سەرۆکێ باژێرڤانیا زاخۆ ھاتە دەستەسەرکرن
باسنيوز:
ل گور وان زانیاریێن ب دەست ب (باسنیوز) کەفتین، ئەڤرۆ رۆژا چوارشەمبی 24/1/2018، ب بریارا دادوەرێ ڤەکۆلینا زاخۆ، (بژار مۆنیب) سەرۆکێ باژێرڤانیا زاخۆ ژ ئالیێ پۆلیسێن قەزا زاخۆ ڤە ھاتیە دەستەسەرکرن.
رائیدێ مافپەروەر ھێمن سلێمان، بەرپرسێ راگەھاندنا پۆلیسێن پارێزگەھا دھۆکێ، تایبەت بۆ (باسنیوز) راگەھاند، ل سەر داخوازا داواکارێ گشتی، سەرۆکێ باژێرڤانیا زاخۆ ئەڤرۆ رۆژا 24/1/2018 ژ ئالیێ پۆلیسان ڤە ھاتە دەستەسەرکرن.
ئاشکرا کر، کو پشتی نڤیسینگەھا زاخۆ یا دەستەیا دەستپاکیێ پێزانین داینە سەرۆکاتیا داخوازکارێ گشتی ئەوان ژی ب رێیا خوە ئاگەھداریا داخوازکارێ گشتی یێ دھۆکێ، کر کو چەند کەسەکان زێدەگاڤی یا کریە سەر مولکێ گشتی و خانی ل سەر ئاڤاکرینە و گۆت: “ئەڤ نڤیسارە ھاتە رەوانەکرن بۆ دادگەھا ڤەکۆلینێ و دادگەھا ناڤھاتی ژی بڕیار دا بژار مونیب سەرۆکێ باژێرڤانیا زاخۆ ل دادگەھێ ئامادەبیت و پشتی ئامادەبووی ل دووڤ بڕیارا دادوەرێ ڤەکۆلینێ ل دووڤ بەندێ 457 ژ قانوونێن سزای ھاتە دەستەسەرکرن”.
بەرپرسێ راگەھاندنا پۆلیسێن پارێزگەھا دھۆکێ، ئاماژە دا وێ چەندێ کو بەری نوکە سەرۆکێن بەرێ یێن باژێرڤانیێن قەزایێن دھۆک و ئاکرێ و شێخان ھاتبوونە دەستەسەرکرن.
ئەحمەد شنگالی، ئەندامێ دەستەیا نەزاھێ ل پارێزگەھا دھۆکێ، بۆ (باسنیوز) راگەھاند، ھۆسا ل تۆرێن جڤاکی بەلاڤبوویە کو سەرۆکێ باژێرڤانیا زاخۆ ب بریارا دەستەیا نەزاھێ ھاتیە دەستەسەرکرن، لێ یا درۆست مە چو پەیوەندی ب ڤی بابەتی ڤە نینە و ئەو ب خۆ ژ ئالیێ دادوەرێ ڤەکۆلینێ ل قەزا زاخۆ ھاتیە دەستەسەرکرن.
تُتاح هذه الصورة أيضا في: کوردی
