پاشەرۆژا ئێزدیان ل عێراقێ بەرەف كوڤە
سەردار داود
بەری جینۆسایدا مەزن یا ل(3/8/2014)ێ یا بسەرێ مللەتێ ئێزدی هاتی ل شنگالێ،ئێزدی بتنێ ل پاریێ ژیانا خۆ یا رۆژانە دگەریان و ژیانەكا سادە برێڤەدبرن و ئێزدیا چ جاران زۆری ل كەسەكی نەكریە و هەردەم حەز ژ پێكڤەژیانێ دكن و ئاشتیخوازن،لێ سەرەرای ڤان هەموو فەرمان و جینۆسایدان تشتێن دژی دەرهەقێ مللەتێ ئێزدیان تێنەكرن،مللەتێ ئێزدی ب وێ ژیانا خۆ درازی بوون و هەر كەسەكی ب رێیەكێ پاریێ ژیانا خۆ یا رۆژانە پەیدادكر ،بۆ نموونە وەكی كارێ چاندنێ یان كرێكاریێ و هندەك لەشكەربوون بڤی شێوەی ژیانا خۆ دەربازدكرن،ژ بەرێ دا چ دەستهەلاتێن ئێزدی نینن ل دەولەتێ دا و ئێزدیان چ جاران داخوازا كورسیكێ ل كەسەكی نەكرینە،لێ بسەر ڤان هەموو تشتێن مە دیاركرین ژ نشكەكێ ڤە تووشی جینۆسایدەكا هەرە مەزن بوون ژ لایێ رێكخراوا تیرۆرستیا داعش ڤە و ب هەزاران ئێزدی ئاوارەی هەرێما كوردستانێ بوو و ب هەزاران ژ مللەتێ ئێزدی هاتنە گرتن و كوشتن،هەتا نهۆ ژی ب هەزاران دبێسەروشوونن و زۆری و زۆرداری لێ دئێتەكرن و مال و ملكێ وان هاتە تالانكرن و پەقاندنا ب دەهان مەزارێن پیرۆزێن ئێزدیان،ژبەر ڤان ئەگەرا تاكەكەسێ ئێزدی بێ هیڤی بوو بژیت ل عێراقێ دا و ئێدی باوەریا وان نەما ب پاشەرۆژا ل عێراقێ دا ،ئەو بوو گەلەك ژ مللەتێ ئێزدی كۆچبەری وەلاتێن بیانی بوون و گەلەك ل ئاڤ و دەریا دا خەندقین و گەلەك وندابوون و برێڤە ژیانا خۆ ژدەست دان وەسا ژ ژیانا خۆ بێ هیڤی بووینە كو ئێدی ئەو ناژین ل عێراقێ دا ژبەر ب سەدێن سالایە هەردەم زۆری ل كەسێ ئێزدی دئێتەكرن،هەر وەك مە ل پێشیێ بەحسكری ل سالا(2014)ێ ئەڤ جینۆسایدا مەزن یا بسەرێ مللەتێ ئێزدی هاتی و خەلكێ مە ئاوارەبووی،نێزیكی پێنج سالایە خەلكێ مە ژیانا خۆ دبن خیڤەتێن ئاوارەبوونێ دا دبۆرینن و چ هەولێن رژد نەهاتینەدان ژبۆ ڤەگەریانا ئاوارێن ئێزدی بۆ سەر مال و حالێ خۆڤە،هەتا نهۆ گوند و كۆمەلگەهێن وان نەهاتینە پاقژكرن ژ مین و تەقەمەنیێن داعش و چ ئارامی ل دەڤەرێ نینە و هەر رۆژ ئالیەك دەستهەلاتێ ل دەڤەرێن ئێزدیان دكت،ئەڤە هەموو ئەگەرن یێن مە بەحسكرین خەلكێ مە نكارن ڤەگەرنە سەر جی و وارێن خۆ و ژیانا مللەتێ ئێزدی بەرەف وندابوونێ دچە ل عێراقێ دا.
تُتاح هذه الصورة أيضا في: کوردی
