ژن،وەكو بوونەوەرەكا خوەزایی یان ئۆرگانەكا جڤاكی؟
جوان بەرواری
سوكرات دبێژیت:”ئەگەر تە زەلامەك رەوشەنبیركر واتە تەمرۆڤەك رەوشەنبیركر، لێ ئەگەر تە ژنەك رەوشەنبیركر،هینگێ تە خێزانەك رەوشەنبیرو بهێز ئاڤاكر”، دیارە ژن هێزە، ستوونا جڤاكی یە نەخاسمە ئەوجڤاكێ خۆ ب جڤاكەكێ پێشكەفتی دزانت و ژنێ وەكو ژێدەرەكێ ئیلهامێ بۆ پەیداكرنا رەوشەنبیریا جڤاكی دبینت.
ژن نە بتنێ بوونەوەرەكا خوەزایی یە، بەلكو ئۆرگانەكێ جڤاكی یە، خۆ د هەر ئالیەكێ دە دبینت، هەردەم خەبات و خزمەتێ دكت، هەول ددەت جڤاكی رابگرت و بەر ب ئاستێن باشتر ببت،هەروەسان، ب هزر و تەحەمولا خۆ دكارت هەڤسەنگیێ پەیدا بكت، كو نە بتنێ هێزێ بدەت، بەلكو ئەو ب خوە هێزە و گوهەرینان ژی پەیدا دكت،ئەز وەكو نڤیسكارەكا ژن دخوازم مەقامی ژنێ یێ راستەقینە بدەم ناسكرن، كو د ئیستگەهێن دیرۆكی یێن جودا جودا دە، چەندین جاران باج و بوهایێ خەلەتیێن زەلامان دایە، كەتییە د رەوشێن نالەبار و ئاوارتە دە، بەلێ بێ كو هێزا خۆ ژ دەست بدەت، مخابن هەتا نهۆ هندەك زەلام ژنێ وەكو بوونەوەرەكا مێ بتنێ دبینن، لەورا ژی خۆ وەكو نێر دبینن، بەلێ دیارە تێگەهێ ژنێ ژ (مێ) مەزنترە كا چاوان تێگەهی زەلامینیێ ژ (نێر) مەزنترە، ئێدی ژن ژ هندێ مەزنترە كو وەك بوونەوەرەكا مێ بێتە نیاسین و ل قەلەم دان، ئێدی نە بتنی خزمەتی دكت، زارۆكان خوەدی دكت، كاری كابانیی دكت، نەخێر، بەلكو بەشداری چێكرنا بریار و سیاسەتان ژی دبت، هەلویستان وەردگرت و ئەگەر پێتڤی بوو، ئامادەیە ل سەنگەران ژی مل ب ملێ زەلامی ڤە، بەرهنگارییا هزرا تاری بكت و بەرەڤانیێ ژ گەل و وەلاتی بكت،دجڤاكێن زەلام سالار دە، مخابن كولتوورێ مراندنا داهێنانێ و هەرفاندنا كارێكتەرا ژنێ هەیە، پێتڤیە ژن د وی بواری دە لبەر خۆ بدەت، وی كولتووری نەهێلت چنكو سەدەمەك سەرەكی یە بۆ دابەشكرنا جڤاكی و چێكرنا سنووران ل جیێ هەڤگرتن و ئێكگرتنێ و جیێ ئاماژێ یە، كو نهۆ ژ بەرێ چێترە، ئێدی ژن بوویە خوەدان دیرۆك، شەهرەزاهی و بسپۆری، ب ئاخاڤتنەكا دی، بەر ب سەردەمەك نوو دچت، سەردەمێ رەوشنگەرییێ، كو ئازادییا خۆ تێدا بەرقەرار بكت، دیارە ئەو جڤاكێن كو ژن تێدا رۆلێ خۆ نەگێرت، ب ئازادیانە دەربرینێ ژ راوبۆچۆنێن خۆ نەكت، ئۆرگانەكێ نەخوێندەوار، نەزان، بێكار، بێ داهات، بندەست و چەوساندی بت، دێ جڤاكەكی نەساز و نە بەرهەمدار بت و بار هەموو دێ كەفتە سەر ملی زەلامی،جڤاكێ وەسان دەلیڤەیا پێشدەچوون و خۆ گهۆرینێ نابت.
ب دیتنامن،گەرەكە زەمینە بۆ پێشكەتنا ژنێ بێتە خۆشكرن ب تایبەت ژ ئالیێ دەولەتێ ڤە،دا كو ژن خۆ ببینت، ئەڤ جار ب كەد و بەرهەمێن خۆ پشكداری داهێنان و ئاڤاكرنێ ببت،ئێكەم پێنگاڤ ئەوە كو خۆ ژ نەزانینێ رزگاربكت و هزر د رەوشەنبیركرن و ئازادییا زاتێ خۆ دە بكت،هەروەسان، رۆلێ خۆ دبوارێ خووندن و زانینێ دە ببینت هەتا وی رادێ كو د ژینگەها خۆ دە بكت كولتوور وەكو دی گرنگیێ ب جەوهەری تشتان بدەت، نەكو ب مەزهەرێ وان، بەردەوام دەستپێشخەریێ بكت،خوەدان پیشبینی بت، خوەدان سەكن، ئیرادە، بریارو باندور و یا ژ هەموویێ گرنگتر، ئەوە كو هەول بدەت پێناسا كلاسیك دەربارێ خۆ لابدەت، ئێدی ب بستەهی و وێرەكی پشكداریێ دژیانا جڤاكی و سیاسی دە بكت و ل داویێ ببت ئۆرگانەكێ ئەكتیڤ و ئازاد و ،هینگێ دێ بتە هۆكارەكێ جددی بۆ ئاڤاكرنا جڤاكەكێ ئەكتیڤ و ئازاد.
تُتاح هذه الصورة أيضا في: کوردی
