حسێن قائیدی: رزگاركرنا 138 كەسێن ئێزدی ژ لایێ هێزا سووریا دیموکرات ڤە راست نینە
باسنيوز:
رێڤەبەرێ نڤیسینگەها رزگاركرنا رەڤاندیێن ئێزدی، دیاركر “چوو راستی بۆ رزگاركرنا 138 كەسین ئێزدی ژلایێ هێزا سووریا دیموكرات ڤە نینە. ئەم داخازێ دكەین لایەنێن سیاسی یاریا ب هەستێن كوردێن ئێزدی نەكەن”.
حسێن قائێدی، رێڤەبەرێ نڤیسینگەها رزگاركرنا رەڤاندیێن ئێزدی، بۆ (باسنیوز) دیاركر” هندەك لایەنێن سیاسی ل سووریا گوتگوتەك بەلاڤكرینە كو وان 138 كەسین ئێزدی ل ڤان رۆژان ژ دەستێن تیرۆرستان رزگاركرینە ژ وەلاتی سوریا، ژوانا ژی 64 زارۆكن و 70 ژنن و 4 زەلام. ئەڤە خەبەر یێ دوورە ژ راستیێ. پشتی مە گەلەك دوڤچوون ل سەر كری وەسا دەركەڤت چوو راستی بۆ رزگاركرنا 138 كەسین ئێزدی نینە ژلایێ وان هێزان وگرۆپێن ل سووریا”.
خویا ژی كر: “هەتا نۆكە چوو لایەنان پشتەڤانیا كوردێن ئێزدی نەكریە بۆ رزگاركرنا رەڤاندیێن ئێزدی بتنێ نڤیسینگەها بەرێز نیچیرڤان بارزانی راستەوخۆ پشتەڤانیی دكەت بۆ رزگاركرنا رەڤاندیێن ئێزدی هەتا نۆكە پتر 2950 كەسان رزگاركرینە وبەردەوام ژی رزگار دكەت”.
حسێن قائیدی، گۆت: “مخابن هندەك كەس و لایەنێن سیاسی بازرگانیێ ب كەیسا رەڤاندیێن ئێزدی دكەن بۆ مەرەمین خوە سیاسی. ئەڤە جهێ شەرمەزاریە، ئەم داخازێ دكەین ئێدی ئەو یاریا ب هەستێن خەلكێ مە نەكەن”.
تُتاح هذه الصورة أيضا في: کوردی
