ب ئاماده‌بوونا بابێ شێخێ ئێزديان “شێخ عه‌لى شێخ ئه‌لياس” و جۆقهتا خۆ، ڕێوره‌سمێن هێڤارا ڕۆژيێن چلێ هاڤينێ ل په‌رستگه‌ها لالش هاتنه گێڕان.
چلێ هاڤينێ ژ11ی حوزیرانێ دەست پێ دكه‌ت و ل 20ی تیرمەهێ ب هژمارا ڕۆژهلاتی ب داوی تێت، ئانكو 24ی حوزه‌یرانێ دەست پێ دكه‌ت وهەتا2ی تەباخێ ب هژمارا زاینی و ئيڕۆ سێ شه‌مبوويێ ئێكه‌م ڕۆژا چله‌يى يه.
دوهى ڕۆژا دووشه‌مبوويێ 23-6-2025، بابێ شێخ و جۆقهتا خۆ، كه‌سايه‌تيێن ئۆلى، قەولبێژ و خلمه‌تكاران قه‌ستا په‌رستگه‌ها لالش كرن، ژبۆ گێرانا ڕێوره‌سمێن ڕۆژيێن جه‌ژنا چلێ هاڤينێ.
رێورەسمێن دەسپێكرنا ڕۆژيا ئێكێ ل پەرستگەھا لالش دئێنە كرن ل ھێڤارا ڕۆژيێن چلێ ھاڤينێ جڤاتا ڕۆحانى و ھەر چلەگرەكى ل دەڤەرێ و نێزيكى په‌رستگەھا لالش ژ شكەستى و زانايێن ئێزديان ئەڤێن ناڤێ چلەگريێ ل سەر ل ڕێورەسمێن دەسپێكا گرتنا ڕۆژێن چلێ ھاڤينێ به‌رهه‌ڤ دبن دگەل بابا شێخ وجۆقەتا وى پشتى ھێڤارى و شيڤ خوارنێ ل لالشا نوورانى ل چلەخانێ كۆم دبن و دوعايەكا پێكڤە دكەن دناڤا چلەخانێ وھندەك ئاخێ ژ چلەخانێ دگەل خۆ ھلدگرن.
پاشان ھندەك ژ ئاخێ بۆ وان ھەڤال و شكەستى يێن ئاماده‌نه‌بووين و د ڤێن ب ڕۆژى بن بۆ وان د گەل خۆ دبەن ،مەبەست ھەر كەسەكی چلەگر دڤێت ھندەك ئاخا چلەخانێ دگەل دا بت، رۆژا ئێكێ ل لالش د مينن و ھێڤارى ھەر كەسەكى بمينت دروستە و كەسێ بڤێت دێ ئێتە مال ژى فتاربت دێ چل ڕۆژێن ديتر ل مال تەمام كەن.
ل ھەر چل ڕۆژ و شەڤێن ڕۆژيا چلەگر خۆ ژ خۆشى و لەفزەتێن دنێ دوور دكەن، د باوەريا مە ئێزديان دا ھەر كەسێ ڤان ڕۆژيان ب دروستاھى بڤى ڕەنگى بگرت روحا وى د بتە بەھشتى ب بەھشتا بەرين دێ شادبت.
ل نيڤا چلەيى ژى جڤاتا ڕۆحانى ب سەرپه‌رشتيا بابێ شێخ ل بيستێ چلەيى دچنە لالش و چەند ڕێورەسمێن ديتر ئەنجام ددەن.
جه‌ژنا چلێ هاڤينێ هه‌ر سال دكه‌فته ڕۆژا 2/8، ب ڕێوره‌سمێن ئۆلى ل په‌رستگه‌ها پيرۆزا لالش دئێته کرن.
بيروباوه‌رێن ئێزديان و هه‌موو جه‌ژن و هه‌ڵكه‌فتێن وان گرێدايى ب سروشتى و وه‌رزێ ساڵێ نه.
تُتاح هذه الصورة أيضا في: کوردی
