بنگەهێ لالش دبتە مەزنترین دەزگەهێ رەوشەنبیری و ڤەكۆلینان یێ ئێزدیان
تۆرا لالش:
ژ دەستپێكا دامەزراندنێ و هەتا ئیرۆ رۆژ بنگەهێ لالش یێ رەوشەنبیری و جڤاكی بوویە بنگەهێ ڤەكۆلین و زانین و زانستێ و ژێدەران لسەر هەبوون و كەڤناریا ئۆلا ئێزدیان و سالانە ب دەهان شاندێن نافخۆیی و بیانی و ڤەكۆلەر سەرەدانێ دكن،كو دبتە مەزنترین دەزگەهێ رەوشەنبیری لسەر ئاستێ هەرێما كوردستانێ و عێراقێ.
قاسم ئەلیاس،مامۆستایەكی ئێزدی بۆ دەنگێ لالش دیاركر،بنگەهێ لالش ژ سالا(1993) وەرە و تا ئیرۆ دەستە بۆ دەستەیێ هەول ددەن كاروخەباتا مەیدانی ل ئالیێ رەوشەنبیری و جڤاكی و كەلتۆری بۆ ئێزدیان بكن،كو بوویە مەزنترین دەزگەهێ رەوشەنبیری لسەر ئاستێ هەرێما كوردستانێ و بەلكو عێراقێ ب هەبوونا ژمارا زۆر یا ئەندامان و خودان شیان و باوەرنامە،بنگەهێ لالش خزمەتەك باش ئەنجام دایە نەخاسمە ژلایێ رەوشەنبیری ڤە كو گەلەك رەوشەنبیرێن ئێزدیان ل هەڤ كۆمكرینە و گەلەك نڤیسین دكیۆمێنتكرینە،زێدەباری ب دەهان پەرتۆك و گۆڤار و بەلاڤۆك چاپكرینە.
ژلایێ خۆ ڤە سەلوا سەلیم فەرمانبەرەكا ئێزدی بۆ دەنگێ لالش گۆت:بنگەهێ لالش تا رادەیەكێ باش خزمەتا هەموو تەخ و چینێن مللەتێ ئێزدی كریە و تایبەت قوتابیان،زێدەباری گەلەك خۆلێن رەوشەنبیری ڤەكرینە و كۆنفرانس و ئاهەنگ و ڤیستەڤال گێراینە،بنگەهێ لالش كاریە ببتە بنگەهێ ڤەكۆلین و زانین و زانستێ و ژێدەران لسەر هەبوون و كەڤناریا ئۆلا ئێزدیان كو سالانە ب دەهان شاندێن نافخۆیی و بیانی و ڤەكۆلەر سەرەدانێ دكن،ئەڤە جیێ دلخۆشیا ئێزدیانە سەرەرای هەبوونا كێم وكاسیان،پێشنیار دكەین بنگەهێ لالش زێدەتر هەول بدەت ئێزدیان ب خەلكێ كوردستانێ ب تایبەت و خەلكێ دی ب گشتی بدەت ناسكرن و پێنگاڤێن باشتر پاڤێژە.
ل رۆژا(12/5/1993)ێ بنگەهێ لالش یێ رەوشەنبیری و جڤاكی ل دهۆكێ ب پشتەڤانیا راستەوخۆ یا حكوومەتا هەرێما كوردستانێ لسەر هەژمارەكا خەمخۆر و رەوشەنبیرێن ئێزدی لژێر دروشمێ (لالش هەردەم كانیەكا زەلالە د هۆرتە د روبارێ رەوشەنبیریا كوردی دا) هاتە دامەزراندن، و جی و بنگەهەكێ دیار د سازیێن هـەرێما كوردستانێ دا گرتیە،تا ئیرۆ لسەر كار و كەد و خەبات و خزمەتا ئۆل و جڤاكا ئێزدی بەردەوامە.
تُتاح هذه الصورة أيضا في: کوردی
