وه‌زیرێ ناڤخۆ: چ زیندانیێن سیاسى ل هه‌رێما كوردستانێ نینن
گاڤ
وه‌زیرێ ناڤخۆ یێ هه‌رێما كوردستانێ گۆتاره‌ك د پانێله‌كا په‌یمانگه‌ها ئاشتى ل واشنتۆن دا پێشكێشكر و تێدا دیاركر كو چ زیندانیێن سیاسى ل هه‌رێما كوردستانێ نینن.
رێبه‌ر ئه‌حمه‌د ل دۆر كێشه‌یێن هه‌ولێر و به‌غدا دیاركر؛ د ده‌ستوورێ ئیراقێ دا ب روهنى ئاماژه ب كێشه‌یێن دناڤبه‌را هه‌ولێر و به‌غدا دا هاتیه كرن، لێ د راستى دا چ بڕگه‌یێن گرێداى ده‌ڤه‌رێن جهێ ناكۆكیێ نه‌هاتینه بجهئینان.
خۆیا ژى كر “حكومه‌تا ئیراقێ چ هاریكاریان پێشكێشى هێزێن پێشمه‌رگه‌ى ناكه‌ت”.
وه‌زیرێ ناڤخۆ سوپاسیا لایه‌نێن سیاسى و خه‌لكێ هه‌رێما كوردستانێ كر كو پێكڤه شیاین گه‌له‌ك ده‌مێن سه‌خت ده‌رباز بكه‌ن و داخواز ژ هه‌مى لایه‌نێن سیاسى كر كو ل سه‌ر دیاركرنا ژڤانه‌كێ بۆ هه‌لبژارتنان رێكبكه‌ڤن و گۆت ژى “مه‌سرۆر بارزانى سه‌رۆكێ حكومه‌تێ یێ رژده هه‌لبژارتنێن په‌رله‌مانێ كوردستانێ بهێنه كرن”.
ل دۆر ئازادیا راده‌ربڕینێ ل هه‌رێما كوردستانێ گۆت “ل هه‌رێمێ هه‌مى كه‌سان ماف هه‌یه به‌حسێ هه‌ر تشته‌كێ بكه‌ن، د ڤێ كابینه‌یا حكومه‌تێ دا چ كه‌س ژ به‌ر به‌حسكرنا بابه‌تێن سیاسى نه‌هاتیه ده‌سته‌سه‌ركرن و چ زیندانیێن سیاسى ل هه‌رێما كوردستانێ نینن”.
ل دۆر پرۆسێسا سیاسى ل ئیراقێ خۆیاكر “ئه‌م پشته‌ڤانیێ ل بزاڤێن محه‌مه‌د شیاع سوودانى سه‌رۆكوه‌زیرێ ئیراقێ بۆ بجهئینانا بڕگه‌یێن ده‌ستوورى دكه‌ین، مه شه‌ش هه‌یڤ داینێ و ره‌نگه شه‌ش هه‌یڤێن دى بۆ زێده بكه‌ین دا كو بزانین كا ده‌ستكه‌فتیێن كابینه‌یا حكومه‌تا وى چنه”.
گۆت ژى “هنده‌ك كه‌س هنده‌ك بابه‌تان به‌حس دكه‌ن كو تشتێن بێ بنه‌مانه و مه‌به‌ستا وان ئه‌وه خه‌لكى وه‌سا تێبگه‌هینن كو كێماسى ل كوردستانێ هه‌نه، ئه‌گه‌ر ل هنده‌ك ده‌ڤه‌رێن هه‌رێما كوردستانێ سیاسه‌ته‌كا شاش هه‌بیت ژى، ئه‌و ستراتیژیا مه نینه و ئه‌م ل دژى وێ چه‌ندێ نه”.
تُتاح هذه الصورة أيضا في: کوردی
