ئێزدی تووشی مەزنترین جینۆسایدێ بوون دچەرخێ نوودا
خالد خدر 
پشتی كو رێكخراوا تیرۆرستییا داعش پارێزگەها مووسل داگیركری ل (10ی تیرمەها 2014)ێ، هێز و چەكدارێن خۆ خوورت كرن و شانێت وێ یێن نڤستی رابوون و كەسانێن نەرازی و چەپەل گەهشتنێ ژ هۆزێن سوننا ل دەڤەرێ ،وپشتی چەكەكی زۆر و زەبەلاح كەفتی دەستێ وان یێ كو ژ لەشكەرێ عێراقێ مای بۆ وان، و داعش بوو خودانا چەكەكی جۆراوجۆر و مودێرن وپێشكەفتی لسەر ئاستێ لەشكەری ، ژبلی ڤێ ژئالیێ ئابووری و دارایی ڤە ڤەژینەكا بەرچاڤ و دیار بخۆڤە گرت ،رێكخراوا تیرۆرستییا داعش باوەری ب ئایدۆلۆژییا وەهابی یا سەلەفیێ و باوەرییەكا تووندرٍەو هەبوو ل دژی وان كەس و ئالییی هەڤ دژ دگەل دیتن و ئایدلۆژییا داعش،هەروەسا ئەڤ رێكخراوا تیرۆرستی زۆریا جێواز بوو دگەل وان رێكخراو و گرۆپێن دی یێن رادیكال و تووندرەو دكار و كریارێن خۆدا ،كو دەست هاڤێتە كوشتنا بكۆم و سەربرینێ و تالانكرنێ و گرتنا مرۆڤان ب تایبەتی ژن و زارۆكا ،چەكدارێن تیرۆرستێن داعش ل رۆژا(2ی تەباخێ سالا2014) هێرش كرە سەر دەڤەرا زمار و شەر دگەل پێشمەرگەی كرن و دئەنجام دا زمار ژ كوردان هاتە ڤالاكرن كو خەلكێ وێ هەموو ئاوارەی هەرێما كوردستانێ بوو ، و ل رۆژا (3ی تەباخا2014)ێ داعش هێرش كرە سەر دەڤەرا شنگالێ یا كو بتریا وێ ئێزدی نە دئەنجام دا پیسترین رەفتار هاتنە ئەنجام دان ل دژی ئێزدیان ب هەزارا ژن و زەلام كوشتن و ب هەزارا كچ وژن و زارۆك گرتن و كرین و فرۆتن ب كچ وژنا هاتە كرن ل بازارێن نەخاسێ وملك ومال تالانكرن و داعشێ ئەڤ چەندا هەنێ هەموو كر ل دژی ئێزدیێن بێ گونەه و ئاشتیخواز ل شنگالێ ب پشت بەستن ب هندەك تێكستێن ئایینی و ئێزدی ب كافر ل قەلەمدان،سەرەرای كوشتن وگرتن و سەبیكرنا ئێزدیان ژ ئالیێ داعش ڤە ب سەدان هەزارێن كەسێن ئێزدی هاتنە ئاوارەكرن بۆ هەرێما كوردستانێ و خەلكێ كوردستانێ پێشەوازییەكا گەرم ل وان كرن و دەرگەهێن مالێن خۆ قوتابخانا جیێن ئایینی بۆ وان ڤەكرن براستی كو چ جارا هەلویستێ خەلكێ كوردستانێ نائێتە ژبیركرن ل وێ رۆژا سەخت ودژوار دا ،هەژییە بێژین كو ئێزدی تووشی مەزنترین جینۆسایدێ بوون د چەرخێ نوودا لسەر دەستێ مەزنترین رێكخراوا تیرۆرستی دڤی سەردەمی دا،ئەڤە پێنچ سال بۆرین لسەر وێ كۆمكوژییا ئێزدیا بەلێ هێشتا ئێزدی دنالن دناڤا ئێش و ئازاران دا كو ژیانەكا سەخت و دژوار دەرباز دكن دناڤا كەمپان دا دوور ژ ئاخ و جیێن خۆ ژئالیەكی ڤە و ژ ئالییەكی دی ڤە هێش چارەنڤیسێ ب هەزارا ژ خەلكێ ئێزدی یێ كو هاتی گرتن یێ بەرزەیە و ،ژئالیەكی دیتر ڤە شنگال هێش كاڤلە و كێمترین مەرجێ ژیانێ لێ پەیدا نابت و مایە نە ئاڤەدانكری و یا ژ هەموویێ پیستر و كامباختر ئەوە كو هێش شنگال یا داگیركریە ژئالیێ چەندین گرۆپێن چەكدار و ژدەرڤەی یاسایێ ڤە،تشتێ هەری دلخۆشكەر رۆژا (3)یتەباخێ وەك رۆژا جینۆسایدا ئێزدیان هاتیە پەسەند كرن ژئالیێ پەرلەمانێ كوردستانێ ڤە هیڤیخوازین كو ئەو گرتی و هندابوویێن ئێزدیان یێن ماین بزوترین دەم بزڤرنەڤە ناڤ كەسوكارێت خۆ و شنگال بێتە چۆلكرن ژ هێزێن بیانی و چەكدار و دیسا بێتە ئاڤەدانكرن و خەلكێ وێ بزڤرنەڤە سەر جه و وارێن خۆ و ژیانەكا سەربلند وسەرفەراز و خۆشگۆزەران برێڤەببەن.
تُتاح هذه الصورة أيضا في: کوردی
