ژنانی ئامەد کوشتنی ژینا ئەمینی سەرکۆنە دەکەن
رووداو-هەولێر:
پلاتفۆڕمی ژنانی دیجلە-ئامەد لە گردبوونەوەیەکدا سەرکۆنەی کوشتنی ژینا ئەمینیی تەمەن 22 ساڵیان کرد. ژنانی ئامەد بە گوتنەوەی ژن، ژیان و ئازادی سەرکۆنەی هەردوو دەوڵەتی ئێران و تورکیاشیان کرد بەوەی زەمینەسازی دەکەن بۆ کوشتنی ژنان.
ئەندامێکی پلاتفۆڕمی ژنانی دیجلە-ئامەد دەڵێت: “لە ئێران، ئەرمینیا، سووریا، ئۆکراینا، ئەفغانستان، پاکستان، عێراق، کوردستان و تورکیا، بە کورتی لە هەموو جیهاندا ژنان دووچاری مەرگ، تووندوتیژی، کۆچ و خەم دەکرێنەوە و هێرشی جیددی دەکرێتە سەر ماف و ئازادییەکانی ژنان”.
گوڵستان کڵچ کۆچیغیت، پەرلەمانتاری هەدەپەش یەکێک لە بەشداربووان بوو. ئەو باسی لەو ژنانە کرد کە لە باکووری کوردستان و تورکیاش کوژراون و حکومەتی تورکیای تۆمەتبارکرد.
گوڵستان کڵچ کۆچیغیت، پەرلەمانتاری هەدەپە گوتی: “ئەوەی کوژراوە تەنیا ئەو خوشکەمان نییە. لەم وڵاتەدا و لە چوار لای جیهاندا ژنان لە لایەن پیاوانەوە دەکوژرێن و رووبەڕووی دەستدرێژی و هێرش دەبنەوە. کوژراو لە ئێرانە، بەڵام لەم وڵاتەشدا هەموو رۆژێک بە هۆی سیاسەتی ئاکەپە ژنان دەکوژرێن”.
خۆپێشاندان لە دژی مەرگی گوماناویی ژینا ئەمینی بەردەوامن و رۆژ بە رۆژ کاردانەوەکانی کوشتنی ژینا زیاتر دەبڕن.
ئێوارەی رۆژی سێشەممە 13-9-2022 ژینا ئەمینی لە تاران بە تۆمەتی “پابەندنەبوونی بە باڵاپۆشی” دەستگیرکرا و دواتریش بە شێوەیەکی تەمومژاوی لە رۆژی 16-9-2022 لە نەخۆشخانەی کەسرا لە تاران گیانی لەدەستدا.
هەرچەندە پۆلیسی تاران رەتیدەکاتەوە، بەڵام باوکی ژینا بە تۆڕی میدیایی رووداوی گوت، ژینا ئەشکەنجە دراوە.
س.س
تُتاح هذه الصورة أيضا في: کوردی
