ژ كەلەپۆرێ باب وكالا..ستران گۆتن
ئلیاس نەعمۆ خەتاری
د درێژیا مێژوویێ دا مرۆڤ پێتڤی دەربرینێ ژ هەست و هزرێن خۆ بكت و ئەڤ دەربرینە ب گەلەك رێیا تێتە خویاكرن ژوان رێیا گۆرانی و ئاواز ودەنگێن خۆش ل دەمێن كۆچك ودیوانان وجڤاتا وشەهیان وخۆشیا هەتا سترانێن یاریێن زارۆكان،هەر وەكی دئێتە گۆتن و خویاكرن كو بتریا سترانێن دهاتنە گۆتن ل رۆژێن داوەتا بوون،كا جارێ بەرێ خۆ بدەینێ كاچاوا ستران دگۆتن و كی بوون سترانبێژ ل وان سەردەمان ، هەلبەت هەر دەمەكی وهەر وەختەكی دەنگ خۆش هەبوون ژ ژن و زەلاما لەوما دێ ل دەمێ داوەت و شەهیانا رابانە ستران گۆتبانە،هەلبەت ژبلی دەنگێ هەری خۆش و ب قەوەت دەنگێ دهۆل و زرنایێ كو ل هەموو خۆشیان دهاتنە بكارئینان،ژوان نموونە یێن وان سەردەمان ل دەمێ بەربوو دچۆنە بووكێ ( ئەو كەسێن بكەیف وخۆشی دچۆنە بووكێ ژمالا بابێ وێ بینە مالا زاڤای دگۆتنێ بەربوو یان بەربووك)،هندەك كچ و ژنێن دەنگێ وان ئی خۆش ئێت نێزیكی مال بابا زاڤای وخوشكین زاڤای دێ دەست ب نقام و گۆرانیێن خۆش كربانە دگەل مست قوتانێ و هلهلاندنێ هەلبەت بتریا شەهیان و داوەتێن بەرێ ب لنگا بوو ئەگەر داوەت یە ل ناڤ گوندی با و وەكی دی رێیێن دوور ددانە بەر خۆ ل دەمێ ژ گوندەكی دچۆنە گوندەكی دی دێ ب رێڤە مست قوتابان و مقام و گۆرانی گۆتبانە هەلبەت دگەل دەنگێ هەری خۆش دەنگێ دهۆل و زرنایێ بتریا وان گۆرانیا ئێت گۆڤەندێ بوون وگەلەك ژوان ستران ب بنەمالا زاڤای ڤە دگۆتن،دێ گۆتبانە ئەو كچكا ئاف كێش یان كچكا نان پێژ و هەروەسا دێ بەحسێ وان هاتباكرن وەكی پەسن و خلمەت بۆ بنەمالا زاڤای ،ل دەمێ راكرنا بووكێ و دەرئێخستنا وێ ژ مال بابا وێ دێ گەلەك گۆرانیێن تایبەت گۆتبانە ژوانا(بووكێ دەلالێ رابە خۆكاركە كو گەلەكە بناڤ و دەنگبوو و وگۆرانییا مەبرۆ مە ژوە برۆ و نارینێ هەی نارین هەی نارین) و گەلەكێن دی ب كەیف وخۆشی دێ بەرەف مالا زاڤای ڤە چۆبانە پاشی دێ چۆبانە زاڤا ژمالاجینارا ئینابا ب گۆرانییا كاكۆ زاڤایۆ نەچە سەربانی،ژبەركو زاڤا دچۆ سەربانێ مالا جینارا ل دەمێ بووك دئینا ناڤ مالێ ب كەیف و خۆشی دێ زاڤا ئینابا مال،ستران گۆتن ل كۆچك ودیوانا وەكی تێتە خۆیاكرن ژیانا بەرێ گەلەك یە سەخت و دژواربوو ویە ب زەحمەتبوو،لەوما ل دەمێ هێڤاری دبوو بێنڤەدان و خەلك ل كۆچك و دیوانا كۆمدبوون و تەمبوورڤان و سترانبێژ دهاتن ودەستپێدكر و ژ سترانێن داستانا و رەش وقەهرمانی تا ئێت عەشق و ئەڤینیێ وحەیرانۆكا ،دیسان ئەڤ كۆچك و دیوان ڤالا نەدبوون ژ پێكەنیكا وگۆتنێت خۆش تایبەت دناڤبەرا خەلكێن مەحل وتاخادا وهەتا ب خەلكێن گوندان،دیسان ل دەمێ كاری گەلەك جاران ستران و گۆرانی دگەل دا دگۆتن بۆ نموونە ل دەمێ دروونا دەخلا پالە رێزدبوون ودەنگ خۆشەكی ستران دگۆتن ئێت تایبەت ب دروونێ ڤە وپالا دەست بدرونا خۆ دكرن ومەلوك كێشا مەلوك دكێشان هەروەسا دگەل جێنجەرێ وگێرێ و دێرانێ وپیڤان وداگرتن و كێشانا دەخل و دانی ودگەل كاری لناڤ بستان ورەزا ل دەمێ ئاڤدانێ وچنین وخرڤەكرنا بەرهەمێن وی كارێ بزەحمەت ل درێژیا وەرزێن سالێ دا،نائێتە ژبیركرن دیرۆكا شڤانا وبلورا وان ل دەمێ چێراندنا پەزی وسترانێن خۆش ل دەشت و بەهارواریا ودگەل هاتنا بێریڤانا بۆ ناڤ كەریێن پەزی،دیسان ل دەمێ نەخۆشیان وشین وتازیا دیرۆك دهاتنە گۆتن ب دەنگێن ژنكێن دانعەمر وهەتا ئیرۆ ئەڤ دیرۆك ل تازیا تێنە گۆتن تایبەت لسەر تازیێن مرۆڤێن گەنج وجنات وكەسێن میرخاس وچەلەنگ وئاغا ، ژنكا ل دەمێ جوهنی دقوتان بدەنگێ خۆ ئێ زراڤ و شرین ستران دگۆتن هەردیسان دەیكێن زارۆكا ل دەمێ لاندك دهژاند بۆ زارۆكێن خۆ دلۆراند دا بنڤن و ل دەمێ هلهاڤێتنێ گۆرانیێن گۆڤەند و دیلانا بۆرا دگۆتن دا كەیف خۆش بت،دێ بەرێ خۆ دەینێ كا زارۆكا ل دەمێن بەرێ چی گۆرانی و چی ستران بخۆ دگۆتن ل دەمێ یاریكێن خۆ دكرن،ژیانا هەرە خۆش لسەردەمێن بەرێ ژیانا زارۆكینیێ بوو و یاریكێن خۆش ئێت وی دەمی مینا عیلانێ وچۆپانێ و ئێكەنێ دابسكانێ یان بازدان و ڤەشیرۆتكانێ ویاریكێن بووكانێ و چاڤلێكرنا كەسێن مەزن وەك دەیك وباب و زارۆك و شڤان و گاڤان وبەقال و گەلەك یاریكێن دی ب مقام و وسترانێن زارۆكان وەكی قاقانێ گولێ وسەرێ بووكا نوهاتی وغەزالێ دەلالێ وگەلەكێن دی دهاتنە گێران.
تُتاح هذه الصورة أيضا في: کوردی
