بنگه‌هێ لالش په‌نه‌له‌ك ل دۆر(سیاسەتێن ئێک ب دووڤ ئێکێن حکومەتا عیراقێ ل هەمبەری ئێزدیان) ئه‌نجامدا
تۆڕا لالش/دهۆك
ئيرۆ ڕۆژا پێنج شەمبوويێ 11ی کانوونا دووێ 2024ێ، ل هۆلا شێخ شامۆ ل بنگه‌هێ لالش ل دهۆكێ و ب ئاماده‌بوونا هه‌ژماره‌كا زۆر ژ كه‌سايه‌تى و ئه‌كاديمى و ڕه‌وشه‌نبير و مامۆستايان،په‌نه‌له‌ك ل دۆر(سیاسەتێن ئێک ب دووڤ ئێکێن حکومەتا عیراقێ ل هەمبەری ئێزدیان) ب ڕێڤه‌چوو.
ل ده‌ستپێكێ ئاماده‌بوويى خۆله‌كه‌كێ سه‌كنين وه‌ك ڕێزگرتن ل سه‌ر گيانێ جانگۆريێن كوردستانێ سه‌روه‌رێ وان بارزانيێ نه‌مر و كاك ئدريسێ جوانه‌مه‌رگ،ل دووڤدا ڕێزدار”سه‌عيد جردۆ” سه‌رۆكێ ده‌سته‌يا بلندا بنگه‌هێ لالش بخێرهاتنا ئاماده‌بوويان كر و دپه‌يڤه‌كێ دا دياركر كو ژ ده‌ستپێكا دامه‌زراندنا ده‌وله‌تا عيراقێ و تا ئيرۆ رۆژ نه‌هـ ده‌ستوور هاتينه په‌يره‌وكرن سه‌باره‌ت حكومرانييا ڤى وه‌لاتى و سياسه‌ته‌كا شۆڤينزمانه دهاته په‌يره‌وكرن ده‌رهه‌قى پێكهاتێن نه‌ته‌وه‌ى و ئايينى يێن عيراقێ و هه‌موو پێكهاتێن عيراقێ ئازاره‌كا مه‌زن كێشا ب تايبه‌ت كه‌مينه‌يێن ئايينى و ژوانژى ئێزديا.
په‌نه‌لێ ناڤبرى ب پشكداريا “ميرزا دنايى” چالاكڤانێ مه‌ده‌نى و “لوما بارانى” ڤه‌كۆله‌را سياسى و “خدر خودێدا” ڕێڤه‌به‌رێ ناحيا گرعزێز و “پ.د.موئه‌يه‌د به‌ره‌كات” مامۆستايێ زانكۆيێ و بڕێڤه‌برنا د. فارس كتى ب ڕێڤه‌چوو.
دپه‌نه‌لى دا ل پێشيێ پ.د.موئه‌يه‌د به‌ره‌كات مامۆستايێ زانكۆيێ به‌حس ل بده‌ستڤه‌ئينانا مافێن ئێزديان و پێشه‌رۆژا وان ل ڤى وه‌لاتى دا كر،لدووڤدا خدر خودێدا ڕێڤه‌به‌رێ ناحيا گرعزێز ئاماژه‌كر كو چ ڕۆناهى بۆ باشبوونا ڕه‌وشا سياسى ل عيراقێ نينن و هندى پێ پچت خرابتر دبت،هه‌روه‌سا باڵكشانده سه‌ر گرنگيا بجهئينانا ماددا 140ژ ده‌ستوورێ هه‌ميشه‌يێ عيراقێ و ئاسته‌نگێن دكه‌ڤنه هه‌مبه‌ر ڤى مادده‌ى و پرسا ڤه‌گه‌ريانا ئاواران بۆ شنگالێ.
ژ لايه‌كێ دى ڤه چالاكڤانێ مه‌ده‌نى ميرزا دنايى تيشك خسته‌ر سه‌ر مه‌غدوريا ئێزديان دهه‌لبژارتنان دا و ئه‌گه‌رێن بجهـ نه‌ئينانا ڕێككه‌فتنا شنگالێ دناڤبه‌را هه‌ولێر و به‌غدا و مانا ئاواران ل كه‌مپان و قه‌ره‌بووكرنا خه‌لكێ شنگالێ كر.
پاشان لوما بارانى ڤه‌كۆله‌را سياسى باس ل كاريگه‌ريا ديموگرافى ل سه‌ر ده‌ڤه‌رێن ئێزديان كر و دووپاتكر كو ڕه‌وشا نۆكه به‌ره‌ف چاره‌نڤيسه‌كێ نه‌ديار ڤه چوويه.
ل داويا په‌نه‌لى ئاماده‌بوويان چه‌ندين پرسيار ئاڕاسته‌كرن و بير و بۆچۆنێن وان ل به‌رچاڤ هاتنه وه‌رگرتن و به‌رسڤ ل سه‌ر هه‌موويان هاته دان.
تُتاح هذه الصورة أيضا في: کوردی
