ئێزدیان كەلتۆر و داب و نەریتێن خۆ پاراستینە و كاریە نیشا جڤاكێن بیانی بدەن
تۆرا لالش:
د هەموو جڤاكان دا كەلتۆر و داب ونەریت دئێنە هژمارتن وەك ناسناما هەر مللەتەكی،مللەتێ ئێزدی ئێك ژوان مللەتانە كو ب داب و نەریتێن و جلكێن خۆ یێن كەلتۆری و فلكلۆری ناڤدارن،هەتا ئیرۆ كاریە ناڤ و فەلسەفە و كەلتۆر و فلكلۆر و رێورەسم و دیرۆكا ئۆلا خۆ بپارێزن و بۆ جڤاكێن بیانی بدەنە دیاركرن.
ڤەكۆلەرێ مێژوویی سابر بەرەكات بۆ تۆرا لالش دیاركر:”د هەموو جڤاكان دا كەلتۆر و داب ونەریت دئێنە هژمارتن وەك ناسنامە و هەبوونا هەر مللەتەكی و پاراستنا وان ئەركە لسەر هەر خێزان و جڤاكی،مللەتێ ئێزدی ئێك ژوان مللەتێن ناڤدارە ب جلكێن خۆ یێن كەلتۆری و فلكلۆری، پێتڤیە لسەر خێزانا ئێزدی زارۆكێن خۆ فێری حەز ژێكرن و پاراستنا داب و نەریتێن خۆ بكن داكو چ جاران نەئێنە هنداكرن،هەر مللەتەكی بڤێت ناسناما خۆ بۆ جیهانێ دیار بكت پێتڤیە كەلتۆر و فلكلۆرێ خۆ بپارێزێت ل هەر جیەكێ لێ بژین”.
ئەندامێ دەستەیا بلندا بنگەهێ لالش یێ رەوشەنبیری و جڤاكی سەعید جردو بۆ تۆرا لالش دبێژت:”بنگەهێ لالش بوویە دەلیڤەیەكا زێرین ژبۆ ناساندنا جڤاكا ئێزدی ب شێوەیەكێ گشتی بۆ پێكهاتێن دی یێن عێراقێ و كوردستانێ،دیسان بنگەهێ لالش بوویە دەرگەهەك ژبۆ تۆماركرنا تێكستێن پیرۆز یێن ئەدەبێ ئۆلا ئێزدیان و كەلتۆر و فلكلۆر و داب و نەریتێن جڤاكی ئەڤ بابەتنە ئاماژە پێ هاتینە دان و د چەندین پەرتۆكان دا هاتینە نڤیسین و چاپكرن و وەشاندن ژئالیێ بنگەهی ڤە و هەتا ئیرۆ رۆژ ئەڤ بزاڤ د بەردەوامن و چاپەمەنیێن بنگەهی ئارمانج ژێ ئەوە بەردەوام تێكست و بابەت و ڤەكۆلینێن نوو دوەشینن و پەیاما كەلتۆر وفلكلۆر وداب ونەریتێن جڤاكا ئێزدی گەهاندینە رێژەیەكا مەزن ژخووندەڤان،داخوازێ ژ ڤەكۆلەر و نڤیسەرێن دبوارێ ئێزدیناسیێ دا دكەین هەول بدەن بتر بەرهەمێن خۆ وەرگێرنە سەر زمانێن جیهانی ژبۆ ناساندنا فەلسەفە و كەلتۆر و فلكلۆرێ ئێزدیان كو پشكەكا رەسەنە ژ شارستانیەتا كوردستانێ بۆ هەموو مللەتێن جیهانێ”.
ژبال خۆڤە رۆژنامەڤان لوقمان سلێمان بۆ تۆرا لالش گۆت:”پەرستگەها لالش وەكو كەڤنترین و پیرۆزترین جیێ ئاینێ ئێزدیانە و هەر شاندەكێ حكومەتا عێراقێ یان كوردستانێ یان نێڤ دەولەتی سەرەدانا پەرستگەها لالش دكن دئێنە پێشوازیكرن و بەحسێ رامان و كەڤناتیا پەرستگەها لالش و مێژوو و فەلسەفە و رێورێورەسم و خودێ ناسی و ئاشتیا ئاینی یێ ئێزدیان بۆ وان دئێتەكرن، هەروەسا هاریكاریا قوتابیان دكەین یێن نامێن ماستەر و دكتۆرایێ لسەر ئۆلا ئێزدیان و لسەر پەرستگەها لالشێ دنڤیسین،دیسان هاریكارین دگەل راگەهاندكاران ژبۆ پێشكێشكرنا پێزانینان لسەر ئێزدیان و رێورەسم و داب ونەریت و دیرۆكا ئێزدیان”.
ئەكتەر سالم حسێن بۆ تۆرا لالش دبێژت:”پشتی جینۆسایدا ئێزدیان ئەوا لسەر دەستێ رێكخراوا تیرۆرستیا داعش ل(3/8/2014)ێ ل شنگالێ هاتیە ئەنجامدان،ئێزدیان كاریە ناڤ و فەلسەفە و كەلتۆر و فلكلۆر و داب ونەریت و رێورەسم و دیرۆكا ئۆلا خۆ بۆ جڤاكێن بیانی بدەنە دیاركرن و كارین بگەهینە جیهانێ ئەو ژی ب رێیا هۆنەر و ئەدەب و شانۆ و راگەهاندنێ،داخوازێ ژ جیێن پەیوەندیدار دكەین كو مۆزخانەك بێتە چێكرن ژ كەلوپەلێن دێرێن و ژ جل و بەرگێن ئێزدیان و بێنە پاراستن،داكو ل پاشەرۆژێ رەساناتیا مە نەئێتە ونداكرن و پشتگوهاڤێتن”.
تُتاح هذه الصورة أيضا في: کوردی
