تۆرا لالش
سەرۆکوەزیران مەسرور بارزانی، ب هه‌لكه‌فتا سالڤەگەرا جینۆسایدا کوردێن فەیلی پەیامەک بەلاڤکر و داخواز کر کو دڤێت حکومەتا عیراقێ ب لەز ئەرک و بەرپرسیاریێن خوەیێن یاسایی و دەستوری بجهــ بینت و کەسوکارێن قوربانیان ژی قەرەبوو بکەت.
به‌ری 45 سالان، رژێما بەرێ یا عیراقێ، ژ بەر کوردبوونا وان، ب سەدان هەزار کوردێن فەیلی ژ عیراقێ دەرئێخستن و هەزارێن دی بێ سەروشوون کرن و دەست دانا سەر مال و سامانێن وان.
سەرۆکێ حكومه‌تا هه‌رێما كوردستانێ رێزدار مەسرور بارزانی د پەیاما خوە دا گۆت:ئیرۆ ئەم بیرا تاوانەکا هۆڤانە تینین، کو بەرامبەری بەشەکێ گرنگ ژ گەلێ مە هاتیە کرن، ئەو ژی شالاوێن جینۆسایدکرنا کوردێن فەیلی یە، کو رژێمێن ل دووڤ ئێک یێن عیراقێ، ب چەندین قوناغان ئەنجام دان و د سالا 1980ێ دا گەهشتنە لوتکەیا درندەییێ، گاڤا رژێما بەرێ یا عیراقێ، د پاقژکرنەکا نەژادی دا و ژ بەر کوردبوونا وان، ب سەدان هەزار کوردێن فەیلی ژ عیراقێ دەرکرن و هەزارێن وان بێ سەروشوین کرن و دەست دانا سەر مولک و مال و سامانێن وان و ناسنامە ژێ ستاندن.
بتر گۆتییه د 45ەمین سالڤەگەرا جینۆسایدا کوردێن فەیلی دا، ئەم دووپات دکەین کو پێتڤییە حکومەتا عیراقێ، ئەرک و بەرپرسیاریێن خوەیێن یاسایی و دەستوری جێبەجێ بکەت و ماڵبات و کەسوکارێن قوربانیێن جینۆسایدا کوردێن فەیلی و جینۆساید و کۆمکوژیێن دی، ب شێوەیەکێ باش، قەرەبوو بکەت و مولک و مالێن زەفتکری ڤەگەرینیت.
تُتاح هذه الصورة أيضا في: کوردی
