مه‌سرور بارزانی: ل ژێر هیچ گوشارەكێدا ده‌ستبه‌ردارێ مافێن خۆ نابین
باسنيوز:
ئەڤرۆ ئێکشەمبی 28ێ 1ێ 2024، ب بەرهەڤبوونا مەسرور بارزانی سەرۆکێ حکوومەتا هەرێما کوردستانێ، ل باژێرێ هەولێرێ، کۆنفرانسا نوینەرایەتیێن حکومەتا هەرێما كوردستانێ برێڤە چوو.
د کۆنفرانسێدا، سەرۆکێ حکوومەتێ گۆتارەک پێشکێش کر و تەکەز کر کۆ پەیوەندیێن دەرەکی و ناڤدەولەتیێن هەرێما کوردستانێ د سالێن بووریدا، گەلەک پێشڤەچوویە و گەشە کریە و هژمارا کونسولگەری و شاندێن دبلوماسی ل هەرێما کوردستانێ، د زێدبوون و بەرفرەهیێدانە.
سەرۆکێ حکوومەتێ راگەهاند، کۆ د بەرنامەیدایە کۆ ل پاشەرۆژێ، هژمارا نوینەرایەتیێن حکوومەتا هەرێما کوردستانێ ل دەرڤە، زێدەتر بکەین و د چەند ولاتەکێن دۆست و گرنگ کۆ کونسولگەری ل کوردستانێ هەنە، نوینەرایەتیێن حكوومەتا هەرێمێ ڤەکەین ب مەرەما گرنگیدان ب دۆستایەتی و پەیوەندیێن ئابووری و کلتووری و زانستی و ئەکادیمی.
ده‌قێ گۆتارا سه‌رۆكێ حكوومه‌تێ:-
ب ناڤێ خودایێ مەزن و دلۆڤان
ئامادەبوویێن برێز
سپێدە وە باش
زۆر بخێر بێن
دەستخۆشی ژ فەرمانگەها پەیوەندیێن دەرڤە یێن حکوومەتا هەرێما کوردستانێ دکەم بۆ رێکخستنا ڤێ کۆنفرانسێ، بخێرهاتنا هەمی نوێنەرێن حکوومەتێ دکەم، هیڤیدارم د ڕۆژێن کۆنفرانسێدا، گۆتۆبێژێن باش و بەرهەمدار بهێتە کرن و ئەنجام و راسپاردە و پێشنیار، د خزمەتا پێشدەبرنا زێدەتر یا پەیوەندیێن مە بیت.
جهێ خۆشحالییە کۆ پەیوەندیێن دەرەکی و ناڤدەولەتیێن هەرێما کوردستانێ د سالێن بووریدا، گەلەک پێشڤەچوویە و گەشە کریە، هژمارا کونسولگەری و شاندێن دبلوماسی ل هەرێما کوردستانێ، د زێدەبوون و بەرفرەهیێدانە، هەروەسا د بەرنامێ مەدایە کۆ د پاشەرۆژێ، هژمارا نوینەراتیێن حکوومەتا هەرێما کوردستانێ ل دەرڤە، زێدەتر بکەین و د چەند ولاتەکێن دۆست و گرنگ کۆ کونسولگەری ل کوردستانێ هەنە، نوێنەراتییا حكوومەتا هەرێما ڤەکەین ب مەرەما گرنگیدان ب دۆستایەتی و پەیوەندیێن ئابووری و کلتووری و زانستی و ئەکادیمی.
د وارێ ناڤدەولەتیدا، حکوومەتا هەرێما کوردستانێ، پێنگاڤێن زۆر باش هاڤێتنە، چ د وارێ سەرەدانا شاندێن بلندێن ولاتان بۆ هەرێما کوردستانێ یان ژی پشکداریکرنا هەرێما کوردستانێ د سمینار و کۆڕبەند و کۆنفرانسێن ناڤدەولەتییاندا.
هەرێما كوردستانێ، وەکە قەوارەکا دەستووری و یاسایی ل عێراقێ، هەمیشە فاکتەرێ ئاسایش و ئارامیێ بوویە ل عێراقێ و دەڤەرێ و خوازیارا باشترین پەیوەندینە دگەل ولاتێن دراوسێ و جڤاکا ناڤدەولەتی ب گشتی، ئارمانجا مە پیتەدان و بهێزکرنا پەیوەندیێن دەرەکی و ناڤدەولەتیێن مە لسەر بنەمایێ بەرژەوەندیێن هەڤبەش و رێز ژ ئێکگرتنێ.
حکوومەتا هەرێما کوردستانێ، سەلماندیە کۆ هەڤبەشەکێ گرنگ و کارا یێ جڤاکا ناڤدەولەتییە و د چەندین بواراندا، جهێ گرنگیدانا ولاتێن جیهانێیە، ب تایبەتی کۆ هەرێما مە دەڤەرەکا سەقامگیر و مەلبەندێ پێکڤەژیانا ئاشتییانە یا پێکهاتێن جودایە.
