ئازار 02, 2024

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

مەهدی حەسەن:جەژنا چلێ‌ زڤستانێ‌

جەژنا چلێ‌ زڤستانێ‌
‏‎مەهدی حەسەن
ئەڤ جەژنە دكەفتە رۆژا دوویی سوباتێ‌ ب هژمارا زایینی ،پشتی داوی هاتنا چلێ‌ زڤستانێ‌ كو ل ڤی چلەیی چلەگر و دەروێش و شكەستی وزانایێن ئۆلا ئێزدیان دگەل جڤاتا روحانی و هەر كەسەكی بڤێت ئەڤی چلێ زڤستانێ بو ماوێ (٤٠) رۆژی ب رۆژی دبن ژ (٢٤) هەیڤا كانوونا ئێكێ‌ دەست پێ‌ دكت وهەتا (٢) سوباتێ‌ ب هژمارا زایینی دبتە جەژن و ئەو كەسێ‌ چلێ‌ زڤستانێ‌ و چلەیێ‌ هاڤینێ‌ ب رۆژی دبت ، دبێژنێ‌ (چلەگر).
‏‎((‌ چلەگر ))ئەو کەسێ چلەیێ‌ زڤستانێ‌ و چلەیێ‌ هاڤینێ‌ ب رۆژی بن و بۆ ماوەیێ‌ بیست سالا هەر دوو چلەیێ‌ زڤستانێ‌ و هاڤینێ‌ ب رۆژی بن ژ نووكا دبێژنێ‌ چلەگر،ئانكو هەر كەسێ‌ ڤان رۆژیا بگرت نابتە چلەگر تەنها ئەو كەسێ‌ پێگیری رۆژی گرتنێ‌ بت بۆ ماوێ‌ (٢٠)سالا رۆژیێن چلەیێ‌ هاڤینێ‌ و زڤستانێ‌ ب رۆژێ بن دبێژنێ‌ چلەگر ….
‏‎ھەر وەکی ڤان سەبەقا ژ ئەدەبێ دینێ ئێزدیان دبێژت:
‏‎مەلەک فەخرەدین دنگ ھلتینە
‏‎ھنجیێ خاترا من تێ ببینە
‏‎دلێ چللە گرە نا ئیشینە .
‏‎چللە گر ب رۆژینە
‏‎فەرز ێن خۆ ب جی تینە
‏‎ئەون جندیێن سلتینە .
‏‎بشەڤ رۆژ ب رۆژینە
‏‎ئەوان فتار نینە
‏‎ئەو جندیێن سلتان ئێزینە .
‏‎وەك دیار ئەڤ جەژن و چلە ب دەمی ڤە یە گرێدایە ل ڤان چل رۆژێن سڕ و سەقایەكی زۆر سار ب رۆژی دبن ژ بۆ خودێ دوماھیکا رۆژیا دکەن جەژن ‌، هەر ئێزدیەكی هەی ڤێ‌ جەژنێ‌ ل ئێك و دوو پیرۆز دكن،نەخاسمە پتریا خەلكێ‌ دچنە جەژنا بابە شێخ و ل وێدەرێ‌ شریناهیەكێ‌ دخۆن و جەژنا وی پیرۆزدكن،هەروەسا لناڤ گوندیا ژی هەر كەسەكی چلە گرتی گوندی و كەس و كارێن وی دچنە مالا وی جەژنا وی پیرۆز دكن و دلخۆشیا خۆ دەردبڕن بۆ ڤێ‌ خێرا كری و كارێ‌ پیرۆز ئەنجام دایی ، بۆ بەرھەڤکرنا رێ و رەسمێن جەژنا چلەی ھەر سال بەری دەسپێکرنا جەژنێ ب دوو رۆژا د بیتە رێکەفتی ٣١/ ١ / ٢٠٠٤) ێ پشتی نیڤرۆ ئختیارێ مەر گەھێ و جۆقەتا وی و دەستەکا قەوالا و شکەستی و کۆچەک و خلمەتکار دێ بەرب گەلیێ لالشا نوورانی ڤە چن و ب حازر بوونا مەتبەخچیێ مالا شیخادی ژ بۆ گێرانا چەندین رێ و رەسمێن ئۆلی ل لالشێ بۆ ماوێ دوو رۆژا و رۆژا سێیێ عیدە ٢/٢ /٢٠٢٤ ێ وھەر بڤێ ھەلکەفتێ هندەك ژ مللەتی و ھەر کەسێ بڤێت دچنە لالش ،ژبەركو رێورەسمێن دروست یێن ڤێ‌ جەژنێ‌ ل پەرستگەها لالش دئێنە گێران،هەر بۆ زانین ژمارەكا رێورەسمێن جەژن و هەلكەفتێن مە ئێزدیان ل پەرستگەها لالش دئێنە كرن:
‏‎١- جەژنا سەرێ‌ سالێ‌
‏‎٢-جەژنا چلێ‌ زڤستانێ‌
‏‎٣-جەژنا چلێ‌ هاڤینێ‌
