پێنج ئەندامێن خێزانەكا ئاوارەیا شنگالێ ل كەمپا بێرسڤێ تووشی نەخۆشیا هیمۆفیلیا بووینە
تۆرا لالش یا راگەهاندنێ/لەیت حسێن
ل كەمپا بێرسڤێ2،پێنج ئەندامێن خێزانەكا ئاوارەیا شنگالێ تووشی نەخۆشیا هیمۆفیلیا بووینە و پر نەساخن ،ئەڤ نەخۆشیە پتر ئازارێ دگەهینتێ و لەشێ وان دوەرمت و گەلەك جاران ژ هێڤاری هەتا سبەیكێ نانڤن و ماوێ شەش هەیڤایە دەرزیك وەرنەگرتینە.
(بەرەكات حەسەن فارس) سەمیانێ ڤێ خێزانێ یە دبێژت:پێنج ئەندام ژ خێزانا من تووشی نەخۆشیا (هیمۆفیلیا) ئانكو خوون بەربوونێ بووینە وئەڤە نێزیكی شەش هەیڤانە دەرزیكێن وێ وەرنەگرتینە،لەوما نەخۆشیا وان پتر ئازارێ پێ دبەت.
هەروەسا(حەجی بەرەكات)یێ (19) سالی ئێك ژ نەخۆشێن ڤێ خێزانێ دیاركر،هەر ژ دەما زارۆكبوونێ بڤێ نەخۆشیێ كەفتیمە دگەل سێ برا و دەیكا من ژی،ژبەركو ئەڤە نەخۆشی یا میراتگیری یە و ژ داپیرا مە پەیدابوویە و گەهشتیە دەیكا من و ژ وێ ژی گەهشتیە مە،ئەڤە نێزیكی شەش هەیڤایە چوو دەرزیكێن ڤێ نەخۆشیێ مە وەرنەگرتینە و ل سەرانسەری نەخۆشخانێن هەرێما كوردستانێ نەماینە،ئەڤ نەخۆشیە پتر ئازارێ دگەهینتە مە و لەشێ مە هەموو ژی دوەرمت و گەلەك جاران ب ئەگەرێ ڤێ نەخۆشیێ ئەم ژ هێڤاری هەتا سبەیكێ نانڤین و گۆت:((نێزیكی سالەكێ یە دەیكا من نێزیكی سێ ملیۆن دیناران ل جەم نۆژداران خەرج كریە و چ مفا لێ نەكریە،هەر جارەكا هەكە ئەم دەرمانكرن ژی ب هەر لێدانەكێ یان لڤینەكا ب هێز دووبارە ئەڤ نەساخی دزڤرتە ڤە و ئەو جیێ لڤلڤی دیسان دوەرمت)).
ژ بال خۆڤە رێڤەبەرێ كەمپا ناڤبری(ماهر مشۆ چولی)دیاركر،ل دووڤ شیانێن خۆ دێ ل خزمەتا وان كەسێن نەخۆش دا بین و هەر دەما ئەڤ جۆرە دەرزیك و دەرمان بۆ نەخۆشخانێن هەرێمێ بێنە رەوانەكرن ب هەماهەنگی دگەل سەرۆكاتیا نەخۆشخانا زاخۆ یا گشتی،ئەم دێ كارن ب رێیا چێكرنا پەسەندەكێ ئانكو بەلگەنامەیەكێ بۆ وان نەساخێن كو نەخۆشیێن وان دۆمدرێژ خزمەتا وان بكن كو بكارن ب شێوەیەكی ئاسان وبێ ئاستەنگ پشكا خۆ یا دەرزیكان یان دەرمانێن ڤێ نەخۆشیێ وەربگرن ژ سەنتەرەكی تایبەت بۆ وان نەساخان یێن كو ئەڤ نەخۆشیێن وەسان هەین،ئەڤ سەنتەرە راستەراست یێ بسەر نەخۆشخانا زاخۆ یا گشتی ڤەیە وەكو پێتڤی هاریكاریا وان نەساخان دكت و ئاسانیێ بۆ وان كەسان دكت یێن مە هنارتین جەم وان بۆ وەرگرتنا پێتڤیێن خۆ یێن وێ نەخۆشیێ وەكو (دەرمان و دەرزیكان).
تُتاح هذه الصورة أيضا في: کوردی
