مرۆڤ و وەهم
جوان عزەت
پشكا دووێ و داویێ
ئەرێ تاكێ كۆمەلگەهێ ژ وەهمێ چ فێربوو؟ یان كۆمەلگەه كاری ب چ شێوازەكێ رۆنتر شرۆڤەكرنێ بدەتە ڤی جۆرە پەروەردێ؟ ئەوا من دڤێت بگەهینم لاپەرێ رۆژنامێ و خووندەڤان ئەوە ئەم هندەك هزركرنێن كوورتر و خووندنێن بەرفرەهتر بدەین پەروەردەیا كلتۆر و و كۆمەلگەها خۆ، داكو بزانین كا وەهم ژ چ پەیدادبت و چاوان دبتە وێنەیەكێ خەیالی د ناخێ مرۆڤی دا!.
ل دەستپێكێ كۆمەلگەه هاتە دروستكرن كو هەر تشتێ وێ نە وەكو كۆمەلگەهەكا دیتر بوویە، بەلكو گەلەك جاران دەمێ مرۆڤ هزر د هەبوون و دروستكرنا بنەمایێن وێ دا دكت، هینگێ مرۆڤ نەچار دبت كو وێ پەروەردە و فێركرنێ قەبوول بكت، چنكو ئەو ژی گەلەك رێك و پەیرەوێن گشتی و بەشەری بخۆ ڤە دگرت،بەلێ د هەمان دەمی دا پێویستیا وێ ب رێكخستنا زەمینە سازی هەیە،ژلایەكێ دی ڤە پێتڤیە چینا زانا و رەوشەنبیران ب شێوازەكێ باشتر گرنگیێ بدەن ب ئەرك و بهایێ وێ پەروەردێ و فێركرنەكا جیاواز و سەردەم پێشكێشی پەیوەندیێن وێ بكن، هەتا كو زانیاری و چاوانیا رێڤەبرنێ ژلایێ مرۆڤان ڤە بێتە جێبەجێكرن،ئەرێ مە ژینگەها خۆ چاوان ئاڤاكر؟ یان چاوان هەتا نهۆ جڤاكی كاریە خۆدگەل هەست و هزرێن ترسێ بگونجینت و ژیانا خۆ بەردەوام بكت؟ دبت ئەڤ پرسیارە د هزرا خووندەڤانی دا ب شێوازەكێ دیتر بێنە ئازراندن، بەلێ شێوازێ وێ ئاڤاكرنێ هەر چ بنەمایەكێ گەهاند دبتە تاكی ب وەهمی و رەنگێ عاتفی بوویە، هەتا وی ئاستی كو ئێدی تاك هەست ب بێ هیڤی بوون دل ساربوونا تشتان بكت،ژبەركو كۆمەلگەها مە هەتا نهۆ دناڤ سیستەم و بنەمایێن بەرین دا دزڤرت ئەڤە ژی خالێن كەم وكوریێ پەیداكەت هەروەسان مرۆڤان دیری خوورتبوونا پەیوەندی و لێكتێگەهشتن، بێ باوەری، ترس، درەنگمان و پاشكەفتنێ دكت، یا دیارە ژی كو ئەڤ چەندە ژ ئەگەرێ زالبوونا سیستەمێن نەریتان لسەر هزرا تاكی یە، كو ئێدی هەول نەدەت ب سیستەمێ سەردەمی را بگەهیت و ببتە خودان بریار و بەرپرسیارەتیا خۆ یا كەسی و تایبەتمەندی.
بێنرە هەر سیستەمەكێ دیموكراسی و مەدەنی بت ئەوی سیستەمی یاكاری بەرهنگاریا بنەمایێن سەقت و خەلەت بگرت و مرۆڤ تێدا فێری جۆرە پەروەردەكا زانستی و سیستەماتیك كریە، سەرەرای وێ چەندێ تاكەك هۆشیار و خودان پلەیەكا بەرز د قۆناغا گوهرانكاریێ دا پەیداكریە، كو گوه و چاڤێن وی هەرتشتی ب یاسا و بها ببینت، بەلێ مخابن د ناڤ جڤاكێن كوردی دا هەر تشت بەروڤاژیە نموونە دێ بینی ژنەك ژ ئەگەرێ وەهما بنەماێن كلتۆر و نەریتان نكارت بریارا چۆنا دناڤ جڤاكی دا بدەت، ژبەركو هەر تشت ب ترس گەهاندیە هزرا وێ و دناڤ ناخێ وێ دا شین بوویە، ئانكو رۆژانە دگەل وێ وەهمێ دژیت بێ كو بزانت چارەنڤیس و داهاتێ وێ لسەر ڤێ رێ چیە و دێ چ بت!.
ئەنجام: ئەرێ مرۆڤێ كورد بۆ هندێ پەیدا بوویە كو د هزرا وی دا ژیان بتنێ شەڤ و رۆژە نە زێدەتر؟ یان ژی ژیان داهێنان، ئاڤاكرن، ڤیان، بهاداری و تەمامكرنە، ب نێرینا من، مرۆڤێ ئازاد بت هینگێ دێ زانت كا واتەیا، ماف، ئەرك، وەلات، بەرهەم، هەبوون، ژیان، پەروەردە و…هتد چیە! لەورا پێتڤیە، تاك هەولب دەت ڤان جۆرە ئاشوپان دگەل خۆ دا لابدەت و هزر د داهاتێ خۆ دا بكت، هەتاكو بكارت كۆمەلگەهەكا ساخلەم و تەندروست پەیدا بكت و مرۆڤی ژی ژ قۆناغا وەهمێ دەربازی قۆناغا ئازادبوون و پەروەردا زانستی بكت، داكو جڤاكێ مەدەنی جیێ خۆ بگرت.
تُتاح هذه الصورة أيضا في: کوردی
