گيبسۆن ده‌ن: كۆمپانيێن په‌ترۆلێ ل هه‌رێمێ دشێن سكالايێ ل سه‌ر حكومه‌تا ئيراقێ تۆمار بكه‌ن
گاڤ نيوز
كۆمپانيه‌كا نێڤده‌وله‌تى يا ئه‌مريكى ئه‌ڤرۆ رۆژا شه‌مبيێ راگه‌هاند كو كۆمپانيێن په‌ترۆلێ ل هه‌رێما كوردستانێ دشێن سكالايان ل دادگه‌هێن نێڤده‌وله‌تى ل سه‌ر حكومه‌تا ئيراقێ تۆمار بكه‌ن و داخوازا ب ملياران دولاران وه‌ك قه‌ره‌بوو بكه‌ن.
كۆمپانيا گيبسۆن ده‌ن يا ياسايى يا ئه‌مريكى د به‌يانه‌كێ دا راگه‌هاند؛ ل گۆره‌ى مادده‌يێن ده‌ستوورێ ئيراقێ و ياسايا نه‌فت و غاز يا هه‌رێما كوردستانێ، پێگه‌هێ ياسايى يێ كۆمپانيێن په‌ترۆلێ يێن ل هه‌رێما كوردستانێ كار دكه‌ن يێ ب هێزه و دشێن سكالايان ل سه‌ر حكومه‌تا ئيراقێ تۆمار بكه‌ن.
د به‌يانێ دا هاتيه ژى؛ حكومه‌تا ئيراقێ دێ رويبروى ئاريشه‌يێن ياسايى يێن مه‌زن بيت و دێ نه‌چار بيت ب ملياران دولاران وه‌ك قه‌ره‌بوو بده‌ته وان كۆمپانيان.
ئاماژه دايه وێ چه‌ندێ ژى؛ بڕيارێن دادگه‌ها فيدرالى د نه‌ياسايى نه و دێ زيانێ ب ئيراقێ گه‌هينن چونكى گرێبه‌ستێن ياسايى دناڤبه‌را حكومه‌تا هه‌رێما كوردستانێ و كۆمپانيێن بيانى دا هاتينه ئيمزاكرن.
خۆيا ژى كريه؛ هه‌رێما كوردستانێ پشكه‌كه ژ ئيراقێ و پێدڤيه ئيراق پێگريێ ب ياسايێن نێڤده‌وله‌تى بكه‌ت و ب تايبه‌ت كو وه‌زاره‌تا په‌ترۆلێ يا ئيراقێ بوويه گه‌ف ل سه‌ر ژينگه‌ها كارێ كۆمپانيێن په‌ترۆلێ ل هه‌رێما كوردستانێ.
كۆمپانيێ داخواز ژ حكومه‌تا ئيراقێ كر كو مافێن وه‌به‌رهێنه‌رێن بيانى گره‌نتى بكه‌ت و دياركر؛ بڕيارا حكومه‌تا ئيراقێ يا هه‌ڤدژه ل گه‌ل ياسايێن نێڤده‌وله‌تى.
كۆمپانيا ئه‌مريكى ئاشكرا ژى كر؛ چاڤه‌رێ دهێته كرن كۆمپانيێن بيانى يێن د بوارێ په‌ترۆلێ دا ل هه‌رێما كوردستانێ كار دكه‌ن ل دادگه‌ها ناڤبژيڤانيێ يا نێڤده‌وله‌تى ل له‌نده‌ن سكالايێ ل سه‌ر بڕيارا دادگه‌ها فيدرالى يا ئيراقێ تۆمار بكه‌ن.
دادگه‌ها فيدرالى يا ئيراقێ ل 15ى شوباتا ئه‌ڤ ساله بڕياره‌ك ل دۆر هه‌لوه‌شاندنا ياسايا نه‌فت و غاز يا هه‌رێما كوردستانێ ژماره 22 يا سالا 2007 ده‌ركربوو.
كۆمپانيا گيبسۆن ده‌ن كۆمپانيه‌كا ياسايى يا ئه‌مريكى يه و ل سالا 1890 هاتبوو دامه‌زراندن.
تُتاح هذه الصورة أيضا في: کوردی
