كێم ئەندامێن ئێزدی ل كەمپان پێتڤی ب هاریكاریێ نە
تۆرا لالش یا راگەهاندنێ
كێم ئەندامێن ئێزدی یێن ئاوارێن شنگالێ ل كەمپان و خیڤەتان ل سنوورێ پارێزگەها دهۆكێ درەوشەكا گەلەك یا خرابدا دژین و چ چاڤدان و گرنگیدانەكا تایبەت ب وان نەهاتیە دان،ئەو دخوازن پێتڤیێن كێم ئەندامیێ و هاریكاری بۆ بێنە دابینكرن و خۆلێن تایبەت ل بوارێن جوداجودا بۆ بێنە ڤەكرن داكو ڤەگەرنە ژیانا سرووشتی ڤە.
(حسێن عە‌لی)ئێك ژ كێم ئەندامێن ئاوارێن شنگالێ یە ل كەمپەكا سنوورێ پارێزگەها دهۆكێ دژیت بۆ رۆژناما دەنگێ لالش دیاركر،ژیان بۆ هەموویان ل كەمپان دا یا ب زەحمەتە،هندەك لایەن و رێكخراو هەنە ل رەوشا تێرا دەرباز دبین دپرسن بەلێ پرسكرن بتنێ نینە و پێتڤی ب هاریكاریێ نە،هندەك كێم ئەندام هاریكاریان وەردگرن و هندەك ژێ بێ بەهر دمینن،ئەم دخوازن كورسیك و دار و تەوالێت یێن بۆ حالەتێ مە دگونجای ل كەمپان بێنە دابینكرن،زێدەباری هەر پێتڤیەكا دی بكارن هاتن و چۆنێ بكن و هاریكاریێن ماددی و پشتەڤانیا دەروونی،سەرباری ڤێ رەوشا نەخۆشا تێدا دژین خەلك هەنە ب چاڤەكی كێم بەرێ خۆ ددەنە مە و لاواز دبینن و هندەك ژی یاریا ب مە دكن،ئەڤ چەندە حالێ مە یێ دەروونی بتر تێكددەت و پێ دئێشین،هەروەسا داخوازێ دكەین خۆلێن راهێنانێ یێن تایبەت د بوارێن جودا جودا بۆ كێم ئەندامان بێنە ڤەكرن و دكارن ببنە خودان بەهرە و پیشە و شیانێن كاركرنێ ل هەر بوارەكی دا هەنە بكن.
لدۆر رەوشا كێم ئەندامێن ئاوارە ل كەمپان دا نوونەرێ رێكخراوا مافێن مرۆڤی تایێ فرانكفۆرت ل هەرێما كوردستانێ(خەلیل قاسم بۆزانی) بۆ رۆژناما دەنگێ لالش گۆت:رەوشا كێم ئەنداما ل كەمپان و ژینگەها تێدا دژین گەلەك یا خرابە كو چ گوهلێكرن و گرنگیدانەكا تایبەت ب وان نەهاتیە دان،ئەم وەكو رێكخراو هەول ددەین هاریكاریا وان بكەین ل پێ شیانێن خۆ لێ ئەو پێتڤی پشتەڤانیەكا مەزنترن ژلایێ رێكخراوان ڤە،ژبەركو تەخەكا پشتگوه هاڤێتێ نە ژلایێ هەموویان ڤە، ئەڤ كەسێن ژبەر كێمیەكا جەستەیی یان مێشكی و هەر حالەتەكی دیتر پایا خۆ هەیە ل هەر جارەكا هاریكاریان بەلاڤ دكەین ب رێیا گرۆپا یان هندەك كەسێن خۆبەخش ل كەمپان دا كاردكن و كێم ئەندامان دەستنیشان دكن،هەروەسا ڤێ تەخێ جیێ خۆ دپلانێن مە یێن پاشەرۆژێ دا هەیە و هەكە چاڤدێری ل وان هاتە كرن و خۆل بۆ هاتنە ڤەكرن هندەكا ژ وان شیانێن كو نە كێمی شیانێن كەسێن سروشتی هەنە و دكارن كاربكن و هندەكا هەڤركی لگەل بارودۆخان كر و ل خووندنێ دا دبەردەوام بوون هەتا كو دەرچۆین،ئەڤ مەزنترین بەلگەیە لسەر رژدیا وان لسەر كاركرنێ و ب ڤەكرنا خۆلێن فێركرنێ وەك فێركرنا ئامیرێن موزیكێ و شوفێریێ و وێنەكێشانێ دبت هندەك بەهرەیێن باش ژێ دەربكەڤن و خزمەتێ بكن.
ل كەمپێن ئاوارێن شنگالێ و خیڤەتان دا ب دەهان كەسێن كێم ئەندام ب حالەتێن جودا جودا هەنە،ئەو دخوازن لایەنێن پەیوەندیدار بتر چاڤدانێ ل رەوشا وان بكن و دەستێ هاریكاریێ بۆ درێژ بكن.
تُتاح هذه الصورة أيضا في: کوردی
