د. سه‌عید خودێدا: كارتێكرنا شیعه‌گه‌ریێ دێ ل سه‌ر شنگالێ دیار بت
باسنيوز:
جێگرێ سه‌رۆكێ ده‌سته‌یا بلندا بنگه‌هێ لالش یێ ره‌وشه‌نبیرى و جڤاكێ دهه‌ڤپه‌یڤینه‌كێدا بۆ (باسنیوز) دیاركر:” گوهرینێن دیموگرافى دێ ل شنگالێ دروست بن ب دیتنا من ده‌سهه‌لات نوكه ل شنگالێ ده‌سهه‌لاتا مه‌زهه‌به‌كێیه ب تایبه‌تى دەسهەڵاتا شیعه‌یان زاله له‌ورا ژى پشتى چه‌ند سالێن بهێت دێ كارتێكرنا شیعه‌گه‌ریێ ل سه‌ر شنگال دیاربیت ئه‌و كار ل سه‌ر بجهئینانا به‌رنامه و پرۆگرامه‌كێ دارشتى دكه‌ن بۆ گوهرینا دیموگرافیا شنگالێ”.
د. سه‌عید خدیدا، جێگرێ سه‌رۆكێ ده‌سته‌یا بلندا بنگه‌هێ لالش یێ ره‌وشه‌نبیرى و جڤاكێ دیاركر:” رەنگە ژى ئه‌جندایێن ده‌ركى ژى هه‌بن بۆ بجهئینانا پلان و به‌رنامێ گوهرینا دیموگرافیا شنگالێ، کۆ ئه‌ڤه مه‌ترسیدارترین پلانە ل سه‌ر شنگالێ و دێ كارتێكرنه‌كا گه‌له‌ك مه‌زن ل سه‌ر ده‌ڤه‌را شنگالێ كه‌ت ئه‌گه‌ر ئاواره نەڤه‌گه‌رن گه‌له‌ك مه‌ترسی دێ ل سه‌ر شنگال و ده‌ڤه‌رێن ئێزدیان دروست بیت له‌ورا پێتڤیه ئاواره ڤه‌گه‌رن و هه‌می زیانڤێکەفتیێن شنگالێ بهێنه قه‌ره‌بوكرن داكو خه‌لكێ شنگالێ رێگریێ ل گوهرینا دیموگرافیا شنگالێ بگرن و نه‌هێلن گوهرینا دیموگرافى دروست بیت و پێتڤیه ژیانا خه‌لكێ شنگالێ بهێته خۆشكرن هه‌تا بشێن ڤه‌گه‌رن”.
خویا ژى كر كو:” ده‌ڤه‌را شنگالێ ب دریژاهیا دیرۆکێ گه‌له‌ك جاران هاتیه جینۆسایدكرن هه‌ر جاره‌كێ ژی كارتێكرنا خۆ هه‌بوویه و شوێنه‌وارێن جینۆسایدێ ل سه‌ر خه‌لكێ شنگالێ ماینه نه بتنى ده‌ڤه‌را شنگالێ تووشى جینۆسایدێ بوویه به‌لكو گه‌له‌ك ده‌ڤه‌رێن ئێزدیان جینۆسایدا تێدا هاتیه كرن ئه‌ڤه بوویه ئه‌گه‌رێ گوهرینا دیموگرافیا ده‌ڤه‌ران”.
گووت ژی:” جینۆسایدا ساڵا 2014ێ ل شنگالێ زیانه‌كا مه‌زن گه‌هاندیه جڤاكا ئێزدى ل شنگالێ و گه‌له‌ك خێزان نه‌ماینه و ژناڤچووینه و گه‌له‌ك خێزان پارچه پارچه بووینه و قه‌ستا ده‌وله‌تێن جیهانى كرینه و ئێزدى بلاڤبووینه ل ده‌وله‌تیێن جیهانێ، ئه‌ڤه 10 سالن خه‌لك ئاواره ئه‌ڤه بوویه ئه‌گه‌ر کۆ خه‌لكه‌ك دوور بكه‌ڤیت ژ قوتابخانه‌یان و پرۆگرامه‌كێ تایبه‌ت نه‌بوویه کۆ رزگاربوویێن ده‌ستێ تێرۆرستێن داعش بخوینن و جاره‌كا دی ڤه‌گه‌رنه سه‌ر خۆاندنا خۆ”.
جێگرێ سه‌رۆكێ ده‌سته‌یا بلندا بنگه‌هێ لالش یێ ره‌وشه‌نبیرى و جڤاكێ دیاركر:” د وارێ سیاسى دا هه‌تا نوكه ره‌وشا شنگالێ باش نینه هێزێن چه‌كدار یێن جۆدا جۆدا ل شنگالێ هه‌نه ئه‌ڤه ئه‌گه‌ربوویه کۆ خه‌لك هه‌ست ب ته‌ناهیێ ناكه‌ت ل شنگالێ ژبه‌ركۆ ئه‌و جینۆسایدا رۆژا 3/8/2014ێ ب سه‌رێ ئێزدیان هاتى بوویە ئه‌گه‌ر کۆ هه‌تا نوكه خه‌لكێ شنگالێ باوه‌ری ب ره‌وشا شنگالێ نینه و ئاواره به‌رهه‌ڤ نینە ڤه‌گه‌رن هه‌ست ب ته‌ناهیێ ناكه‌ن له‌ورا ژى ئاواره ل هه‌رێما كوردستانێ هه‌ست ب ته‌ناهیێ دكه‌ن ژبه‌ر ڤێ چه‌ندێ َ ئاواره ناڤه‌گه‌رن”.
تُتاح هذه الصورة أيضا في: کوردی
