خۆبەخشان رۆلەكێ كاریگەر د كارەساتا شنگالێ دا هەبوویە 
دەنگێ لالش،سالار فائز
پشتی كارەساتا ب سەرێ خەلكێ شنگالێ دا هاتی و ئاوارەبوونا خەلكێ وێ ب تایبەت بۆ دەڤەرێن هەرێما كوردستانێ،چینێن جودایێن كوردستانێ ب گشتی و ئێزدیان ب تایبەتی وەك خۆبەخشانە دبیاڤێن جودا جودا وەك پێشمەرگەی شەرێ تیرۆرستێن داعشێ كرن و بەرەڤانی ژئاخا كوردستانێ كرن و خۆ ل لێقەومیان كرنە خودان و هاریكاری پێشكێشی وانكرن و رۆلەكێ كاریگەرهەبوون،هەتا كو ل كەمپان و چەند جهێن دی هاتینە بنەجهكرن.
چالاكڤانا سڤیل،گولیستان حەسەن دیاركر:”بۆ خەلكێ خۆ ل كوردستانێ و توركیا من ب خۆ خۆبەخش ل كەمپا وەك هاریكاریا پزیشكی ل دەرمانخانا كاركریە،نۆكە ژی ل ئەلمانیا بزاڤان دكەم خۆبەخش كاربكەم و ئارمانجا من یا سەرەكی پەیداكرنا خۆشیەكێ یە بۆ زارۆكا و پاراستنا مافێ ئافرەتێ یە،دیسان من چەند هەوێت كۆمكرنا دراڤی و چەندین چالاكی ل چیایێ شنگالێ ئەنجامداینە،كەیف خۆشم ب ڤی كارێ پیرۆز”.
میدیاكار،دیار نەعمۆ خەتاریخویاكر:”ژ دەرڤەی وەلاتی زڤریم دا هاریكاریا خەلكێ خۆ بكەم و ل چیایێ شنگالێ وەك خۆبەخش من شەر كریە ل دژی داعشێ ،ل وی دەمی كو چ هێزێن فەرمی لێ نەمابوون و ژیانا مە دمەترسیێ دا بوو،مە ئەو هێزێن بەرخودانێ دامەزراندن هەتا خەلكێ مە هاتە ڤەگۆهاستن بۆ دەڤەرێن هەرێما كوردستانێ ،دیسان من رۆلەك لەیزت دگەهاندنا وان هاریكاریێن ژ ئەلمانیا بۆ چیایێ شنگالێ دهاتن وەك خوارن و ڤەخوارن و جلكا،سەبارەت هاریكاریێن دارایی یێن ئێزدیێن ل ئەوروپا گەلەك هاریكاری پێشكێشكرن،بەلێ ژ بەر ژمارا زۆر یا خەلكێ مە یێ شنگالێ و قەیرانا مەزن ژ هەموو ئالیاڤە هەر كێماسی دێ هەبن”.
چالاكڤان،پەیمان خێری گۆت:”پشتی كارەساتا ب سەرێ خەلكێ مە یێ شنگالێ دا هاتی،من بریار دا خووندنا خۆ ب سەكنینم و ماوەیەكێ درێژ مالا خۆ نەبینم ،ژپێخەمەت هاریكاریا ئاوارەیان بكەم و من لگەل رێكخراوەكا مرۆڤایەتی كاركر و هەتا نۆكە ژی بەردەوامم دگەل دا و پتریا ئەندامێن رێكخراوێ دخۆبەخشن و مە هاریكارییا ئاوارەیان كریە ژلایێ خێر و خێراتا و ساخلەمی و خووندنێ …هتد،هەرچەندە گازندە دێ هەبن بەلێ كارێ مە هەر دێ بەردەوام بت”.
ژبال خۆڤە ئەندامێ گرۆپێ بۆچۆنا جڤاكا ئێزدیا،دلشاد كۆپۆ دبێژت:”پشتی كارەساتا چیایێ شنگالێ ئەم كۆمەلەك ژ گەنجێن خۆبەخش،ل خانكێ مە زێرەڤانی كر ل سەر ئاڤا خانكێ هەتا سبێ هەر رۆژ ،چنكو ئالیێ دی یێ ئاڤێ ئەرەب بوون و مەترسی هەبوو،بەلێ پشتی پێنج رۆژان ئاوارەیێن شنگالێ گەهشتنە ناوچەیێن مە دەنگ و باس هاتن كو چەند خێزانێن شنگالێ وێ ل ئالیێ دی یێ ئاڤێ ماین ئەم كۆمەكا هەڤالێت خۆ ب سێ بەلەما چۆین و گەهشتینە وان ئاوارەیان نێزیكی هەفتی كەسان بوون و نێزیكی پێنج دەمژمێرا مە هەموو قوورتالكرن،هەروەسا مە وەك خۆبەخش نێزیكی دەه رۆژان ل چیایێ شنگالێ شەركر و خۆبەخشان ل كارەساتا شنگالێ دا رۆلەكێ كاریگەر هەبوویە”.
تُتاح هذه الصورة أيضا في: کوردی
