پێشمەرگە وبەرەڤانیكرن ژ ئایین وكێم نەتەوان
خالد ئەحمەد بادی 
زۆر جاران مرۆڤ بهایێ دەلیڤەك و هەلویستەكی نزانت تاكو بۆ مرۆڤی دبتە بیرهاتن ودیسا زۆر جاران مرۆڤ بهایێ كەسەكی ژی نزانت،تاكو پێتڤیەك یان هەلویستەك دئێتەپێش یان توو ژدەست ددەی،هەر ژدەمێ پەیدابوونا ناڤێ پیرۆزێ پێشمەرگەی ل كۆمارا كوردی بناڤێ كۆمارا مەهاباد كو ئێكەم جار ناڤ لسەر پێشمەرگەی هاتیە دانان ل سالا (1946)ێ وهەر ل وی دەمی و بۆ ئیرۆ ژی پیرۆزترین ناڤ هاتیە هەلبژارتن،هەتا نهۆ پێشمەرگێ قەهرەمان دهەموو قۆناغ ودەمێن سەخت ونەخۆش دا بەرەڤانی كریە و خۆ كریە قوربانی كوردایەتیێ وزنجیرێن داستانان تۆماركرینە وپێشمەرگە بوو كو ل هەموو قۆناغێن دیرۆكا كوردایەتیێ بەرەڤانی كریە وناڤێ كوردستانیان ژ هندابوونێ رزگار كریە،ئەگەر پرسیار بێتە كرن كو توو كوردی یان چی نەتەوەیی یان مەزهەب دێ بەرسڤ بڤی رەنگی بت ئەز كوردم و ئێزدی مە و یان ئەز كوردم ومەسیحی مە و یان ئەز كوردم وموسلمانم وئەڤە وێ چەندێ دیار دكت كو پێشمەرگە كوردە و ملكێ ئێزدی وموسلمان ومەسیحی یانە وملكێ هەموو كوردستانیانە،ئەگەر ئەم لێنێرینەكێ ل وان ویستگەهێن سەرەكی یێن دیرۆكا پرشەنگدارا كوردستانێ وشۆرەشێن كوردان بكەین هەر پێشمەرگە بوویە كو بەرگری ژ نەتەوایەتیێن مە كرین وئەگەر پێشمەرگەی پرسێن گرنگێن نەتەوی نە پاراستبانە وخۆ لێ نە كربا خودان،بێگومان هەموو ئایینێن مە ژی ل كوردستانێ ندكارین بمیننە دهەبوونێ دا و یێ ئێزدی ندكاری رێورەسمێن خۆ ل پەرستگەها لالش بكت و ئەگەر ب سایا سەرێ پێشمەرگەیی نەبایە یێ كریستیان وئەرمەنی وئاشووری ومەسیحی ندكارین كنیشتە و ئایینێ خۆ بپارێزن وئەگەر پێشمەرگە نەبایە بێگومان بانگ ل منارێن مزگەفتان بلند نە دبوو چنكو زۆر گرۆڤە هەنە كو دوژمنان مزگەفت ودێر وپەرستگەه ب سەرێن وانان دا دهەرفاندن،هەروەسا پێشمەرگێ قەهرەمان دهەموو قۆناغان دا بەرەڤانی یا ژ هەموو كوردستانیان كری بێ جوداهی،بۆ قۆناغا ڤی سەردەمی وشەرێ رێكخراوێن تیرۆرست وتوندرەو و تیرۆرستێن داعش وحەشدا وەحشی و ب تایبەت ل دەڤەرێن ژ دەرڤەی دەستهەلاتا هەرێمێ و هەروەسا دەڤەرێن لبن كۆنترۆلا دەستهەلاتا عێراقا فیدرال ڤە وهەر بێ جوداهی بەرەڤانی یا ژوان هاتیە كرن وئەگەر نە باشترین گرۆڤ كو مەسیحی وكریستیان وئاشووری وئێزدی هەموویان زۆر دەردەسەری وخرابكاری دیتن ژلایێ دەستهەلاتدارێن كو دەستهەلات ل وان كری ب تایبەت ل عێراقا فیدرال لێ بتنێ پێشمەرگێ قەهرەمان بەرگری ژوان كریە وپێشمەرگەی ئەو هێزا گەنی و پیس و زەبەلاح ژناڤبرن وسەركەفتن بۆ پێشمەرگان،ل داویێ رامانا پەیڤا مە دڤێ گۆتارێ دا ئەوە كو راستیێن دیرۆكی دیار بكەین و بۆ هەموویان بدەینە پێش چاڤ كو پێشمەرگە بوو ئەم ژ نەمانێ قورتال كرین وناڤێ پێشمەرگان ب خوبرێ سۆر لسەر لاپەرێن سپی یێن دیرۆكا كوردان هاتیە نڤیسین و لناڤەندێن بالا یێن جیهانا مەزن پێشمەرگە بوویە سومبول وئەم وەكو كوردستانی شانازیێ پێ دبەین،سەركەفتی وسەرفەرازبی ئەی پارێزەرێن ئالایێ پیرۆزێ كوردستانێ.
تُتاح هذه الصورة أيضا في: کوردی