هەرێما کوردستانێ هەرگیز جهێ گەف و مەترسیێ نەبوویە بۆ چ لایەکێ و هەردەم مە دەستێ دۆستایەتیێ بۆ هەمی ولاتێن دەڤەرێ و جڤاکا ناڤدەولەتی ب گشتی درێژ کریە، ژبەرکۆ پێتڤیە بەرژەوەندیێن مە یێن هەڤبەش دگەل ولاتێن دەڤەرێ و ولاتێن جیهانێ بەرچاڤ بگرن و بهێتە پاراستن و پێتڤیە رێز ژ سەروەرییا هەرێما کوردستانێ و عێراقێ بهێتە گرتن و نەهێتە بنپێکرن.
ب پێتڤی دزانين کۆ سوپاسییا هەمی وان ولاتان بکەين یێن کۆ هەر ژ پشتی دەرچوونا بڕیارا 688 یا جڤاتا ئاسایشا سەر ب نەتەوێن ئێکگرتی و چێ بوونا قەوارا هەرێما کوردستانێ و هەلبژارتنا پەرلەمان و دامەزراندنا حکوومەتا هەرێما کوردستانێ، هاریكار و یارمەتیدەرێن هەرێما کوردستانێ بوون د قۆناغێن جودا و دژواردا، ب تایبەتی ژ شکاندنا تیرۆریستێن داعش، کۆ پشتەڤانیا مە کرینە و بەردەوامن ژ پشتەڤانیا مە.
هەرێما کوردستانێ شانازیێ ب پەیوەندیێن خوە دگەل دۆستێن ناڤدەولەتی دکەت و پابەندبوونا خۆ ژی، بۆ پیتەدانا بنەمایێن دیموکراسی و پێکڤە ژیانا ئاشتییانە یا دناڤبەرا پێکهاتێن جودا و سەروەرییا یاسایێ و هەمی بەهایێن هەڤبەشێن مە دگەل ولاتێن دیموکرات و پێشکەفتی، دووپات دکەت.
برێزان:
مە رەڤەندەکا بهێز و مەزن یا کوردستانی ل دەرڤە هەیە، کو رۆلەکێ گرنگ و بەرچاڤ د وان ولاتێن کۆ تێدا دژین هەیە و ل هندەک ولاتان ژی، د بوارێن سیاسی و پەرلەمانی و زانستی و ئەکادیمیدا خودان پێگەهەکێ دیار و رێز لێ گرتینە و کەسانێن بەهرەمەند و داهێنەر و بلیمەت و زانا تێدا هەنە، ئەم شانازیێ ب دەستکەفت و سەرکەفتنێن رەڤەندا کوردستانی دکەین و هیڤیدارین نموونەکێ جوان و گەش یێ جڤاکێ مە بن ل دەرڤە و رۆلێ خویێ گرنگ، د ناساندنا کلتوورێ کوردستانی و داکۆکیکرن ژ مافێن گەلێ کوردستانێ بگێرن و يارمەتیدەر و هاریکارییا پرۆسا ئاڤەدانیێ و چاکسازی و ئاڤاکرنا ژێرخان و پێشخستنا کوردستانێ بن.
پێتڤیە نوێنەراتیێن حکوومەتا هەرێما کوردستانێ ل دەرڤە و رەڤەندا کوردستانی، هەماهەنگی و هاریکاری و پەیوەندییەکا باش د ناڤبەرا واندا هەبیت و نوێنەراتیێن حکوومەتا هەرێمێ، مالا کوردستانیيان بن و هەمی ئاسانکارییەکا پێتڤی پێشکێش بکەن و هەردوولا مفا ژ هەڤدوو وەربگرن د وارێ زێدەتر ناساندنا دۆز و پرسا گەلێ مە و دروستکرن و پیتەدانا پەیوەندیێن سیاسیی و ئابووری و بازرگانی دگەل ولاتێن دەرڤە کۆ د خزمەتا بەرژەوەندێن بلندێن کوردستانێ بیت.
برێزان:
حکوومەتا هەرێما كوردستانێ، د دەمێ بووریدا، ڕووبڕوویێ چەندین قەیرانێن سیاسی و ئەمنی و ئابووری و دارایی بوویە و نەحەزان بزاڤ کرینە کۆ ب هەمی شێوەکێ، ئاریشە و ئاستەنگان بۆ پێشکەفتن و ئاڤەدانی و سەقامگیرییا کوردستانێ دروست بکەن، بەلێ ب پشتەڤانیا خودایێ مەزن و خۆراگرییا خەلکێ کوردستانێ و پێشمەرگێن قەهرەمان، ب سەر هەمی وان ئاریشە و ئاستەنگان دێ زال بیت، ژبەرکۆ ئیرادا ملەتێ مە ژ هەمی پیلانەکێ بهێزترە، ژبەرکۆ ل ژێر هیچ گوشارەکێ، دەستبەردارێ مافێن خۆ نابین.
ل دوماهیکێ هیڤیا سەرکەفتنێ بۆ کۆنفرانسا وە دخازم و هیڤیخوازم کۆ ئەنجامێن باش هەبن و ببیتە جهێ پێشخستنا زێدەترا پەیوەندییێن ناڤدەولەتیێن مە.
هەر شاد و سەرکەفتی بن و کوردستان ژی هەر ئاڤەدان بیت.
تُتاح هذه الصورة أيضا في: کوردی
