ل پەرلەمانا بریتانیا سیمینارەک ل سەر جینۆسایدا ئێزدیان برێڤە دچیت
تۆرا لالش يا راگه‌هاندنێ
بریارە سوبەهی ٨ێ تەموزا ٢٠١٦ێ، ل پەرلەمانا بریتانیا سیمینارەک ل سەر ب جینۆساید ناساندنا کەیسا ئێزدیان بهێتە ئەنجامدان ئان کو برێڤە بچیت.
ئێڤار ئیبراهیم سەرۆکا لژنا ژنان ل پەرلەمانا کوردستانێ ب دیجیتاڵ میدیایا ئێن ئاڕ تی راگەهاند، سوبەهی سازیا “کوردیش پرۆگرێس” ب هاریکاریا رەڤەندا کوردی دێ ل ناڤ ئاڤاهیێ پەرلەمانا بریتانیا سیمینارەکێ ئەنجامدەت ل سەر کەیسا ئێزدیان و ب جینۆساید ناساندنا وێ کەیسێ ب ئاوایەکێ گشتی”.
ئێڤار ئەو چەند ژی گۆت “ئەو سیمینار ژلایێ وێ و سێ پەرلەمانتارێن بریتانیا دهێتە سەرپەرشتیکرن و بریارە تێدا چەند دۆکیۆمێنت و بەلگەهەک ل سەر توندوتیژیا داعش ل هەمبەر کچ و ژنێن ئێزدی بهێنە پێشکێشکرن.
ئەو چەند ژی گۆت، وەکی چاوا بەرێ کەیسا ب جینۆساید ناساندنا ئێزدیان بریە دادگەها لاهای، بولگاریا، هۆلەندا و ئەڵمانیا و چەندین جهێن دی، دخازن سوبەهی ژی ل پەرلەمانا بریتانیا ب رێیا چەندین دۆکیۆمێنت و بەلگەیان بەحسا ڤێ مژارێ بکەن.
ئاماژە ب وێ ئێکێ ژی کر، ئەو دخازن ب ڤێ رێیێ هەولدەن بۆ دیتنا رێچارەیەکێ بۆ رزگارکرنا ئەو کچ و ژنێن کو هەتا نها ژی د بن دەستێ داعشێ دانە، هەڤدەم بۆ هاریکاریکرنا وان ژی یێن کو د نهادا رزگاربوونە و هەتا نهاژی باندۆریا توندوتیژیا داعشێ ل سەر وان مایە.
لگۆری نووترین ئامارێ کو ئێڤار ئیبراهیم-ێ بۆ دیجیتاڵ میدیایا ئێن ئاڕ تی فرێکریە، هەتا نها دوو هزار و ٣٦٤ ئێزدی ژ دەستێ داعشێ رزگاربوونە کو ژ ٨٧٦ ژن، ٣١٨ زەڵام، ٥٧٢ کچ و ٥٩٨ کوڕان پێکهاتینە.
هەر لگۆری وێ ئامارێ، هەتا نهاژی هزار و ٧٨٨ ژن و هزار و ٧٣٥ زەڵام د بن دەستێ داعشێ دا مانە.
ئەڤەژی د دەمەکیدایە رۆژا ١٦ێ حوزەیرانا ٢٠١٦ێ، ڤەکۆلەرێن سازیا نەتەوێن ئێکگرتی راگەهاندن، سازیا داعشێ هەول دایە ب رێیا جینۆسایدا ئێزدیان ئایینی ٤٠٠ هزار کەسان ژناڤ ببەت.
چەکدارێن داعشێ پشتی کونترۆلکرنا موسلێ د ٣ێ ئابا ٢٠١٤ێ دا هێرش کرنە سەر شنگالێ و چەندین وەلاتیێن ئێزدی کۆمکوژکرن، زێدەتر ژ پێنج هزار وەلاتیێن دی ڕەڤاندن، کو پڕانیا وان ژن و زارۆکن.
گەلەک توندوتیژی ل هەمبەر وان وەلاتیێن ئێزدی هاتە کرن کو ژلایێ داعشێ ڤە هاتنە ڕەڤاندن و د بازاران دا بازرگانی پێ دکر، هەڤدەم هێرشا چەکدارێن داعشێ بۆ سەر شنگالێ بوویە سەدەمێ ئاوارەبوونا زێدەتر ژ ٤٠٠ هزار ئێزدیان.
تُتاح هذه الصورة أيضا في: کوردی
