ژ كەلەپۆرێ باب وكالا..ل دەمێ هاتنا رۆژی و عیدا ئێزی
ئلیاس نەعمۆ خەتاری
ل دەمێ نێزیكبوونا رۆژیان هەموو خەلكێ ئێزدی بەرهەڤیا خۆ دكن بۆ گرتنا رۆژیان و هاتنا ژەزنا رۆژیێن ئێزی،ل هێرە هەر مالەك ل هەر جیەكی یان ئەردەكی بت لدۆر حال و مالێ خۆ یێ ئابووری و ل پێ عورف و داب ونەریتێن ئێزدیاتیێ دێ كارێ خۆ كت، هەر ژ كەڤندا وەكو دئایینێ مە یێ ئێزدیاتیێ دا دئێتە خویاكرن رۆژی گرتن ئەركەكی فەرە و فەرزەكە ژ فەرزێن تەریقەتێ،ژبەر ڤێ چەندێ دڤێت كەسێ ئێزدی ل هەر جیەكی و لسەر چ كارەكی بت رۆژیێن ئێزی بگرت و جەژنا خۆ ب رێڤەببەت،بڤێ هەلكەفتا پیرۆز دێ ل هێرە بەرێ خۆ دەینێ كا چاوا ئەڤ رێورەسم وجەژن لسەردەمێ باب و كالا برێڤەدچۆن وكا بەرهەڤیا خۆ چاوا دكرن و ب چ شێوەی بوو،ژیانا بەرێ گەلەك فەرق و جوداهی دگەل ژیانا ئیرۆ دا هەبوو لەوما بەرهەڤیا وان ب هەیڤەكێ تا بیست رۆژان پێش دەمێ رۆژیان خۆ حازردكرن ژ وانا پەیداكرنا خەرجیێ ئانكو مەزاختنێ بۆ رۆژیان، لەوما گەلەك خەلكێ دێ تشتەك فرۆتبان وەكی دەخل ودانی یان پەزا و چێلا،هندەكا لدوری مالا خۆ كاردكرن دێ رابانە دراڤ بۆ وان فرێكربان یان ژی دێ بڤێ هەلكەفتێ مۆلەت ژ ئاغایێ خۆ وەرگرتبان وهاتبانە مال و جەژنا خۆ دگەل خێزانا خۆ دەربازكربان،ل هێرە هەر مالەكا ئێزدی دڤیان سەربرەك پەیداكربان چی میهەك یان بەرخەك یان كاركەك وهندەكێن حال خۆش گۆلك حازردكرن بۆ رۆژیان بەری رۆژیا ب نێزیكی هەیڤەكێ دێ سەربرا خۆ ل مال گرێدابا وخوارن وئاڤ دابانێ دگۆتنێ(رەبیتە) و هەتا نهۆ بتریا ئێزدیان لسەر ڤی جۆرێ خۆ ئامادەكرنێ ماینە لێ هەتا هێڤاریا عیدێ پاشی دێ سەر ژێ كربا و بخێرا رۆژیا كوشتبا،بۆ باشیف وفتار و رۆژا جەژنێ حازركربان و ژ وان حازریان پشتی سەربركوشبان سەر و پێ دێ كزراندبان ئانكو دبستكێرادكرن ودكرنە د تەرونێ دا بسۆژن ودێ پاشی دناڤ نەهكا و دانقوتێ دا دكرنە دناڤ كلۆسكی دا ودكرنە د تەرونێ دا دا پێكڤە هاتبانە كەلاندن وبۆ خوارنێ حارزبانە،چێكرنا چزركا ئانكو دۆهنێ حەلاندی ژ وان سەربرا پەیدادكرن ودقلاند ودكلۆسكادا هەلدگرت وپرتكێت گۆشتی و دۆهنی پێكڤەمابان وهشكبان هەلدگرن دگۆتنێ چزرك و بۆ نیڤەكا كوتلكا وترشكا بكاردئینان،هەردیسان پیستێ سەربرا(كەفل) دهاتنە فرۆتن لێ دڤیا كەفل ئی ساخلەمبا ونەهاتبا دراندن وبرینداركرن هەكە نەدهاتە فرۆتن ،دیسان رۆفیك دگەل كەفلی دفرۆتن بۆ ڤی كاری بكرێت تایبەت هەبوون ل دەمێ رۆژیا دهاتنە گوندێن ئێزدیان وكەفل و رۆفیك خرڤەدكرن و دكرین و بتریا وان فەلەبوون ژ گوندێن نێزیكی ئێزدیان بوون،كاب ل ڤان رۆژان دهاتنە خرڤەكرن كاب ئانكو هەستیێ جۆكا سەربرا و دهاتنە بكارئینان بۆ یاریێن بەرێ،دەنگێ باندانا ل فرۆتنا قەسپا و هژیرا و مێویژا لناڤ گوندی دەنگ ڤەدا وخەلكێ بۆ رۆژیان دكرین چی ب دەخلی یان ب هیكا یان ب دراڤی با،ل دەمێ پاشیڤێ گەلەك مالا بەری پاشیڤێ بخۆن سفرەكا زادی حازردكرن و دبرە دەر بۆ كەسێن هەژار و هندەك جینارا،هەروەسا ل دەمێ فتارێ بڤی رەنگی خێرا خۆ دكرن،لێ چاوا رادبوونە رۆژیا ل دەمێ بەرێ ئەندامێن خێزانێ ئێت مەزن ل شەبەقێ تاریبووی دێ رابانە دەست و چاڤێن خۆ شووشتبانە و دوعایا خۆ كربان و پێكڤە پاشیڤا خۆ خواربانە،لێ بەری دنیا زەلال با دێ كەسێ ئێزدی ب رۆژی با ئانكو دەڤ گرتیبا هەتا ب رۆژئاڤا و بەری دەمێ فتاربوونێ دێ زیارەتیبانە هەكە چۆبا بەر خاسا یان ل مالا خۆ ل خەلیتكێ خەلات و بەراتا زیارەتیبا ل هێڤاریا عیدێ دێ هەر مالەكا ئێزدی سەوك پاتبان(نانێ عیدێ) هەلبەت هەتا ئیرۆ رۆژ ئەڤ رێورەسمنە دبەردەوامن لناڤ جڤاكێ مە ئێ ئێزدی دا،ل سبەیكا عیدێ كوتلك ئانكو ترشك دئێنە چێكرن وخەلك دچنە بەر خاس وچاكا ودچنە عیدانا كەس وكار وجینار وهەڤالێن خۆ و ڤێ عیدێ ل ئێك و دوو پیرۆز دكن، خۆشی وجوانیا ڤێ عیدێ و هەموو عیدا ئەوە ل دەمێ زارۆك ب كۆمان لناڤ كۆلانێن گوندی دگەرێن و مال ب مال عیدا وان پیرۆز دكن و شریناهیا عیدێ خرڤە دكن،بڤی رەنگی عید ب داوی دئێت لێ ژبەر كۆچبەریا ئیرۆ ئێزدی كۆچبەر بووین گەلەك خەلكێ مە دوور بوویە ژڤان رێورسمێن پیرۆز و خۆش وجوان..عیدا رۆژیێن ئێزی ل هەموو ئێزدیان پیرۆزبت.
تُتاح هذه الصورة أيضا في: کوردی
