تۆرا لالش
هیكا مریشكێ تایبەتمەندییا خوە هەیە ل جەم ئێزدیان، نەخاسمە ل جەژنا سەرێ سالا ئێزدیان كو دكەڤتە چارشەمبوویا ئێكێ ژ نیسانێ ل ڤێ جەژنێ دا ئێزدی گرنگیەكا تایبەت ددەنە هیكێ، چنكو د میتۆلۆژیا ئێزدیان دا هاتیە ل دەستپێكێ ئەرد هەموو ئاڤ بوو، پشتی هنگی دورەك (گەردیلە) یا هاتی ب ئەردی كەڤتی و ئەرد یێ پژقی و جەبری، ژ بەر ڤێ چەندێ ل جەژنا سەرێ سالێ دڤێت هیك بێتە كەلاندن پاشی بێتە رەنگ كرن.
كەلاندنا هیكێ رامانا جەبرینا ئەردی یە، وەك سەبەقا قەولی خویا دكەت:
هێڤێن هاڤێتە بەحرێ ، بەحر پێ مەیانی
دەخانەك ژێ دەر خوەنی
هەفت تەبەق عەرد و عەزمان پێ نژنی
هەروەسا دباوەریا ئێزدیان دا ئەرد ب شێوەیێ هیكێ یە (گویی)یە. وەك سەبەقا قەولی خۆیا دكەت:
دوڕا سۆر ب سەرانسەرە
هەریا ب گەرە و گرۆڤەرە
تژی ئاڤ و ئاخ و ئاگر و بەرە
هەروەسا ل جەژنا سەرێ سالێ ئێزدی جۆرا یاریەكێ دكەن دوو كەس هیكە ل هەڤ دان و دڤێت هیكە ئێك ژ وانە بشكێن، رامان شكاندنە هیكێ ئەوا
دەمێ دوڕ هاتی ب ئەردی كەڤتی ئەرد یێ بژقی. هەروەسا ل ڤێ جەژنێ جوتیار دێ هندەك ژ قەلكێن هیكە هاڤیتە ناڤ ئەردێ خوە دا خێر و بەرەكەت بكەڤتە دناڤ ئەردێ وی دا. هەروەسا دەمێ كەسەكی ئێزدی چتە بەر دلوڤانی یە خودێ هەكە ترب بێتە ڤەكرن بەری رۆژ بجیتە ئاڤا چ دەمێ شەڤێ مری ڤەشێرن دروستە و هەكە ترب بێتە ڤەكرن و مری نە ئێتە ڤەشارتن دڤێت هیكەكا ناڤ تربێ كەن شونا مری، چونكی دباوەریا ئێزدیاندا ژ هیكی روح پەیدادبیت واتە هیك روحە، و نابیت ترب ل سەر ناڤێ مری یا ڤەكری بیت و یا فالا بیت گونەها دئێزیاتیێ دە و هەتا ئیروشك ل ناڤ ئێزدیان دەمێ مری رۆژا شەمبوویێ گۆردكەن هیكەكێ دگەل مری د گۆری دكەن،چونكی شەمبوو یا ب زێدە بوونە وەك سەبەقا قەولی خویا دكەت :
ئینیێ دانا ئەساسە
شەمبویێ كر خلاسە
هەفت سەد سالە هەفت سۆر دوران و كاسە
تُتاح هذه الصورة أيضا في: کوردی
