وەلاتیێن شنگال: ژبەر نەبوونا ئێمنيێ نازڤرينه شنگال
باسنيوز:
هاوەلاتیێن قەزا شنگال دبێژن حكمێ سەربازی ل شنگال دهێتە رێڤەبرن، چو حكم دەستێ حكومەتێ دا نینە. ئەم نەشێن ژبەر نەبوونا ئاسایشێ بزڤرینە شنگال”.
ئێك ژ هاوەلاتیێن شنگال بناڤێ (خەلیل شڤان) بۆ (باسنیوز) دیار كر: “ژبەر نەبوونا ئاسایش ئەم وەكو خەلكێ شنگال نەشێن ڤەگەرن. ئەم چاڤەرێ بوون ئیدارا شەرعی یا شنگال بزڤرتە شنگال وپرۆژە بهێنە ئەنجامدان وئاسایش دەڤەرێ پەیدا بیت. ئەم ژی بزڤرینە سەر مالێن خوە لێ حەشدا شەعبی و گرۆپێن چەكدار ل شنگال نەهێلان. وان نەڤێت ئاسایش ل شنگال دروست بیت و خەلك ڤەگەرن. نۆكە ژیانا خێڤەت ودناڤ ئاڤاهێن هەیكەل دا بۆ مە گەلەك خوشترە ژ شنگال چونكو ئاسایش یا كەمپان هەی. ئەم پاراستی نە، ل شنگال كەس نینە پاراستنا گیانێ وەلاتیان بكەت”.
زێدەتر گۆت: “نۆكە حكمێ ل شنگال دهێتە رێڤەبرن هەموو دەستێ حەشدا شەعبی دایە. چو قانوون ل شنگال نینە خەلك پشتا خوە پێ گەرم بكەن. دڤێ رەوشا نۆكە دا كەس نەشێت بزڤرتە شنگال”.
هاوەلاتی (بەكر حیدەر) خەلكێ ناحیا گرعزێر ل شنگال ونۆكە ل كەمپا شاریا ئاكنجیی یە، بۆ (باسنیوز) دیار كر: “ژبەر نەبوونا ئاسایشێ وخزمەتگوزاریان ئەم نەشێن ڤەگەرن. نۆكە دەڤەرێن مە مێنرێژكرینە، كی دێ خۆ ل مە كەت خۆدان. هەكە ڤەگەرن كەس خوە ل مە ناكەتە خۆدان. ئەم نەشێن ڤەگەرن. باوەری ژی نینە ژبەر عەرەبان چونكو ئەو عەرەب نێزیكی مەنە ئەم نەشێن جارەكا دی ئاشتی و برایەتیێ پێكڤە بژین. چونكو وان خیانەت ل خەلكێ شنگال كرن. پێدڤیە ئەو بهێنە سزادان وئاسایش بۆ شنگال ڤەگەرت ودەڤەر ژ مین وتەقەمەنیان بهێـتە پاقژكرن هەتا ئەڤە نەهێتە كرن خەلك نكارن ڤەگەرن”.
هاوەلاتیەكی دی خەلكێ گوندی حەردان ل قەزا شنگالێ نەخواست ناڤێ خوە ئاشكرا بكەت بۆ (باسنیوز) دیار كر: “ئەمن وئاسایش شنگال نینە ئەم وەسا دبینن پاشەرۆژا ئیزدیان دی وەكو پاژەرۆژا جوهیان لێ هێت دناڤ عێراقی دا، چونكو حكومەتا عێراقی خوە ل ئیزدیان ناكەتە خۆدان رۆژ دووڤ رۆژێ رەوشا شنگال خرابتر دبیت”.
وەیس نایف سەرۆكێ جڤاتا قەزا شنگال بۆ (باسنیوز) دیار كر: “ئەم هەولێن بەردەوام داینە بۆ زڤرینا ئیدارا شەرعی یا شنگال داكو رەوشا شنگال ئارام بیت وئاسایش پەیدا بیت و خەلك بزڤرنە شەر جه و مالێن خوە. هەتا نۆكە ژی گەلەك ئاستەنگ هەنە وهێشتا رێك ب زڤرینا ئیدارێ نەهاتیە دان. ئەم چاڤەرێنە حكومەتا عیراقی ڤی كیشەیی چارەسەربكەت وئاسایش ڤەگەریتە شنگال”.
تُتاح هذه الصورة أيضا في: کوردی
