ل بنگههێ لالش دانوستاندنهكا ڤهكرى ل دۆر(نفشێ نوو) ب ڕێڤهچوو
تۆڕا لالش/دهۆك
ئێڤاريا ئيرۆ ڕۆژا پێنج شهمبوويێ 8ى شوباتێ 2024ێ،ل پهرتۆكخانا پير خدر ل بنگههێ لالش ل دهۆكێ و ب ئامادهبوونا بژارهيهكا ئهكاديمى و كهسايهتى ومامۆستا وڕهوشهنبيران،دانوستاندنا لالش 2 يا ڤهكرى ل دۆرپهرتۆكا نفشێ نوو(جیهانبینی، خوەنیاسین و خوەبوون)يا ميدياكار و نڤيسهر “رێبهر كوردۆ” ب ڕێڤهچوو.
ل بهراهيێ ڕێزدار”سهعيد جردۆ” سهرۆكێ دهستهيا بلندا بنگههێ لالش بخێرهاتنا ئامادهبوويان كر و ب تێر و تهسهڵى رۆنيهك دا سهر گرنگيا سازكرنا ڤان جۆره بزاڤێن هزرى و ڕهوشهنبيرى بۆ جڤاكى و دياركر كوئهڤ دانوستاندانێن ڤهكرى بۆ ڕهوشهنبيران ل دۆر بابهتێن ههمهجۆر دێ دبهردهوام بن.
لدووڤدا ميدياكار و نڤيسهر رێبهر كوردۆ ب دڕێژى باس ل هزرا نڤیسین و ناڤهرۆكا پهرتۆكا خۆ كر و دياركر كو ئهڤ پهرتۆك يا هزرى يه و پشتی چار سالێن هزرکرن، لێگەڕیان، دووڤچوون و پرسیارکرنێ كارى ب داوى بينت و چاپ و بهلاڤ بكهت،كو تێدا چهند پرسێن سهرهكى بخۆڤه دگرت ئهو ژى گهنج كى يه و جيهانبينى چى يه و گهنج چاوان خۆ بناست.
دئاليهكێ دى دا نڤيسهرێ پهرتۆكێ بهحس ل ڕهوشا نفشێ بهرێ ل سالێن نۆتاندا بهراوردكرن دگهل نفشێ نۆكه و پاشهرۆژا گهنجان و كێشه و پرسگرێك و ديتنا ڕێگه چارهسهريان كر،زێدهبارى چهند پرسێن ديتر يێن گڕێدايى ب گهنجان ڤه ل ههرێما كوردستانێ.
ل پێرا دهرگههێ گهنگهشێ دناڤبهرا نڤيسهرى و ئامادهبوويان دا هاته ڤهكرن و چهندين پرس و پێشنيار ل دۆر پهرتۆكا ناڤبرى هاتن پێشكێشكرن و هاتن بهرسڤدان.
ل ههفتيا بۆرى بنگههێ لالش دانوستاندنا لالش 1 يا ڤهكرى ب ناڤ و نيشانێ(گرنگييا فهلسهفێ دئاڤاكرنا گۆتارا ڕهوشهنبيرى دا) بۆ بۆ نڤيسكار و ڤهكۆلهر جهعفهر جۆقى سازكربوو.
ل گۆڕهى بهرنامهكێ دارشتى يێ بنگههێ لالش ههفتيانه دێ دانوستاندنێن لالش يێن ڤهكرى ل دۆر بابهتێن جودا جودا بۆ ڕهوشهنبيران ئێنه ل دارخستن.
تُتاح هذه الصورة أيضا في: کوردی