‏‎٤- جەژنا جەمایێ
‌٥-شەڤ بەرات
‏‎٦- جەژنا قوربانێ‌.
‏‎جەژنا چلێ‌ زڤستانێ‌ ئێك ژڤان جەژنایە ل رۆژا داویێ‌ ژ چلەی دبتە جەژن و دبێژنێ‌ (جەژنا چلێ‌ زڤستانێ‌)
‏‎بڤی ئاوایی رێورەسمێن جەژنێ‌ ل
‏‎پەرستگەها لالش دئێنە گێڕان :
۱ـ ئێزدی قەستا پەرستگەها پیرۆزا لالش دكن گەرەكا د سەر پرا سەلاتێڕا دەربازبت و بچتە سەر حەودا كانیا سپی و دەست و چاڤێن خۆ پێ‌ پاك بكەت‎
۲ـ هەر ئێزدیەكی بچتە لالش ل ڤێ‌ جەژنێ‌ ل مەزار و نیشانگەهێن خاسا زیارەتی دبن،
۳ـ خۆ و كەس و كارێن خۆ ب ئاڤا زمزمێ‌ سەلادكن،
٤ـ هیڤی و دوعایا دكن، ‎
‏‎٥ـ كەسێن نە دمۆركری ب ئاڤا كانیا سپی مۆردكن،
‏‎٦ـ مجێور و سەردەریێن خاسا سماتێ‌ چێدكن ،
۷ـ ل هێڤاران دیندار سەمایێ‌ دكێشن،
۸ـ قەول و بەیت و قەسیدە دئێنە ب رێزكرن و دەف و شباب دئێنە لێخستن،
۹ـ ل گوندان هەر مالەك سەربڕەكێ‌ سەر ژێ‌ دكت.
‏‎ھەر وەکی ڤان سەبەقا ژ ئەدەبێ دینێ ئێزدیان دبێژت
‏‎فەرزێت خۆ ب جیکە و دەرباز بە
‏‎ھەرە لالشا نوورانی ئی پێخواز بە
‏‎دا ل ئاخرەتێ خێرا تە یە ناس بە
~ ~ ~ ~
‏‎ھەر بوزانین دیسا ل رۆژانێن چلەی ھەر رۆژ گوندەک قەستا بەر سجادا مەلک فەخردین د کەن و دچنە سەر چلەیێ بابا شێخ و ھندەک ژ خێر و خێراتێن گوندی د گەھینن جھێ بابا شێخ لێ ئاکنجی بۆ فتارا بابا شێخ ، داکو بڤێ ھەلکەفتێ خێرەک ب گەھت گوندیا و ئێزدیان و داخازێ ژ بابا شێخ دکەن دوعایەکێ بۆ گوندێ وان ب کەت ، بابا شێخ ژی بەراتەکێ پێشکێشی مجێورێ گوندی د کەت و دگەل دانا بەراتێ ئەڤێ دوعا یا ئیختیارێت ب سوڕ و كەرەم و رۆناھی بۆ مجێوری و ریھسپی و گوندیا د بێژت :
‏‎یا خودێ توو ب دەیە خاترا ناڤێ خۆ
‏‎خاترا خودان خاترا خاترا عەزیز یا خۆ
‏‎خاترا وان ئێ ل نك تە ب خاتر
‏‎خاترا چلێ عەردا چلێ عەسمانا
‏‎خاترا چلێ شیخادی چلێ مەلك شێخ سن
‏‎خاترا چلێ داود چلێ بازید
‏‎خاترا چلێ كانیا سپی
‏‎خاترا چل مێرێت ل بەر سجادا مەلك فەخرەدین
‏‎ڤێ عیدا چلێ زڤستانێ توو دەریەكی خێرێ دەریەكی رەحمێ ڤەكەی ل ڤێ دنیایێ و ل حالێ ئێزدیا ب پرسی و تفاقەكێ د ناڤ ئێزدیاكەی و سوڕ و كەرەمێت باتنی ل ئێزیدخانێ ڤەگەرینی و چرایێ لالشێ و چرایێ ئێزیدخانێ و ھەر ھەفت زێوێت مەرگەھا شیخادی گوڕی و رۆناھیكەی و ئختیارێت مخفی سوڕ داھر و باقی كەی دلێ مە و ئێزیدخانێ پێ خۆشی و شاھی كەی-
‏‎سعود و خەلاتێت باتنی ل ئێزیدخانێ
‏‎ڤەگەرینی زوو نەدەرەنگ
~ ~ ~ ~
‏‎ژێدەر:
‏‎– پەرتۆكێن پەروەردا ئێزدیاتیێ‌
‏‎– مامۆستایێ‌ ئایینی پیر خەلات ێەلیاس
‏‎– ژ نڤیسینێن ماموستا شرو ابراھیم

تُتاح هذه الصورة أيضا في: کوردی

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi