرن،ژوان ژی بەحسێ رەوشا كوردستانێ ب گشتی هاتە كرن.
دكۆمبوونێ دا سەرۆكێ بنگەهێ لالش دووپاتكر”كو مە ئۆمێدەكا مەزن ب حكومەتا هەرێما كوردستانێ هەیە،ئەم دوێ باوەریێ دانە دێ رۆلەكێ باش دەنە ئێزدیان دكابینەیا نوو یا حكومەتا هەرێمێ دا”.
دتەوەرەكی دی یێ كۆمبوونێ دا شێخی بەحسێ هەلبژارتنا حازم تەحسین بەگ كر وەك میرێ ئێزدیان و پشتەڤانیا بنگەهێ لالش بۆ سەرخستنا میر و جڤاتا رۆحانی و مالباتا میری دووپاتكر،چنكو ئەركێ سەرەكی یێ بنگەهێ لالش ئەوە خزمەتا میر و جڤاتا رۆحانی بكت.
هەر دكۆمبوونێ دا سەرۆكێ بنگەهێ لالش دیاركر” بریارا داویێ یا پەرلەمانێ كوردستانێ سەبارەت دەست نیشانكرنا رۆژا جینۆسایدا ئێزدیان بریارەكا دیرۆكی بوو پەرلەمانێ كوردستانێ ئەڤ پێنگاڤە هاڤێتی ئەڤ رۆژە وێ بێت ل قەلەم دان وەكو رۆژا جینۆسایدا ئێزدیان،ئەڤ پێنگاڤا پەرلەمانی هاڤێتی ب راستی ژی نیشانا دلسۆزیا وانە بەرامبەر ئێزدیان”.
هەروەسا سەرۆكێ بنگەهێ لالش پیرۆزباهی ل هەموو قوتابیان كر ب هەلكەفتا دەستپێكرنا سالا نوو یا خووندنێ و ڤەكرنا دەرگەهێ قوتابخانان،و پشتەڤانیا بنگەهێ لالش بۆ تەڤ قوتابیان و ب تایبەت قوتابیێن ئێزدی دووپاتكر و داخوازا سەركەفتنێ بۆ پرۆسێسا وان یا خووندنێ كر.
ژلایەكی دی ڤە شێخی بەحسێ پەرتۆكێن ئێزدیاتیێ ل قوتابخانان كر دووپاتكر كو گەلەك گازندە لسەر كێمیا وان هەنە،مە بزاڤ كرینە لگەل وەزارەتا پەروەردێ كو ئیسالە دەست ب چاپا وان بێتە كرن.
شێخی ئاماژەكر كو ئەڤ كۆمبوونە هەڤدەمە دگەل سالیادا دووێ یا ریفراندۆما سەربەخۆبوونا كوردستانێ و لسەرجەم خەلكێ كوردستانێ پیرۆزكر،كو ئەڤە بەلگەیەكا مێژوویی یە د دەستێ مللەتێ كورد دا بۆ هندێ كو ئەڤ رۆژا مللەتێ كورد وەسا خواستی كو بتری(92%)ژ خەلكێ كوردستانێ خواستی سەربەخۆ ببن،دووپاتكر ژی كو ئێزدیا مل ب ملێ پێكهاتێن كوردستانێ ڤە بتریا هەر پێكهاتەكی پشتەڤانیا پرۆسێسا ریفراندۆمێ كرن.
ل داویا كۆمبوونێ گەنگەشە دناڤبەرا ئەندامێن دەستەیا بلند و بەرپرسێن تایێن بنگەهێ لالش لسەر گرنگترین كار و چالاكیێن بنگەهێ لالش هاتە كرن.
تُتاح هذه الصورة أيضا في: کوردی
