گۆرێن بكۆمێن شنگالێ دێ ئێنە هەلدان
تۆرا لالش یا راگەهاندنێ
رێڤەبەرێ راگەهاندنێ ل وەزارەتا شەهیدو ئەنفالكریان یا حكوومەتا هەرێما كوردستانێ رادگەهینت،بۆ هەلدانا گۆرێن ب كۆمەلێن شنگال جه هاتینە دەست نیشانكرن و پشتی ئیمزاكرنا رێككەفتنێ لگەل رێكخراوا (ICMT) دەست دێ ئێتە كرن ب هەلدانا گۆرێن ب كۆمەلێن سنوورێ قەزا شنگالێ.
فواد عوسمان،ب مالپەرێ فەرمیێ پارتی دیموكراتی كوردستان گۆت:”بۆ هەلدانا گۆرێن ب كۆمەلێن سنوورێ قەزا شنگالێ تیمێن مە وەكو لژنە سەرەدانا وان جهان كریە و مە جه دەست نیشانكریە و كرینە قۆناغ،قۆناغا ئێكێ ئەو جه دێ بن كو مەترسیا تیرۆرستێن داعشێ ل سەر نینە،ژوانە ژی دۆریانا حەردان كو بڕیارە دەست پێ بێتە كرن،نۆكە مە دڤێت لگەل ڕێكخراوا (ICMT)بگەهینە رێككەفتنكێ هەتا كو بكارین یاداشتەیەكا لێكتێگەهشتنێ ئیمزا بكەین دا ئەو ژی بەشدار ببن هەتاكو سیفەتا نێڤ دەولەتی زێدەتر پێ بێتە بەخشاندن كو بەریا نهۆ وێ رێكخراوێ خۆلەكا چەند رۆژی بۆ وان كارمەندان ڤەكریە كو بەشداری هەلدانا گۆرێن ب كۆمەل دكن،لەوا لگەل ئیمزاكرنا وێ یاداشتنامەیێ دەست ب هەلدانا گۆرێن ب كۆمەل دێ ئێتەكرن كو چاڤەرێینە ل ماوەیەكێ نێزیك دا ئەو یاداشتە بێتە ئیمزاكرن”.
فواد دبێژت ژی ئەو گۆرێن ب كۆمەل یێن هاتینە دەست نیشانكرن ژبلی ئەوێن هاتینە هەلدان كو سێ گۆرێن ب كۆمەلبوون ل قۆناغا ئێكێ ل دۆریانا حەردان دێ دەست پێ ئێتە كرن ،كو ل گۆر شایتحالان نێزیكی 10 گۆرێن ب كۆمەل هەینە ژمارەیەكا زۆرا خەلكی تێدا هاتینە شەهیدكرن و ماوەیەكێ زۆرە دەڤەر هاتیە ئازادكرن،ل ناڤ شنگالێ دا ژی چەند گۆرێن دیتر هاتینە دەست نیشانكرن،ئەڤە ژبلی ئەو گۆرێن كو دكەڤنە وان دەڤەرێ لژێر دەستێ تیرۆرستێن داعشێ دان.
تُتاح هذه الصورة أيضا في: کوردی
