قۆناغا ئێك هەلویستی و چارەنڤیسێ ئێزدیان
كـاروان بـاعەدری
پشتی بوویەرێن كارەساتا شنگالێ ئەو كارەساتا هندە دل تەزین یا كو ب هەزاران كچ و ژن بووینە قوربانی، ژبلی ئەم بەحسی كۆچبەریا نێزیكی 500 هەزار كەسان بكەین و وێرانیبوونا باژێرێ شنگالێ و دیتنا چەندین گۆرێن ب كۆم و كوچبەربوون بەرەڤ ئەوروپا و نقوومبونا چەندین كەسان د دەریا ئیجە دا و بەرزەبونا ب سەدان كەسان،تانها ژی چارەنڤیسێ وان یێ بەرزەیە و د دورگەیێن وەڵاتێن ئەوروپی دا دهاڤیتینە ، لێ پشتی ڤان هەموو بوویەر و نەخۆشی و ئاسەنگێن هەمبەری ئاینێ ئیزدی بووین ئەڤەژی وێ ناگەهینت كو هەر تشت ب داوی هات و ئێدی كارەسات ب دوماهیك هات ، نەخێر كارەسات ب دوماهیك نەهاتیە، چونكی هیشتا گرەنتیكرنا مافێن ئیزدیان نەهاتیە دان و ئەركێن ل سەر لایەنین پەیوەندیدار و كۆمەلگەهێ ناڤنەتەوەی و رێكخراوێن جیهانی نە هاتیە كرن ، چونكە هیشتا كارەسات یە بەردەوامە دڤێت ئەو هەموو كارین من ل بەراهیا نڤیسنا خۆ ئاماژە پێ داین بهێنە جێبەجی كرن ل سەر لایەنێن شۆلەژێ.
هەروەسان ئێزدی ژی دقۆناغەكا هەستیار و چارەنڤیساز دبۆرن ، ژبەركو نها شنگال بوویە جهێ ململانیا سیاسی دناڤبەرا كەسایەتی و لایەنێن سیاسی یێن هەرێمی و عێراقی و بوویە گۆرەپانا موزادیەتا ل سەر كیستێ خەلك و قوربانیێن خەلكێ شنگالێ و هەر لایەنەكی دڤێت شنگال ببیتە بنگەهەك بۆ چالاكیێن خۆییت سیاسی ، یا گرنگ و پێدڤیە ل سەر تاكێ ئێزدی و ب تایبەت ناڤچەیا شنگالێ ژی دەنگ ل سەر چارەنڤیسێ خۆ بدەن و پاشەرۆژا خۆ ل شنگالێ بپارێزن،ئەم ئێزدی ژی ئیك رێزیا ناڤمالیا خۆ بپارێزن چونكی نها ئێزدی مینا لەیستكەكێ دناڤ بوویەرێن ناڤچەیێ لێ هاتینە ئەگەر دووڤچۆنەكا تەندروست ل عێراقێ و هندەك وەڵاتێن دەوروبەر ئەنجام بدەی ، دێ بینی هەر نەتەوەیەك یان وەلاتەك زەرەر یا لێ هاتیە كرن ب قەبارەیێن جیاواز ، لێ زەرەر و زیانا كوردێن ئێزدی پترە ژ یا هەموو نەتەوە و ئاینان ، چونكە ئێزدی ب ئەرد و كچ و خوشكێن خۆڤە كەڤتنە ددەستێ داعشێ.
یا گرنگ دووربین ژ دەستێن دەرڤە چونكی نە دبەرژەوندیا خەلكێ شنگال و ئێزدیان هەموویێ دایە ، چونكی هندەك لایەن ژبۆ بەرژەوندی و پرۆپاگەندیێن خۆ یێن حزبی ل شنگالێ كاردكەن نەك بۆ بەرژەوەندیا گشتی یا ئێزدیان،دڤێت تاكێ ئێزدی هشیار و وێرەكانە تر چاڤ ل مەیدانا سیاسی بت و دیاركرنا هەلویستێ خۆ و رۆلێ خۆ هەبیت د كۆمەلگەهێ نەك بكەفیتە دبن فشارا كەسانێن هاتینە پالدان ژ لایێ هندەك لایەنێن سیاسی یێن ناڤخۆیێن نەیار و دەرڤە كو ناخوازن ئێزدی ب ئارمانجا خۆ بگەهن.
گرنگ ئەوە شنگال ڤەگەریتە دهەمبێزا كوردستانێ دا ، و ئەم كوردستانیبونا خۆ بپارێزین ، چونكی هیچ لایەنەك یان حكومەتەكا ژ دەرڤە نەشیایە و نەشیت خوەستەكێن ئێزدیان بجه بینیت نموونە ژی ل سەر راستیا وێ ئەوە هەتا نها حكومەتا عێراقێ خۆ ل وان كچ و خوشكێن مە نەكریە خودان هیچ هاریكاری ژی بۆ رزگاربوویان پێشكێش نەكریە ژ هەموو لایان ڤە و چەندین نموونە ب بەلگەڤە هەینە.
تُتاح هذه الصورة أيضا في: کوردی
