ئيڕۆ شەمبوويێ، 20 ئەیلوولا 2025، ل ده‌مژمێر 11:00، مەسرور بارزانی، سەرۆکێ حکومەتا هەرێما کوردستانێ، دێ جووتسایدێ شێخان-لالش ل پارێزگەها دهۆکێ ڤه‌كه‌ت.

ل ڕێككه‌فتى 21-09-2024، مەسرور بارزانی، سەرۆکێ حکومەتا هەرێما کوردستانێ، د ڕێوڕەسمه‌کێ دا، بەرێ بنياتێ جووتسایدێ شێخان- لالش، ل سنوورێ پارێزگه‌ها دهۆکێ دانا.

سەرۆکێ حکومەتا هەرێما کوردستانێ د گۆتارا خۆ دا ڕاگەهاندبوو، ب تمامبوونا هەردوو پرۆژەیێن ڕێكا شێخان – لالش و ئێتیت – باعەدرێ، کەرتێ ڤه‌گوهاستن و هاتنوچوونێ ل ده‌ڤه‌رێ ب باشی دێ پێشكه‌ڤت.

مەسرور بارزانی، به‌حسێ وێ يه‌كي ژى كربوو، تمامبوونا جووتسایدێ شێخان – لالش، ئاسانکارییەکا مه‌زن بۆ سەره‌دانكه‌رێن لالش و هاتنوچوونا وه‌ڵاتيێن دەڤەرێ که‌ت. به‌حێ هندێ ژى کر، دەڤەرا شێخان ژ ڕوویێ “ئابووری، چاندن، گەشتیاری و شوونوارى” ڤه‌ زۆر گرنگە.

سه‌رۆكێ حكومه‌تێ گۆت: دەڤەرا شێخان “نموونەیەکا جوان يا کەلتوورێ پێكڤەژیانێ يه‌ ل هەرێما کوردستانێ، ئه‌م بڤى کەلتوورى و گیانێ ئێكدووقه‌بووڵكرنێ جوانین و سەرێ مه‌ ل هەمووێ جیهانێ پێ بڵنده‌؛ له‌وا هەر چى دشيانێن مه‌ دا بت بۆ خزمەتکرنا ڤێ دەڤەرێ، درێغيێ ناکەین”.

پڕۆژە نێزیكی 9 كیلۆمەترانه‌ و پانییا وى 25 مەترن، ب كوژمێ 26 ملیار و 484 ملیۆن دیناران هاتيه‌ بجهئينان.