بارزانی: هه‌رێما كوردستانێ به‌رهه‌ڤه د هه‌ر ره‌وشه‌كێ دا پاشه‌رۆژا کریستیانان گه‌ره‌نتی بكه‌ت
WAAR-دهۆک:
سه‌رۆكێ هه‌رێما كوردستانێ پێشوازی ل شانده‌كا سه‌رۆك تائیفه‌یێن مه‌سیحییێن ئیراق و هه‌رێمێ كر و راگه‌هاند: هه‌رێما كوردستانی د هه‌ر ره‌وشه‌كێ دا به‌رهه‌ڤه هاریكاریا خوشك و برایێن خوه یێن مه‌سیحی بكه‌ت، داكو پاشه‌رۆژا وان بهێته گه‌ره‌نتیكرن.
مه‌سعوود بارزانی سه‌رۆكێ هه‌رێما كوردستانێ پێشوازی ل شانده‌كا سه‌رۆك تائیفه‌یێن مه‌سیحییێن ئیراق و هه‌رێمێ كر و د كۆمبوونێ دا شاندا مێهڤان سوپاسیا هه‌لویستێ سه‌رۆك بارزانی و حكومه‌ت و گه‌لێ كوردستانێ كر ژ به‌ر وێ پشته‌ڤانیا ل ده‌مێ ته‌نگاڤیان رووبرووی وان ته‌حه‌د‌یاتان بووینه ئه‌وێن نه‌مانا مه‌سیحیان كریه ئارمانج.
هه‌ر د كۆمبوونێ دا شاندا مێهڤان دلگرانیا خوه ل هه‌مبه‌ری پاشه‌رۆژا ده‌ڤه‌رێن ئازادكری نیشان دا.
د هه‌مبه‌ر دا سه‌رۆك بارزانی سیاسه‌تا هه‌رێمێ سه‌باره‌ت قوناغا پشتی داعشێ بۆ شاندا مێهڤان رۆهنكر و دووپاتكر كو ئه‌و هه‌ر ژ ده‌ستپێكێ نه لگه‌ل هندێ بوو خوش و برایێن مه‌سیحی ده‌ڤه‌رێن خوه بجهبهێلن و هه‌ر ل ده‌ستپێكا شه‌رێ داعشێ ب وان را گۆتبوو، یان پێكڤه دێ ب ئازادی ژین، یان ژی دێ ب سه‌ر بلندی پێكڤه مرن.
سه‌رۆكێ هه‌رێمێ راگه‌هاند ژی: هه‌رێما كوردستانی د هه‌ر ره‌وشه‌كێ دا به‌رهه‌ڤه هاریكاریا خوشك و برایێن خوه یێن مه‌سیحی بكه‌ت، داكو پاشه‌رۆژا وان بهێته گه‌ره‌نتیكرن.
بارزانی جه‌خت ل وێ یه‌كێ ژی كر: پێدڤیه ده‌ڤه‌رێن ئازادكری بریارا داویێ ل سه‌ر پاشه‌رۆژا خوه بده‌ن و بشێن خوه ب پارێزن و ده‌ڤه‌رێن خوه ب رێڤه‌ببه‌ن.
تُتاح هذه الصورة أيضا في: کوردی
