شه‌مبوويا بێت ڕێوره‌سمێن جه‌ژنا چلێ هاڤينێ بۆ ماوێ سێ ڕۆژان دێ ل په‌رستگه‌ها لالش ئێنه‌ گێڕان.

ب هژمارا ئێزديان چلێ ھاڤینێ ل 24 حوزەیرانێ دەست پێ دکەت و هەتا ‏‏2/8 به‌رده‌وام دبت.

لوقمان سلێمان، به‌رپرسێ راگه‌هاندنا پەرستگەھا لالش، بۆ تۆرا لالش ڕاگه‌هاند: ل ئێڤاريا ڕۆژا چارشه‌مبوويێ 30ى ته‌مموزا 2025ێ، ڕێوره‌سمێن جه‌ژنا چلێ هاڤينێ ب به‌رهه‌ڤبوونا بابێ شێخ و جۆقه‌تا وى و كه‌سايه‌تيێن ئۆلى ده‌ست پێ كه‌ن.

گۆتژى: بۆ ماوێ سێ ڕۆژان و ل ھەموو ئێڤاریان سەما دئێتە کێشان ‏و چرایێن ئاقد و نیشانگەھێن خاسا دئێنە گوڕيكرن، ڕێورەسمێن قنتارێ دئێنە ‏گێڕان، کەسێن نە مۆرکری ژی ب ئاڤا کانیا سپی دئێنە مۆرکرن ،ھەموو ئێڤاریان ‏ژی بەیت و قەسیدە دئێنە گۆتن و سمات دئێتە چێکرن.

به‌رپرسێ راگه‌هاندنا پەرستگەھا لالش دبێژت: پشتی 40 ‏ڕۆژێن چلێ ھاڤینێ ب داوی دئێن، ئێزدی ڕۆژا داویێ دکەنە جەژن، ئێزدی قەستا پەرستگەھا ‏لالش دکەن و د سەر پرا سەلاتێڕا دەرباز دبن، دچنە سەر حەودا کانیا سپی و دەست ‏و چاڤێن خۆ پێ پاقژ دکەن، ھەر ئێزدیەکێ بچتە پەرستگەھا لالش پێدڤیە ل ‏کانیا سپی، دەریێ قاپیێ، زمزمێ، بەرێ شباکێ، نیشانگەھێن خاس و ‏مەزارگەھێن ئایینی زیارەت بکەت.‏

جەژنا چلێ هاڤينێ، ئێكه‌ ژ جەژنێن سەرەکی يێن ئێزديان و ساڵانە ب ڕێوڕەسمێن جیاواز ل پەرستگه‌ها لالش ب ڕێڤەدچت. ئێزدی ب مەبەستا بەشداریکرنێ د جەژنێ دا، ل ناڤخۆ و دەرڤه‌يى وه‌ڵاتى سەره‌دانا باشوورێ کوردستانێ دکەن کو ب هه‌ڵكه‌فتا ده‌ربازبوونا وەرزێ هاڤینێ ب ڕێڤەدچت.