جەژنا رۆژیێن ئێزی
خالد خدر
ئۆلا ئێزدیا ژ ئۆلێت هەری كەڤن و دێرینە كو باوەری ب خودایێ ئێك و مەزن ئێزدانێ میهرەبان ئینای، و ئەڤ چەندە بتر دووپات دبت دناڤا قەول و سەبەقە و تێكستێن مە یێن پیرۆزێن ئۆلی دا ،هەروەسا دچارچۆڤێ ب رێڤەبرنا رێورەسمێن مە یێن ئۆلی و جەژن و هەلكەفت و پیرۆزیێن ئۆلی دا گەلەك سیمایێن دێرین وكەڤن ب ئۆلا ئێزدیان ڤە خویا دبن ، و رەه وریشالێن ئێزدیاتیێ دگەهنە ئۆلا میترایی ( شەمسانی ،نوورانی ) ، ئەڤ چەندا هەنێ هیچ گۆمان و گەنگەشان ناوەرگرن، و بۆ دووپاتیا ڤێ چەندێ ئانكو خودا پەرێسییا ئۆلا ئێزدیان.
دناڤ تێكستێن مە یێن ئۆلی دا هاتیە و ژ قەولێ زەبوونی مەكسور:
براهیم خەلیل ژ نوقتەكا سادقە
هەرو ب سێ حەرفە دبوو مەنتقە
حەتا خودێ خۆ ناس كر ب حەقە
ئێزدیاتی باوەریەكا گەلەك كەڤنە و دڤی دەربارەیی دا مامۆستایێ هێژا پیر خدر سلیمان دبێژت:(ئێزدی ژ بەرمایكێن كەڤنترین كۆمێن مرۆڤایەتیێ نە یێن كو ژیاین ل میزۆبۆتامیا و كوردستانا نهۆ ،و ئۆلا ئێزدیان ژ كەڤنترین ئۆلێن كوردایە ل دەڤەرا لاندكا شارستانییەتان ل رۆژهەلات و باوەریا ئێزدیا بەری ئاڤیستایە بەلكو كەڤنترە ژ ڤیدا هندی )،بەلێ دیاركرنا دیرۆكا دەینان و دیاربوونا ئۆلا ئێزدیان كارەكی ئالۆزە و نەیێ ئاسانە و پێتڤی گەلەك گرۆڤە و بەلگانە و ئێزدیاتی د سێ قۆناغێن سەرەكی را دەربازبوویە ، قۆناغا ئێكێ پەرستنا خوداوەندا و پیرۆزیا دیاردێن سرووشتی ، قۆناغا دووێ هزرا خودێ پەریسیێ كو ئێزدیان پەرستنا خودێ مەزن و میهرەبان كر وەك مە لسەری دیار كری و هەروەسا لگۆر سەبەقا قەولێ زەبونی مەكسور ، قۆناغا سێیێ پشتی هاتنا شیخادیێ كورێ موسافری ژ شامێ بۆ لالشێ ، و ئەریفۆرما وی و پشتی وی میراتگرێن وی كرین دناڤا ئۆلا ئێزدیاتیێ دا ، و ئێزدی سێ رۆژیان دگرن دبێژنێ رۆژیێن ئێزی (ئێزدان ،ئێزیدا ،ئێزدا ) و ئەڤ رۆژی یە دكەڤنە سێ شەمبوویا ئێكێ ژ مەها كانوونا ئێكێ ب هژمارا شەرقی و هژمارا میلادی (13) رۆژا ل پێش یا شەرقی یە، رۆژێن سێ شەمبوو و چار شەمبوو و پێنچ شەمبوو رۆژی گرتنە و رۆژا ئینیێ جەژنا رۆژیێن ئێزی یە ، ئەڤ رۆژیێن هەنێ بۆ ئێزی خودێ نە و دباوەریا مە ئێزیان دا ئێزی ناڤەكە ژ ناڤێن خودێ ،لگۆر ڤێ سەبەقا قەولی كو تێدا هاتیە ( ئێزی ) ناڤەكە ژ ناڤێن خودێ :
سلتان ئێزی ب خۆ پەدشایە
هەزار و ئێك ناڤ ل خۆ دانایە
ناڤێ مەزن هەر خودایە
هەژی ئاماژەپێكرنێ یە كو مە ئێزیان جێواز ژ هەموو ئۆل و مللەتان ب شێوەكی گەلەك جوان و ژ هەژی ،ناڤێ خودێ دبێژین و دئینینە سەر زمان و ب زمانێ خۆ یێ شرین و قەشەنگ هەروەسا یێ كو هەموو قەول و بەیت و تێكستێن مەیێن ئۆلی پێ هاتینە دەینان،ئەوژی بڤی رەنگی: خودێ – یێ كو خودا یێ ،خۆدایی ، ئێزدان – یێ كو ئەزدایی.
ژێدەر:
الایزدیون والتراپ الكوردی /پیر خدر سلیمان ، گۆڤارا لالش هژمارا (14) بەرپەرێ (8)
تُتاح هذه الصورة أيضا في: کوردی
