بەرێ بنیاتێ وەلاتی كیە؟!
سەربەست خالد هاجانی
دەمێ باس ل ئاڤاكرنا قۆناغێن مرۆڤان دكەین، مەرەم ئالیێ رەوشەنبیری و زانستی یە ل هەموو قۆناغان ب تایبەت ل قۆناغا گەنجاتیێ!،یا خویایە گەنج دەولەمەندترین ژێرخانا هێزێ یە بۆ هەر مللەت و جڤاكەكی.
پێگەهاندن و ئاڤاكرنا گەنجەكێ بەرهەمدار باشترین گرۆڤەیا سەركەفتن و پێشداچنێ یە ژبۆ ئایندەكێ گەش و چارەنڤیساس،چنكو هێزا گەنجی فاكتەرێ سەرەكییێ پێشكەفتنا گەلانە كو ژ روویێ بیردانك و هزر و لەشی ڤە كەسایەتیا وی بێتە ئاڤاكرن لسەر بنیاتێ گهۆرینەكا ساخلەم داكو مفا و هێزێ پێشكێش بكەت داكو بكارت بەرهەم و داهێنان و گهۆرینێ دروست بكت،ژبەركو ل وی دەمی دێ تاكەكێ هەست ب بەرپرسیارەتیێ و خزمەتێ ژ تاكی بەرهەك ئێت و دێ بتە داهێنەرێ هێزەكا مەزن و بەرگریكار و پێشكەفتی بۆ مللەتێ خۆ،چێكرنا مرۆڤەكێ بەهرەمەند و بەرهەمدار بوویە مژارا هەردەمی یا هەموو نەتەوە و وەلاتان، چنكو ئەو خالا ئێكەمە ژبۆ گەهشتن ب گۆپیتكا هەبوون و هێزێ و بەرجەستەكرنا مللەتەكێ زانستخواز و رەوشەنبیر ژ خالا گەوهەری (باندۆرا گەنجی یە لسەر سكتەرێ ئابووری) كو ئێك ژ بلندترین ژێرخانا دەولەتێ یە، كو ئابوورەكێ بهێز و وەلاتەكێ سەقامگیر و خۆراگر بینتە هەبوونێ،بێگومان پلان دارێژتن دڤی بیاڤی دا پێتڤیەكا هەنوكەیێ و گرنگە د خواستا گەنجێن مە دا، كو پالپشتێن دارێژتنا پلانەكا سەركەفتی یا ئابووریانە بین،ئەو ژی ب هێز و خۆرتكرن و كاركرنا گەنجان، هەلبەت ئەڤێ یەكێ دێ مفایەكێ مەزن ل گۆرانكاریێن سەرهلدانا رەوشێن نالەبار و قەیرانی كت،چنكو كاركرنا مەزنترین هێزا گەنجان دێ ئابوورەكێ دوور ژ گەڤ و هەرەشێ مسۆگەر كەت و بتە مەزنترین هێزا پاراستنێ و بەرسنگرتنا هەر مەترسیداریەكا ژ ناڤچوونێ لسەر ژین وژیار و ژیانا مللەتی.
واتە گەنج هێز و سامانێ هەرە گرنگ و بلندێ دەولەتێ یە كو دڤێت ژ هەموو رویەكێ بێتە ئامادەكرن و مەشقدان و دەلیڤە بێتە رەخساندن كو هێزا وی بتە پالدەرێ هەبوون و داهێنانێ، داكو كەسەكێ نیشتیمان دۆست و وەلاتپارێز ژێ دروست بت ،فەرهەنگا پاراستنا دەستكەفت و كەلتۆر و نەتەوازان، ئاخ و زمان و ئالا ل نك بەرزترین پیرۆزیا ژیانێ بت،بنەمایێن ژیانا جڤاكی باشتر بێنە وەراركرن و راكرنا ئاستەنگێن ژیانێ ل بەر گەنجی،داكو گەنج گرنگیێ بدەتە مەزناهیا كلتۆر و شارستانیەتا ئاخا خۆ و فێری شەنگەستەیێن دەستكەفت و سەركەفتنا وەلات و نەتەوا خۆ بت ژبۆ ببینە خودان پێگەهەكێ هێژا.
سەرباری هندێ ناڤەندەكا ساخلەم و ئاڤاكەر بێتە دانان بۆ راهاتنا گەنجان،داكو لسەر نیشتمانپەروەریێ پەروەردە بكن و فێری ڤیانا وەلاتی و رێزگرتنا سەركەفتنا بت د بیاڤێن هزری و سیاسی و ئابووری دا، ئەڤە ژی ب خۆشكرنا ژیانەك شایستەتر بۆ گەنجان.
تُتاح هذه الصورة أيضا في: کوردی
