تۆرا لالش
نێزیکی سێ مه‌هانه نڤیسینگەها کاروبارێن دەرئینانا کارتا نیشتمانی ل کەمپان هاتیه ڤه‌كرن، بەلێ هەفتیا ده‌ربازبوویی دەست ب مه‌مالەیان هاتە کرن، رێڤەبەرێ کۆچ و کۆچبەرێن دهۆکێ دبێژت: “هەتا نهۆ نێزیکی 700 کەسان مامەلا دەرئینانا کارتێن نیشتمانی ب رێڤه‌برینه.
رۆژا پێنجشەمبوویێ، 27ـی شوباتا 2025، ده‌یان پیر جه‌عفه‌ر، رێڤەبەرێ کۆچ و کۆچبەرێن دهۆکێ بۆ تۆرا لالش دا خویاكرن: زێدەتر ژ هەفتەیەکێ یە مامەلا کارتێن نیشتمانی د ناڤ کەمپێن دهۆکێ دا دەست پێ کریە، پڕۆسە گەلەک باش و بێ ئاریشە دچت.
رۆژا 16-12-2024، ڤیان دەخیل، گۆتەبێژا فراکسیۆنا پارتییا دیموکراتا کوردستانێ د پەرلەمانا عیراقێ دا، د کۆنفرانسەکێ رۆژنامەڤانی دا، ڤەکرنا نڤیسینگەهەکێ بۆ جێبەجێکرنا کاروبارێن دەرئینانا کارتێن نیشتمانی بۆ ئاوارەیان ل کەمپا شاریا راگەهاند، بریار بوو ئەوی چاخی دەست ب مامەلەیان بهێتە کرن، بەلێ دەرەنگ کەفت هەتا هەفتەیا بوری.
دەربارەی دەرەنگکەفتنا مامەلەیان، رێڤەبەرێ کۆچ و کۆچبەرێن دهۆکێ گۆت: هندەک ئاریشەیێن تەکنیکی مە هەبوون، ژوانژی ده‌م و جهـ نه‌یێ گونجایی بوو هه‌گه‌ر مامەلەیێن ئاوارەیان و خەلکێ دهۆکێ د هەمان دەم دا بهێنە ب رێڤه‌برن چنكو فشاره‌كا مه‌زن ل سه‌ر فەرمانگەهان پەیدا دبت، هەروەسا هەتا مە فەرمانبەرێن ئێڤاریان بۆ فەرمانگەهان دابین کرین، هندەک دەم پێتڤی بوو.
زێدەتری 20 هزار ئاواران ل کەمپان هەنە، پیردەیان جەعفەر دبێژت: مامەلەیا کارتێن نیشتمانی یێن خەلکێ دهۆکێ د سپێدەیان دا دهێتە کرن، بەلێ ئاوارە پشتی کو فۆرمێن خوە تژی دکەن، ژ دەمژمێر 02:00 هەتا 05:00 پشتی نیڤرۆ دكارن سەرەدانا فەرمانگەها دهۆکێ بکەن بۆ ب رێڤه‌برنا مامەلەیێن خوە.
رۆژانە ب هەڤکاری دگەل رێڤەبەریا رەگەزنامە و بارێ شارستانی یا دهۆکێ، 100 کارتێن نیشتمانی ل کەمپان دهێنە دەرئینان، رێڤەبەرێ کۆچ و کۆچبەرێن دهۆکێ گۆت: هەتا نۆکە زێدەتر ژ 650 کەسان دەست ب مامەلەیێن خوە کرینە و هەتا هەموو کارتێن نشتیمانی دەردئینن پرۆسه دێ یا به‌رده‌وام بت.
ل سالا 2014 داعش هێرش کرە سەر شنگالێ، زێدەتر ژ 360 هزار کەس ئاوارە بوون، پشكه‌ك ژ وان چۆنە دەرڤەی وەلاتی و پشكه‌كا دی ئاواره‌یی هه‌رێما كوردستانێ بوون، ل گۆر ئامارێن رێڤەبەریا کۆچ و کۆچبەران و بەرسڤدانا قەیرانان، هێشتا 200 هزار نیشتەجهێن شنگالێ د ئاوارەییێ دا دژین.
ئاوارەیێن شنگالێ ل پارێزگەها دهۆکێ ل سه‌ر 14 کەمپ و جهان هاتینە ئاكنجیكرن و پشكه‌ك ژ وان ژی ل دەرڤەی کەمپان ل سنۆرێ پارێزگەهێ دژین.
تُتاح هذه الصورة أيضا في: کوردی
